ភ្នំពេញ៖ក្នុងបរិការណ៍ដែលកម្ពុជា កំពុងទទួលរងគ្រោះផលប៉ះពាល់ធ្ងន់ធ្ងរ ពីការរីករាលដាលនៃជំងឺកូវីដ១៩ រដ្ឋមន្ត្រីក្រសួងមុខងារសាធារណៈ បានប្រកាសនិរាករណ៍មន្ត្រីរាជការចំនួន ១៣៥នាក់។
ក្រសួងសេដ្ឋកិច្ចនិងហិរញ្ញវត្ថុ បានចេញលិខិតមួយច្បាប់ ជម្រាប់មករដ្ឋមន្ត្រីក្រសួងមុខងារសាធារណៈ ករណីវិធានការគ្រប់គ្រងចំនួនបុគ្គលិកមន្ត្រីរាជការស៊ីវិល និងចំណាយបន្ទុកបុគ្គលិកឆ្នាំ២០២០។
យោងតាមចំណារដ៏ខ្ពង់ខ្ពស់របស់សម្តេចតេជោ នាយករដ្ឋមន្ត្រី ចុះថ្ងៃទី៣១ ខែមីនា ឆ្នាំ២០២០ លើលិខិតលេខ ២២១៩ សហវ.អថ ចុះថ្ងៃទី២៦ ខែមីនា ឆ្នាំ២០២០ របស់ក្រសួងសេដ្ឋកិច្ចនិងហិរញ្ញវត្ថុ បានសម្រេច ដូចខាងក្រោម ៖ ក្នុងបរិការណ៍ដែលកម្ពុជា កំពុងទទួលរងគ្រោះផលប៉ះពាល់ធ្ងន់ធ្ងរ ពីការរីករាលដាលនៃជំងឺកូវីដ១៩ , និរាករណ៍ នូវប្រកាសលេខ ៧៦៩ មស.ប្រក ចុះថ្ងៃទី១៨ ខែកុម្ភៈ ឆ្នាំ២០២០ ស្តីពីការជ្រើសរើសមន្ត្រីរាជការចំនួន ១៣៥នាក់ ឲ្យចូលក្របខ័ណ្ឌក្រសួងមុខងារសាធារណៈ។ ផ្តល់គោលការណ៍រួមរបស់រាជរដ្ឋាភិបាល ផ្អាកការផ្តល់ក្របខ័ណ្ឌពិសេស ដែលលើសពីចំនួនមន្ត្រីរាជការចូលនិវត្តន៍ ដល់គ្រប់ក្រសួង ស្ថាប័ន ដទៃទៀត ទាំងអស់នៅក្នុងឆ្នាំ២០២០, ព្រមទាំងស្នើសុំផ្អាកការផ្តល់ក្របខ័ណ្ឌពិសេសដែលលើសពីចំនួនមន្ត្រីចូលនិវត្តន៍ដល់គ្រប់ក្រសួង ស្ថាប័ន ទាំងអស់សម្រាប់ឆ្នាំ២០២១ ដល់ឆ្នាំ២០២៣ ផងដែរ។
បន្ទាប់ពីកិច្ចប្រជុំនៅព្រឹកថ្ងៃទី២៣ ខែមេសា ឆ្នាំ២០២០ ក្រសួងសម្រេចបង្កើត គណៈកម្មការត្រួតពិនិត្យភាពមិនប្រក្រតី នៃករណីជ្រើសរើសមន្ត្រីក្របខណ្ឌពិសេសចំនួន ១៣៥នាក់ ស្របតាមស្មារតីសម្រេចរបស់រាជរដ្ឋាភិបាល និងគោលការណ៍របស់ក្រសួងសេដ្ឋកិច្ច និងហិរញ្ញវត្ថុ សំដៅធានាប្រសិទ្ធភាព នៃវិធានការគ្រប់គ្រងចំនួន បុគ្គលិកមន្ត្រីរាជការស៊ីវិល និងចំណាយបន្ទុកបុគ្គលិក ឆ្នាំ២០២០ និងឆ្លើយតបទៅនឹងស្ថានភាពជាក់ស្តែង ដែលកម្ពុជាកំពុងប្រឈមនឹងបញ្ហាជំងឺកូវីដ១៩៕ដោយ៖កូឡាប