ការពិសោធន៍ប្រើប្រាស់ថ្នាំ Remdesivir ដើម្បីព្យាបាលវីរុសកូរ៉ូណា បានបរាជ័យក្នុងការសាកល្បងលើកដំបូង។ នេះបើតាមលទ្ធផលបញ្ចេញដោយចៃដន្យ នៅថ្ងៃព្រហស្បតិ៍ម្សិលមិញនេះ។ ការបរាជ័យនេះ ធ្វើឲ្យក្តីរំពឹងកាន់តែថយចុះសម្រាប់ថ្នាំដែលគេកំពុងតែរងចាំ។
សេចក្តីសង្ខេបបានចេញផ្សារតាមអនឡាញ នៅលើគេហទំព័រ របស់អង្គការសុខភាពពិភពលោក ហើយវាត្រូវបានចុះផ្សាយ លើកដំបូងដោយសារព័ត៌មាន Financial Time and Stat។
ប៉ុន្តែ ក្រុមហ៊ុន Gilead Sciences ដែលជាអ្នកផលិតថ្នាំនោះ បានជំទាស់នឹងការចុះផ្សាយដែលបានកំណត់ពីការរកឃើញ ដោយបានលើកឡើងថា ទិន្នន័យបានបង្ហាញពីអត្ថប្រយោជន៍ ដែលមានសក្តានុពល។
ការចេញផ្សាយអត្ថបទសង្ខេបបាននិយាយថា ការសាកល្បងរបស់ចិនបានធ្វើឡើងលើអ្នកជំងឺចំនួន ២៣៧នាក់ ដោយ ១៥៨នាក់ជាមួយនឹងថ្នាំព្យាបាល និង ៧៩នាក់ជាមួយក្រុមថ្នាំគ្រប់គ្រង។ ថ្នាំ Remdesivir ត្រូវបានគេបញ្ឍប់ដើមទីលើអ្នកជំងឺចំនួន ១៨នាក់ ដោយសារតែវាមានផលប៉ះពាល់។
ក្រោយពេលធ្វើការពិសោធន៍បាន ១ខែ ១៣,៩ភាគរយនៃអ្នកជំងឺដែលប្រើប្រាស់ថ្នាំ Remdesivir បានស្លាប់ បើធៀបទៅ ១២.៨ភាគរយនៃអ្នកជំងឺដែលដាក់ថ្នាំសម្រាប់គ្រប់គ្រងវីរុស។ ភាគខុសគ្នាមិនមានលក្ខណៈសំខាន់ផ្នែកស្និតិឡើយ។
អង្គការសុខភាពពិភពលោកបានប្រាប់សារព័ត៌មាន Financial Times ថាសេចក្តីព្រាងនោះកំពុងស្ថិតក្រោមការត្រួតពិនិត្យ ហើយវាត្រូវបានចុះផ្សាយមុនដោយភាន់ច្រឡំ។
ការសាកល្បងនៅតែបន្ត
អ្នកនាំពាក្យរបស់ក្រុមហ៊ុន Gilead បានថ្លែងប្រាប់ AFP ដូច្នេះថា “ពួកយើងជឿជាក់ថា ការប្រកាសនោះមានការកំណត់លក្ខណៈ មិនសមរម្យចំពោះការសិក្សា” ដោយលោកលើកឡើងថា វាត្រូវបានបញ្ឍប់មុនពេលដោយសារតែ ការចុះឈ្មោះមានចំនួនទាប ហើយដូច្នេះវាមិនមានសារៈសំខាន់ផ្នែកស្ថិតិឡើយ។
អ្នកនាំពាក្យដដែលនិយាយទៀតថា “លទ្ធផលនៃការសិក្សាមិនមានភាពច្បាស់លាស់ ទោះបីជាទំនោរនៅក្នុងទិន្នន័យបង្ហាញ ពីអត្ថប្រយោជន៍ដ៏មានសក្តានុពលរបស់ថ្នាំ Remdesivirក្តី ជាពិសេសក្នុងចំណោមអ្នកជំងឺ ដែលត្រូវបានព្យាបាលដំណាក់កាលដំបូង”។
សូមបញ្ជាក់ថា Remdesivi ស្ថិតក្នុងចំណោមឱសថដំបូងដែលត្រូវ បានគេណែនាំសម្រាប់ការព្យាបាលវីរុសកូរ៉ូណា ដែលមានក្តីសង្ឃឹមខ្លាំងក្នុងការប្រើប្រាស់វា៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
