ប៉ៃលិន ៖ ឯកឧត្ដម ផាន់ ចាន់ធុល អភិបាល នៃគណៈអភិបាលខេត្ដប៉ៃលិន បានចុះសួរសុខទុក្ខនិងនាំអំណោយជាស្បៀងអាហារ ទៅចែកជូនប្រជាពលរដ្ឋប្រមាណ៧០គ្រួសារ ដែលរងគ្រោះដោយសារគ្រោះធម្មជាតិខ្យល់កន្ត្រាក់ រលំផ្ទះខូចខាតនៅស្រុកសាលាក្រៅ និង ក្រុងប៉ៃលិន កាលពីព្រឹកថ្ងៃទី២៤ ខែមេសា ឆ្នាំ២០២០។
ឯកឧត្ដម ផាន់ ចាន់ធុល បានមានប្រសាសន៍ថា ក្នុងហេតុការណ៍គ្រោះធម្មជាតិខាងលើ បណ្តាលឲ្យខូចខាតផ្ទះប្រជាពលរដ្ឋ ក្នុងស្រុកសាលាក្រៅ ខូចខាតផ្ទះប្រជាពលរដ្ឋចំនួន ៦៥ខ្នងផ្ទះគឺនៅឃុំស្ទឹងកាច់ ៣ខ្នងផ្ទះ ។ នៅឃុំអូរអណ្ដូង ៥ខ្នងផ្ទះ ។ នៅឃុំស្ទឹងត្រង់ ៥២ខ្នងផ្ទះ ។ ឃុំសាលាក្រៅ ៥ខ្នងផ្ទះ និងនៅក្នុងក្រុងប៉ៃលិន ក្នុងសង្កាត់បរយ៉ាខា ខូចខាត ផ្ទះ ៥ខ្នងផ្ទះ។ សាលាសង្កាត់ ១ខ្នង ។ តូបលក់ដូរ ២តូប និងស្លាកគណបក្សប្រជាជន ១ស្លាក ។
ឆ្លៀតក្នុងឱកាសនេះឯកឧត្តម ផាន់ ចាន់ធុល អភិបាល នៃគណៈអភិបាលខេត្ដប៉ៃលិន បានមានប្រសាសន៍ផ្ដាំផ្ញើ ដល់ប្រជាពលរដ្ឋទាំងអស់ ឲ្យយកចិត្តទុកដាក់ និងប្រុងប្រយ័ត្នគ្រប់ពេលវេលា ក៏ដូចជាការការពារ និងបង្ការកុំឲ្យឆ្លងជំងឺ COVID-19 ផងដែរ៕ ដោយ ៖ អ៊ុងសារុំ
