ខេត្តប៉ៃលិន ៖ មន្ត្រីមន្ទីរសាធារណការនិងដឹកជញ្ជូនខេត្តប៉ៃលិន សហការជាមួយសមត្ថកិច្ចចម្រុះ បានបន្តចុះពង្រឹងនិងត្រួតពិនិត្យលក្ខណៈបច្ចេកទេស យានយន្តនិងប័ណ្ណបើកបរ លើរថយន្តគ្រប់ប្រភេទ ដែលបើកបរលើផ្លូវសាធារណៈ ក្នុងគោលបំណង ដើម្បីពង្រឹងឲ្យអ្នកបើកបរយានយន្ត គោរពច្បាប់ចរាចរណ៍ មិនមែនចង់បានថវិកា ដែលបានមកពីការផាកពិនយ័នោះទេ។
ការចុះត្រួតពិនិត្យ លក្ខណៈបច្ចេកទេស យានយន្ត និងប័ណ្ណបើកបរនេះ បានធ្វើឡើងរយៈពេលបីថ្ងៃជាប់គ្នា មកហើយចាប់ថ្ងៃទី២២ ដល់ថ្ងៃទី២៤ ខែមេសា ឆ្នាំ២០២០។
លោក អ៊ាត សារ៉ាត់ ប្រធានមន្ទីរសាធារណការនិងដឹកជញ្ជូនខេត្តប៉ៃលិន បានមានប្រសាសន៍ឲ្យដឹង តាមទូរស័ព្ទនាព្រឹកថ្ងៃទី២៤ ខែមេសា ឆ្នាំ២០២០ថា គោលបំណង ដែលក្រុមការងារ បន្តចុះត្រួតពិនិត្យយានយន្ត នៅតាមដងផ្លូវនាពេលនេះ ក្នុងគោលបំណងពង្រឹង ឲ្យអ្នកបើកបរយានយន្តទាំងឡាយ ចូលរួមគោរពច្បាប់ចរាចរណ៍។ “បើយើងចូលរួមគោរពច្បាប់ចរាចរណ៍ទាំងអស់គ្នា នោះពិតជាធ្វើឲ្យយើង ទទួលបាននូវសេចក្តីសុខ ដល់ខ្លួន ដល់ក្រុមគ្រួសារ ក៏ដូចជាអ្នកដទៃផងដែរ។ ប៉ុន្តែបើយើងមិនគោរពច្បាប់ចរាចរណ៍ទេ សមត្ថកិច្ចនឹងធ្វើការផាកពិន័យ ទៅតាមច្បាប់ បណ្តាលឲ្យយើងខាតបង់ថវិកា ពេលខ្លះក៏អាចប៉ះពាល់ ដល់ជីវភាពរស់នៅប្រចាំថ្ងៃ ជាក់ជាមិនខាន” ប្រធានមន្ទីរសាធារណការបានបញ្ជាក់បន្ថែមយ៉ាងដូច្នេះ។
លោកបន្តថា ការចុះត្រួតពិនិត្យរឹតបន្តឹងនេះ មានគោលបំណងការពារទ្រព្យសម្បត្តិសាធារណៈ ដូចជាប្រព័ន្ធហេដ្ឋារចនាសម្ព័ន្ធ (ផ្លូវ ថ្នល់ ស្ពាន) ឱ្យបានស្ថិតស្ថេរ គង់វង្ស រឹងមាំប្រើប្រាស់ជាប់បានយូរអង្វែង តាមអាយុកាល ស្របតាមស្តង់ដារបច្ចេកទេសសាងសង់កំណត់ ក៏ដូចជា ដើម្បីរួមចំណែកក្នុងការទប់ស្កាត់ និងការកាត់បន្ថយគ្រោះថ្នាក់ចរាចរណ៍។
គណៈកម្មាធិការសុវត្ថិភាពចរាចរណ៍ផ្លូវគោកខេត្តប៉ៃលិន បានរំលឹកដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ ឱ្យចូលរួមអនុវត្តច្បាប់ ស្តីពីចរាចរណ៍ផ្លូវគោក និងបទដ្ឋានគតិយុត្តពាក់ព័ន្ធដោយស្មារតី រួមសហការ និងការទទួលខុសត្រូវខ្ពស់។ ទោះជាច្បាប់ចរាចរណ៍ផ្លូវគោក ត្រូវបានអនុវត្តនិងធ្វើការរឹតបន្តឹង ដោយកម្លាំងសមត្ថកិច្ចចម្រុះ ត្រួតពិនិត្យនៅតាមដងផ្លូវនានា យ៉ាងណាក្តី ក៏គេសង្កេតឃើញថា ម្ចាស់យានយន្តភាគច្រើន នៅតែមិនគោរពច្បាប់ ក្នុងនោះ នៅតែបើកបររថយន្តកែច្នៃខុសលក្ខណៈបច្ចេកទេស ដឹកជញ្ជូនសំពីងសំពោង ដឹកលើសទម្ងន់ គ្មានប័ណ្ណបើកបរ ក៏ដូចជាយានយន្ត ពុំមានឯកសារគ្រប់គ្រាន់ ជាដើម។
គណៈកម្មាធិការសុវត្ថិភាពចរាចរណ៍ផ្លូវគោកខេត្តប៉ៃលិន បានអំពាវនាវ ដល់អ្នកបើកបរយានយន្តគ្រប់ប្រភេទ ត្រូវចូលរួមអនុវត្ត និងគោរពច្បាប់ចរាចរណ៍ផ្លូវគោកទាំងអស់គ្នា ដើម្បីការពារអាយុជីវិតខ្លួនឯង និងអ្នកដទៃ ដើម្បីរួមចំណែក ក្នុងយុទ្ធនាការ នៃការការពារសន្តិសុខ សណ្តាប់ធ្នាប់ និងសុវត្ថិភាពចរាចរណ៍ផ្លូវគោក របស់ក្រសួងមហាផ្ទៃ ឲ្យកាន់តែល្អប្រសើរបន្ថែមទៀត៕ ដោយ ៖ អ៊ុងសារុំ