វីដេអូមួយដែលបង្ហាញឲ្យឃើញសត្វខ្លាស១ក្បាល ដើរនៅក្នុងរង្វង់គ្មានទីបញ្ចប់ នៅក្នុងទ្រុងរបស់វា ក្នុងសួនសត្វមួយនៃប្រទេសចិន បានកំពុងធ្វើឲ្យអ្នកប្រើប្រាស់អ៊ីនធឺណិតជាច្រើនស្លុតចិត្ត អាណិតវាជាខ្លាំង។
នៅក្នុងវីដេអូ ខ្លាស Bengal មួយក្បាល អាចត្រូវបានមើលឃើញកំពុងដើរដោយគ្មាននឿយហត់សោះឡើយ នៅក្នុងទីតាំងតែមួយ តាមខ្សែរង្វង់ដែលត្រូវបានមើលឃើញ។
អ្នកមើលថែសួនសត្វនៅទីក្រុងប៉េកាំង បានកត់សម្គាល់ដំបូងពីឥរិយាបថ របស់សត្វខ្លានេះកាលពីចុងខែមុន ។ នេះបើយោងតាម Beijing News។
ជាលទ្ធផល ឆ្មាធំត្រូវបានគេរាយការណ៍ថា ត្រូវបានយកចេញពីកន្លែងបង្ហាញនេះ ដើម្បីទទួលការប្រឹក្សាខាងផ្លូវចិត្ត។
បុគ្គលិកម្នាក់បានប្រាប់អ្នកយកព័ត៌មានថា “យើងបានយកសត្វនេះទៅទទួលការបណ្តុះបណ្តាល អាកប្បកិរិយារួចហើយ។ យើងក៏បាននាំយកអាហារ និងប្រដាប់ប្រដាក្មេងលេងបន្ថែមទៀត សម្រាប់សវា។ វាដូចជាទទួលបាន “ការប្រឹក្សាខាងផ្លូវចិត្ត” ។
ក្រោយឃើញឥរិយាបទដ៏ចម្លែករបស់សត្វខ្លាខាងលើនេះ អ្នកប្រើប្រាស់បណ្តាញសង្គមចិន បានសម្តែងការព្រួយបារម្ភ ចំពោះសុខភាពរបស់វា ដោយអ្នកខ្លះសង្ស័យថាវាច្បាស់ណាស់មាន “បញ្ហាផ្លូវចិត្ត”។
អ្នកប្រើប្រាស់ម្នាក់ទៀតលើកឡើងថា “ខ្ញុំហាក់ដូចជាបានសង្កេតមើលរឿងនេះពីមុន។ ឥរិយាបទនៃការដើរក្នុងរង្វង់នេះ គឺជារឿងធម្មតានៅក្នុងពពួកសត្វ។ ប៉ុន្តែ បញ្ហាសុខភាពត្រូវការការយកចិត្តទុកដាក់” ។
ដោយឡែកថ្មីៗនេះ សួនសត្វខាងលើក៏បានបញ្ចេញរូបថតសត្វខ្លា Bengal ពណ៌ស១ក្បាល លេងជាមួយបាល់នៅក្នុងអាងហែលទឹកខាងក្រៅ។ ប៉ុន្តែ គេមិនច្បាស់ថាតើវាជាសត្វខ្លានោះទេ ទោះបីជាសត្វនេះត្រូវបានគេនិយាយថា មានសុខភាពល្អក៏ដោយ៕
ប្រែសម្រួល៖ លឹម ហុង (ប្រភព៖ nextshark)
