ភ្នំពេញ៖ នាយកប្រតិបត្តិ ក្រុមហ៊ុន អាកាសយានដ្ឋានកម្ពុជា បានឲ្យដឹងថា ក្រុមហ៊ុន បន្តការរក្សាបុគ្គលិកធ្វើការ និងអនុវត្តតាមផែនការអភិវឌ្ឍន៍អាកាសយានដ្ឋានក្រុងព្រះសីហនុ ទោះបីជាមាន វិប្បត្តិជំងឺ COVID19។
លោក Alain Brun នាយកប្រតិបត្តិ ក្រុមហ៊ុន អាកាសយានដ្ឋានកម្ពុជា បានថ្លែងបែបនេះ ក្នុងជំនួបរវាង លោក ម៉ៅ ហាវណ្ណាល់ រដ្ឋមន្ត្រី ទទួលបន្ទុក រដ្ឋលេខាធិការដ្ឋានអាកាសចរស៊ីវិលទី ២៣ ខែ មេសា ឆ្នាំ ២០២០។
លោក Alain Brun នាយកប្រតិបត្តិ ក្រុមហ៊ុន អាកាសយានដ្ឋានកម្ពុជា បានបញ្ជាក់ប្រាប់រដ្ឋមន្ត្រីថា ការហោះហើរ ចាប់តាំងពីខែមករា រហូតដល់ខែមេសា ឆ្នាំ២០២០ បានធ្លាក់ចុះចំនួន៩៥% ដោយសារផលប៉ះពាល់ដោយ COVID19។
លោកបន្តថា រក្សាការអភិវឌ្ឍអាកាសយាដ្ឋានសីហនុតាមផែន ក្នុងការចូលរួមការអភិវឌ្ឍ ហេដ្ឋារចនាសម្ព័ន្ធ អាកាសយានដ្ឋាន លោក Alain Brun បានគួសបញ្ជាក់ថា ក្រុមហ៊ុននឹងបន្តស្តា និងកែលម្អហេដ្ឋារចនាសម្ព័ន្ធអាកាសយានដ្ឋាន ក្រុងព្រះសីហនុ ដដែល តាមផែនការ ដែលកំណត់ ដោយមិនគិតពីផលប៉ះពាល់ COVID19 ទេ ដោយក្នុងនោះ បានសាងសង់ផ្លូវរត់ បាន៧០% ការងារសំណង់ស៊ីវិល បាន៤២% ការងារ apron ៤៥% ជាសរុបការងារទាំងមូលបាន៥៧% ។
ដោយឡែកលោកអគ្គនាយកថា ក្រុមហ៊ុនអាកាសយានដ្ឋានកម្ពុជា នៅតែរក្សាចំនួនបុគ្គលិក ដែលមានចំនួនជិត ១៨០០ នាក់ដដែល ដោយមិនមានការកាត់បន្ថយបុគ្គលិកទេ។ ដោយគ្រាន់តែរក្សានូវបុគ្គលិកធ្វើការ តាមវិធីសាស្ត្របែងចែកការងារធ្វើការពេញម៉ោង និងបុគ្គលិកសម្រាកបណ្តោះអាសន្ន ដោយកាត់ប្រាក់ខែតែ២០% ចំពោះបុគ្គលិក ដែលមានប្រាក់ខែច្រើនជាង ៥០០ ដុល្លារ ក្នុង១ ខែ ចំពោះបុគ្គលិក ដែលមានប្រាក់ខែចំនួន៥០០ដុល្លារ ចុះក្រោមគឺរក្សានៅដដែលមិនមានការកាត់ទេ។
ឆ្លៀតក្នុងឱកាសនោះ លោក ម៉ៅ ហាវណ្ណាល់ រដ្ឋមន្ត្រីទទួលបន្ទុក រដ្ឋលេខាធិការដ្ឋានអាកាសចរណ៍ស៊ីវិលបានថ្លែងអំណរគុណ លោក Alain Brun អគ្គនាយកក្រុមហ៊ុន អាកាសយានដ្ឋានកម្ពុជា សហការល្អ ដោយបាន រៀបចំផែនការរក្សាការគ្រប់គ្រងបុគ្គលិក និងរក្សាការអភិវឌ្ឍហេដ្ឋារចនាសម្ព័ន្ធនៅដដែល ដើម្បីរក្សានូវចូលរួមស្តារ និងអភិវឌ្ឍប្រទេសកម្ពុជាក្រោយវិបត្តិCOVID19 ៕ដោយ៖សម្ផស្ស