ភ្នំពេញ៖ មន្ត្រីជាន់ខ្ពស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឲ្យដឹងថា ខេត្តព្រះសីហនុ និងក្លាយជាតំបន់សេដ្ឋកិច្ចពិសេសទាំងមូល ដើម្បីរួមចំណែកលើកកម្ពស់ការអភិវឌ្ឍវិស័យឧស្សាហកម្មកម្ពុជា។
នៅក្នុងគោលនយោបាយអភិវឌ្ឍន៍វិស័យឧស្សាហកម្ម ឆ្នាំ២០១៥ -២០២៥ របស់រាជរដ្ឋាភិបាលកម្ពុជា បានបង្ហាញថា អភិវឌ្ឍនិងប្រែក្លាយខេត្តព្រះសីហនុ ទៅជាតំបន់សេដ្ឋកិច្ចពិសេសពហុបំណង ក្នុងន័យតម្រង់ទិសទីផ្សារ និងបង្កើតលក្ខណអំណោយផល ដើម្បីជំរុញការអភិវឌ្ឍវិស័យឧស្សាកម្មកម្ពុជា។
ឯកឧត្តម ហេង សុខគង់ រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឲ្យដឹងថា តាមគោលនយោបាយឧស្សាហកម្ម ២០១៥ ២០២៥ ខេត្តព្រះសីហនុ និងក្លាយជាតំបន់សេដ្ឋកិច្ចពិសេសពហុបំណង ដែលមានតំបន់រដ្ឋបាល តំបន់សម្រាប់រៀបចំកន្លែងពាណិជ្ជកម្ម តំបន់ទេសចរ Green Tourism Zone របស់អាស៊ាន ដោយនៅខេត្តព្រះសីហនុ និងបែងចែកថា តើកន្លែងណាជាតំបន់ឧស្សាហកម្ម ជាតំបន់ទេសចរណ៍ និងជាតំបន់សង្គមរស់នៅជាដើម។
បើតាមឯកឧត្តម ហេង សុខគង់ បានឲ្យដឹងទៀតថា ខេត្តព្រះសីហនុ កំពុងរីកស្គុះស្គាយ ពិសេសហេដ្ឋារចនាសម្ព័ន ដែលស្របទៅនិង IDP របស់រាជរដ្ឋាភិបាល ក្នុងការជម្រុញអភិវឌ្ឍហ្នឹង។ ឯកឧត្តមបានបន្តថា យើងនិងធ្វើឲ្យតំបន់នោះ ជាតំបន់មួយ ដែលជាតំបន់សេដ្ឋកិច្ចពិសេសទាំងអស់ ពីមុនមកយើងជ្រើសរើសយកតំបន់មួយជាតំបន់សេដ្ឋកិច្ចពិសេស ឧទាហរណ៍ដូចជាតំបន់សេដ្ឋកិច្ចពិសេសស្ទឹងហាវ តំបន់សេដ្ឋកិច្ចពិសេសក្រុងព្រះសីហនុជាដើម តែឥឡូវអត់ទេ គឺទូទាំងខេត្តព្រះសីហនុ និងក្លាយជាតំបន់សេដ្ឋកិច្ចពិសេសទាំងអស់ នៅពេលដែលអ្នកវិនិយោគទៅដាក់ទុននៅកន្លែងណាក៏ដោយ ក៏គាត់នៅតែទទួលបាន QIP (Qualify Investment Project ពីក្រុមប្រឹក្សាអភិវឌ្ឍន៍ CDC នៅក្នុងការនាំចូលវត្ថុធាតុដើម ការនាំចូលគ្រឿងចក្រ និងគ្រឿងម៉ាស៊ីនដោយរួចពន្ធ ទាំងការសាងសង់ នេះគឺស្ថិតនៅក្នុងកម្រិតទូទាំងខេត្តទាំងអស់ ជាតំបន់សេដ្ឋកិច្ចពិសេសទាំងមូលតែម្តង។
សូមជំរាបថា ខេត្តព្រះសីហនុ នឹងប្រែក្លាយជាទីក្រុងមួយ ដែលមានលក្ខណៈជឿនលឿន មានសក្តានុពលលើវិស័យសេដ្ឋកិច្ច និងឧស្សាហកម្ម។ តំបន់សេដ្ឋកិច្ចពិសេសខេត្តព្រះសីហនុ បានបង្កើតជាសួនឧស្សាហកម្មអន្តរជាតិ ស្រូបយកសហគ្រាស ការវិនិយោគ និងមានវិនិយោគិនមកពីប្រទេសចិន ជប៉ុន បារាំង កូរ៉េខាងត្បូង និងសហភាពអឺរ៉ុបជាដើម កំពុងវិនិយោគ លើរោងចក្រវាយនភ័ណ្ឌសម្លៀកបំពាក់ រោងចក្រគ្រឿងម៉ាស៊ីន គ្រឿងអេឡិចត្រូនិក និងឧស្សាហកម្មផលិតកម្មផ្សេងៗទៀតជាច្រើន។ បច្ចុប្បន្នតំបន់សេដ្ឋកិច្ចពិសេសមួយនេះ មានសហគ្រាស កំពុងដំណើរការ និងដោះស្រាយជីវភាពការងារជូនកម្មករ កម្មការិនីបានជិត ២០ម៉ឺននាក់ ៕ដោយ៖សម្ផស្ស
