ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៤ ខែមេសា ឆ្នាំ២០២០ បានដាក់ចេញសេចក្តីណែនាំសំខាន់ៗ និងចាំបាច់បន្ទាន់មួយចំនួន ដើម្បីបង្កើន និងពង្រឹងស្មារតីយកចិត្តទុក ដាក់លើការផលិត ធានាសន្តិសុខស្បៀងឲ្យបានគ្រប់គ្រាន់ ឆ្លើយតបតាមតម្រូវការក្នុងស្រុក ក្នុងកាលៈទេសៈដែលប្រទេសជាតិ ទទួលរងនូវហានិភ័យពីកូវីដ-១៩។
សេចក្តីណែនាំសំខាន់ៗធ្វើឡើងដោយ យោងតាមអនុសាសន៍ដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីបានអំពាវនាវឲ្យ “ប្រជាពលរដ្ឋត្រូវខិតខំធ្វើការដាំដុះ ជំរុញផលិតកម្មកសិកម្មរួមមានការចិញ្ចឹមសត្វ ផលិតស្រូវ និងដំណាំ ដើម្បីបង្កើនបរិមាណផ្គត់ផ្គង់ឲ្យបានគ្រប់គ្រាន់តាមតម្រូវការក្នុងស្រុក ហើយឆ្លៀតយកឱកាសនេះត្រូវបង្កើតជាកាលានុវត្តភាពសម្រាប់វិស័យកសិកម្ម ខណ:យើងបិទការនាំចូលពីខាងក្រៅដើម្បីចូលរួមបង្ការ និងទប់ស្កាត់ការរីករាលដាលជំងឺឆ្លងសកលកូវីដ-១៩”។
ឯកឧត្តមរដ្ឋមន្ត្រី វេង សាខុន បានដឹកនាំកិច្ចប្រជុំដើម្បីប្រមូលយកធាតុចូលសំខាន់ៗដែលអង្គភាពក្រោមឱវាទបាននិងកំពុងអនុវត្ត ជាពិសេសអង្គភាពសំខាន់៣ គឺអគ្គនាយកដ្ឋានកសិកម្ម (ផលិតកម្មស្រូវ និងដំណាំ) អគ្គនាយកដ្ឋានសុខភាពសត្វ និងផលិតកម្មសត្វ (ចិញ្ចឹមសត្វ) និងរដ្ឋបាលជលផល (វារីវប្បកម្ម) រួចដាក់ចេញផែនការសកម្មភាពអនុវត្តបន្តឲ្យកាន់តែមានប្រសិទ្ធភាព និងទាន់ពេលវេលា។
កិច្ចប្រជុំនេះ មានការអញ្ជើញចូលរួមពីឯកឧត្តម លោកជំទាវរដ្ឋលេខាធិការ អនុរដ្ឋលេខាធិការ អគ្គលេខាធិការ ទីប្រឹក្សា ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋានកសិកម្ម សុខភាពសត្វ និងផលិតកម្មសត្វ រដ្ឋបាលជលផល រដ្ឋបាលព្រៃឈើ អគ្គនាយកដ្ឋានកៅស៊ូ ប្រធានមន្ទីរទូទាំង២៥ រាជធានី-ខេត្ត និងអង្គភាពគ្រប់គ្រងគម្រោង។
ដើម្បីចូលរួមទទួលខុសត្រូវក្នុងការធានាសន្តិសុខស្បៀង ក្នុងបរិបទដែលប្រទេសយើងកំពុងជួបវិបត្តិកូវីដ-១៩ ឯកឧត្តម វេង សាខុន រដ្ឋមន្ត្រីកសិកម្មបានដាក់ចេញនូវវិធានការមួយចំនួនដល់ថ្នាក់ក្រោមជាតិក្នុងនោះមាន៖
ទី១. ក្រៅពីការធ្វើប្រពលវប្បកម្មដំណាំស្រូវ ការធ្វើពិពិធកម្មដំណាំសំខាន់ៗមួយចំនួនគួរគិតផងដែរនូវការដាំបន្លែអតិផលជុំវិញផ្ទះ និងចិញ្ចឹមសត្វ ដើម្បីបង្កើនចំណូល ធានាសន្តិសុខស្បៀង បង្កើតឱកាសការងារ និងកាត់បន្ថយផលវិបាករបស់ប្រជាជនក្នុងកាលៈទេសៈនេះ។
ទី២. ប្រើប្រាស់នូវនវានុវត្តន៍នៃបច្ចេកវិទ្យាថ្មីៗ ដើម្បីឲ្យកសិករអាចគ្រប់គ្រងផលិតកម្មបាន។ ប្រើប្រាស់បច្ចេកវិទ្យាដែលប្រើប្រាស់ទឹកតិច គិតគូរអំពីហេដ្ឋារចនាសម្ព័ន្ធសម្រាប់ទ្រទ្រង់ក្រោយពេលប្រមូលផល (មានជម្រុក បច្ចេកទេសថែរក្សា និងការកែច្នៃជាដើម)។ រើសទីតាំងផលិតកម្មជិតប្រភពទឹក ដើម្បីរៀបចំឯកសារដាក់ជូន “មូលនិធិអគ្គិសនីភាវូបនីយកម្មជនបទ” ទទួលបានការអនុគ្រោះថ្លៃអគ្គិសនីសម្រាប់ការបូមទឹកនៅពេលយប់។
ទី៣. ជ្រើសរើសសហគមន៍ដែលមានសក្ដានុពល និងសមត្ថភាពគ្រប់គ្រាន់ក្នុងផលិតកម្មបន្លែក្នុងទ្រង់ទ្រាយធំ រៀបចំផែនការផលិត និងផ្គត់ផ្គង់ឲ្យស្របតាមតម្រូវការទីផ្សារ។ បង្កើតបណ្ដាញទីផ្សារដើម្បីផ្សាភ្ជាប់អ្នកទិញ និងសហគមន៍ផលិត ក្នុងទិសដៅធ្វើឲ្យមាននិរន្តរភាពនៃការផ្គត់ផ្គង់ទីផ្សារតាមរយៈការអនុវត្តផលិតកម្មកសិកម្មតាមកិច្ចសន្យា។
ទី៤. ដោះស្រាយឲ្យមានប្រសិទ្ធភាព នូវសេចក្តីត្រូវការទាំងឡាយរបស់ប្រជាពលរដ្ឋក្រីក្រ ដែលរស់នៅទីជនបទដូចជាការបណ្តុះបណ្តាលបច្ចេសកសិកម្ម ការអភិវឌ្ឍសហគមន៍ ការលើក កម្ពស់កិច្ចការដាំដុះជាលក្ខណៈគ្រួសារ ការផ្តល់គ្រាប់ពូជ ជី ការបង្កើតធនាគារស្រូវ សហគ្រាសធុនតូចផ្នែកកសិ-ឧស្សាហកម្ម និងការកែលម្អវិធីផ្សព្វផ្សាយព័ត៌មានកសិកម្មឲ្យដល់ភូមិ-ឃុំ។ លើកទឹកចិត្តកសិករ អ្នកចំណាកស្រុកដែលវិលមកកម្ពុជាវិញ និងកម្មករដែលបាត់បង់ការងារឲ្យធ្វើកសិកម្មចម្រុះ (ការចិញ្ចឹមមាន់ ត្រី និងដាំបន្លែ)។
ទី៥. ត្រូវជំរុញការធ្វើពហុវប្បកម្មដំណាំចម្រុះ ការធ្វើដំណាំឆ្លាស់ និងជំរុញដំណាំកសិ-ឧស្សាហកម្មសម្រាប់ផ្គត់ផ្គង់ ការបង្កើតសិប្បកម្មតូចៗ និងឧស្សាហកម្មនៅមូលដ្ឋានដើម្បីបង្កើនតម្លៃ បន្ថែម និងប្រាក់ចំណូល។ ជំរុញការដាំបន្លែ និងឈើហូបផ្លែដើម្បីធានាការហូបចុកក្នុងស្រុក និងជាជំហានៗឈានទៅជំនួសបន្លែនាំចូល។ ជំរុញការចិញ្ចឹមសត្វ និងវារីវប្បកម្មតាមគ្រប់រូបភាព ជាពិសេសការប្រើប្រាស់កញ្ចប់ថវិកាហិរញ្ញប្បទានពិសេស ៥០លានដុល្លាររបស់រាជរដ្ឋាភិបាលតាមរយៈធនាគារអភិវឌ្ឍន៍ជនបទ និងកសិកម្ម។
ករណីនេះ អគ្គនាយកដ្ឋានពាក់ព័ន្ធត្រូវជួយសម្របសម្រួលធ្វើយ៉ាងណាឲ្យកសិករ និងសហគមន៍កសិកម្មអាចខ្លីប្រាក់នេះបានយកមកប្រើប្រាស់ដើម្បីបង្កើនផលិតកម្មរបស់ខ្លួនកាន់តែរីកចម្រើនទ្វេរទៀត។
ទី៦. មន្ទីរកសិកម្ម រុក្ខាប្រមាញ់ និងនេសាទរាជធានី ខេត្តទាំងអស់ ត្រូវសហការឲ្យបានសកម្មក្នុងការពង្រឹងរចនាសម្ព័ន្ធសហគមន៍កសិកម្ម ភ្នាក់ងារពេទ្យសត្វភូមិ សហគមន៍ព្រៃឈើ និងសហគមន៍នេសាទ។ គ្រប់អង្គភាពត្រូវគិតគូរបន្ថែមទៀតអំពីការប្រើប្រាស់ថវិកាឲ្យបានសមស្របទៅ តាមអាទិភាពនៃសកម្មភាពដែលបានរៀបចំក្នុងផែនការថវិកាឆ្នាំ២០២០ នេះក្នុងស្មារតីសន្សំ សំចៃខ្ពស់។ ត្រូវត្រៀមរៀបចំលក្ខណៈសម្បត្តិឲ្យបានគ្រប់គ្រាន់ដើម្បីចាប់ផ្តើមការងារបង្កបង្កើនផលឆ្នាំ២០២០-២០២១ ឲ្យបានទាន់ពេលវេលា។
ទី៧. អគ្គនាយកដ្ឋានសុខភាពសត្វ និងរដ្ឋបាលជលផល ត្រូវសហការធ្វើការជាយវិស័យឯកជន ក្នុងការផលិតចំណីសត្វ ការចិញ្ចឹមសត្វ និងត្រីធានាទាំងបរិមាណ និងគុណភាពដើម្បីបង្កើនផលិតភាពផលិតកម្ម ជាពិសេសបង្កើនដៃគូរជាមួយកសិករ។
ទី៨. អង្គភាពអគ្គនាយកដ្ឋានទាំង៣ រួមទាំងមន្ទីរទាំង២៥ រាជធានី-ខេត្ត ត្រូវសហការទប់ស្កាត់ការនាំចូល កសិផលខុសច្បាប់ ដើម្បីការពារតម្លៃកសិផលក្នុងស្រុក និងបើកឱកាសឲ្យផលិតករក្នុងស្រុក៕ដោយ៖សម្ផស្ស