ឆ្នាំជូត
រាសីល្អជាមធ្យម។
ការងារ ៖ នៅពេលនេះមិនទាន់ហុចផ្លែផ្កានៅឡើយ ម្ល៉ោះហើយទាល់តែខិតខំខ្លាំងបន្តិចទើបសម្រេចជោគជ័យទៅរួច ។
ជំនួញ ៖ បើចង់ពង្រីកមុខរបររកស៊ីជួញដូរគឺពុំសូវទទួលផលប្រយោជន៍អ្វីឡើយគឺបានត្រឹមមួយបង់កម្លាំងច្រើនជាង។ការធ្វើដំណើរឆ្ងាយជិតជួបភាពសុខដុមដូចសព្វមួយដង។
ស្នេហា ៖ បើលោកអ្នកមានជម្លោះវិវាទ ហើយចង់ធ្វើការដោះស្រាយទាល់តែខិតខំព្យាយាមទើបអាចមានភាពផ្អែមល្ហែមដូចដើមវិញ៕
ឆ្នាំឆ្លូវ
រាសីស្រុតចុះ។
ការងារ ៖ នៅថ្ងៃនេះដំណើរជីវិតរបស់លោកអ្នក ល្អប្រសើរ ដូចនេះបើចង់ធ្វើអ្វីក៏ដោយតោងតែចេះមើលមុខក្រោយទើបមិនកើតបញ្ហាអាក្រក់ណាមួយត្រូវពិបាកក្នុងការរែកពន់។ ក្រៅពីនេះបើមានកិច្ចការអ្វីតោងតែចេះទប់ទល់ឱ្យបានល្អ និង មិនត្រូវព្រងើយកន្តើយឡើយបើពុំនោះទេបញ្ហាមួយចំនួននឹងកាន់តែធ្លាក់ជាប់ផុងបន្ថែមទៀតជាក់ជាពុំខាន។
ជំនួញ ៖ ជួបផលលំបាកក្នុងការរកចំណូល ហើយការជួញជិតឆ្ងាយទៀតសោតជួបតែភាពរកាំរកូសនិងក្រុមបាបមិត្តតាមឈ្នានីសព្យាបាទយាយីដូចនេះគប្បីមានការប្រយ័ត្នប្រយែង។
ស្នេហា ៖ បើចង់ធ្វើការជ្រើសរើសគូស្រករពុំសូវល្អទេ ព្រោះច្រើនជួបគូកម្មច្រើនជាងគូព្រេង៕
ឆ្នាំខាល
រាសីខ្ពស់ត្រដែត។
ការងារ ៖ នៅថ្ងៃនេះបើលោកអ្នកចង់ធ្វើអ្វីមួយដែលបានត្រៀមរួចរាល់តែងជោគជ័យដូចគាប់បំណងផង។ការប្រកបការងារសព្វបែបយ៉ាងបើទោះបីជួបការលំបាកលំបិននិងត្រូវការពេលវេលាក្តីតែក៏អាចទទួលលទ្ធផលល្អៗជានិច្ច។
ជំនួញ ៖ បើលោកអ្នកចង់បើករបររកស៊ីថ្មីឬផ្លាស់ទីកន្លែងរកស៊ីជួញដូរតែងផ្តល់ផលល្អៗមកវិញជានិច្ច ។
ស្នេហា ៖ បើមានណាត់គូស្នេហាឬសាសងអ្វីមួយតែងមានភាពផ្អែមល្ហែមនិងស្រស់ស្រាយប្រពៃ៕
ឆ្នាំថោះ
រាសីខ្ពស់ត្រដែត។
ការងារ ៖ នៅថ្ងៃនេះផ្តល់ផលល្អសម្រាប់លោកអ្នកទំនាក់ទំនងការងារ ឬចុះធ្វើអ្វីមួយតែងសម្រេចជោគជ័យដូចគាប់បំណងមួយចំនួនត្រឡប់មកវិញ។
ជំនួញ ៖ ការជួញដូរនៅថ្ងៃនេះវិញមិនថាទីឆ្ងាយជិតតែងទទួលជោគជ័យដោយកើបផលចំណេញត្រឡប់មកផ្ទះមួយចំនួនវិញថែមទៀត។
ស្នេហា ៖ មានភាពសុខដុមនិងផ្អែមល្ហែមល្អប្រៀបដូចត្រីនឹងទឹកនារដូវខែវស្សាអញ្ចឹងដែរ៕
ឆ្នាំរោង
រាសីស្រុតចុះ។
ការងារ ៖ នៅថ្ងៃនេះលោកអ្នកធ្វើអ្វីតែងទទួលរងផលប៉ះពាល់ និងជួបនូវបញ្ហាលំបាកត្រូវឆ្លងកាត់ផងដែរ។ បើមានការសម្រេចចិត្តរឿងសំខាន់ឬជួបចរចាពីរឿងអ្វីមួយតែងភ្លាត់ឱកាសមិនសម្រេចដូចគាប់បំណងនោះឡើយ។
ជំនួញ ៖ លោកអ្នកជួបរឿងខ្វាយខ្វល់ព្រោះតែការធ្វើជំនួញទីជិតឆ្ងាយមិនសមដូចប្រកបទេព្រោះតែងអង្គុយស្ងាបច្រើនជាង។
ស្នេហា ៖ មានការប្រែប្រូលប្តូរផ្លាស់ព្រោះជួនផ្អែមល្ហែម ជួនពាក់មុខខ្លាដាក់គ្នា៕
ឆ្នាំម្សាញ់
រាសីល្អជាមធ្យម។
ការងារ ៖ មានក្រុមមនុស្សតាមឈ្នានីសនិងព្យាបាទខ្លះយាយី ម្ល៉ោះហើយត្រូវរក្សាភាពស្ងប់ស្ងាត់ ហើយការពារអាត្មាខ្លួនទើបអាចចៀសផុតរាល់ជម្លោះវិវាទឬរឿងរាវអាក្រក់ណាមួយកើតឡើងក្នុងការងារ។
ជំនួញ ៖ ទោះជួញទីជិតឆ្ងាយការរកផលកម្រៃមានភាពធូរស្បើយជាងមុន ដោយលោកអ្នកអាចរកប្រាក់ចំណូលគ្រាន់ចិញ្ចឹមឆ្នាំងបាយ។
ស្នេហា ៖ មានភាពស្រស់ស្រាយព្រោះតែម្នាក់ៗ មានការយកចិត្តទុកដាក់ចំពោះគ្នាគ្រាន់បើជាងមុន៕
ឆ្នាំមមី
រាសីខ្ពស់ត្រដែត។
ការងារ ៖ នៅថ្ងៃនេះបើមានបញ្ហាអ្វីលោកអ្នកប្រើបញ្ញាតែងអាចរកច្រកចេញជានិច្ច។
ជំនួញ ៖ ទោះទីជិតឆ្ងាយមានភាពសុខដុមល្អតែទោះធ្វើអ្វីៗលោកអ្នកតោងតែចេះបែងចែកល្អអាក្រក់ឱ្យបានត្រឹមត្រូវទើបគ្មានរឿងរាវចម្រូងចម្រាសជាមួយអ្នកដទៃ។ការរស់នៅលោកអ្នកគប្បីប្រយ័ត្នការជួយយកអាសាគេព្រោះច្រើនយកគុណប្តូរទោសមកវិញប៉ុណ្ណោះ។
ស្នេហា ៖ មានភាពភ្លឺថ្លានិងចេះអត់ឱនឱ្យគ្នាល្អប្រពៃ៕
ឆ្នាំមមែ
រាសីស្រុតចុះ។
ការងារ ៖ នៅថ្ងៃនេះដំណើរជីវិតរបស់លោកអ្នកស្ថិតនៅលើកំណាត់ផ្លូវរដិបរដុបច្រើនពិសេសងាយកើតបញ្ហាទំនាស់ជាមួយអ្នកដទៃថែមទៀត។ការរស់នៅលោកអ្នកងាយមានរឿងជម្លោះវិវាទផងចូរចេះរំងាប់ចិត្តដោយមិនត្រូវយកកំហឹងទល់កំហល់ឡើយនៅពេលមានបញ្ហាអ្វីមួយកើតឡើងបើពុំនោះទេនឹងនាំយករឿងរាវក្តៅក្រហាយដាក់ខ្លួនចៀសពុំរួចឡើយ។
ជំនួញ ៖ ជួបស្ថានភាពលំបាកក្នុងការរកផលចំណូលបន្តិចតែយ៉ាងណាក៏នៅមានហូរចូលតក់ៗគ្រាន់ចិញ្ចឹមឆ្នាំងបាយអញ្ចឹងដែរ។
ស្នេហា ៖ កុំគប្បីឈ្លក់វង្វេងក្នុងរឿងស្នេហាច្រើនពេក ហើយត្រូវរកពេលវេលានេះបំពេញការងារវិញទើបជាការប្រពៃជាង៕
ឆ្នាំវក
រាសីល្អជាមធ្យម។
ការងារ ៖ មានក្រុមមនុស្សជួយជ្រោមជ្រែងក្នុងរឿងអ្វីមួយ ។
ជំនួញ ៖ មានការទិញចូលលក់ចេញគ្រាន់បើបន្តិចវិញឯផលកម្រៃក៏ច្រើនគ្រាន់ល្មមគួរជាទីពេញចិត្តដែរ។ ការធ្វើដំណើរទីជិតឆ្ងាយជួបសេចក្តីសុខក្សេមក្សាន្តដូចសព្វមួយដង។
ស្នេហា ៖ មានភាពស្រុះស្រួលនិងផ្អែមល្ហែមគាប់ប្រសើរគួរសម៕
ឆ្នាំរកា
រាសីខ្ពស់ត្រដែត។
ការងារ ៖ នៅថ្ងៃនេះលោកអ្នកអាចមានរឿងឱ្យសប្បាយចិត្តនិងបញ្ហាតូចធំដែលបម្រុងរត់ចូលអាចរត់ចេញថែមទៀត។
ជំនួញ ៖ បើចង់ធ្វើជំនួញទីជិតឆ្ងាយមិនថ្វីទេពីព្រោះថាផលល្អៗនោះតែងហុចមកវិញគ្រាន់ជាទីពេញចិត្ត។ការធ្វើដំណើរឆ្ងាយជិតជួបភាពសុខដុមដូចសព្វមួយដង។
ស្នេហា ៖ បើចង់ចរចាបញ្ហាស្នេហាថ្មីថ្មោងតែងទទួលផ្លែផ្កានិងផ្តល់ផលល្អៗមកវិញជានិច្ច៕
ឆ្នាំច
រាសីខ្ពស់ត្រដែត។
ការងារ ៖ នៅថ្ងៃនេះដួងរាសីរបស់លោកអ្នក ល្អប្រសើរ ហើយបើទោះបីធ្វើអ្វីឃើញថាជឿនលឿនទៅមុខនិងមានជោគមានជ័យគ្រាន់គាប់ប្រសើរ។
ជំនួញ ៖ ដោយសារដួងរាសីឡើងខ្ពស់ ដូចនេះបើលោកអ្នកចង់ធ្វើអ្វីក៏តែងផ្តល់ផ្លែផ្កាជាផលកម្រៃនិងមានជោគមានជ័យច្រើន។ ការធ្វើដំណើរឆ្ងាយជិតជួបភាពសុខដុមដូចសព្វមួយដង។
ស្នេហា ៖ បើលោកអ្នកចង់ទំនាក់ទំនងស្នេហាថ្មីថ្មោងតែងមានក្តីសង្ឃឺមគួរជាទីរីករាយ៕
ឆ្នាំកុរ
រាសីល្អជាមធ្យម។
ការងារ ៖ នៅថ្ងៃនេះលោកអ្នកតែងកើតអារម្មណ៍តានតឹងព្រោះតែបញ្ហាយាយីច្រើនពិសេសការប្រកបការងារក៏តែងមិនសូវឆ្លើយតបដូចការរំពឹងទុកនោះដែរ។
ជំនួញ ៖ កុំសំលឹងលាភធំដុំភ្លេចលាភតូចតាច ព្រោះចំណូលភាគច្រើនបានតែតូចតាចប៉ុណ្ណោះ។ ការធ្វើដំណើរឆ្ងាយជិតជួបភាពប្រទាំងប្រទើសនិងរឿងរាវយាយីច្រើនបន្តិច។
ស្នេហា ៖ ជួបភាពរកាំរកូសនិងពាក់មុខយក្សដាក់គ្នាឥតសូវត្រូវគ្នា ប៉ុន្មាននោះឡើយ៕