ស្ទឹងត្រែង៖ កម្លាំងចម្រុះចុះឃាត់ ខ្លួនលោកឧត្តម សេនីយ៍ទោផ្កាយពីរម្នាក់ ពាក់ព័ន្ធរឿងដ៏ធ្លី នៅត្រង់ចំណុចភូមិស្រឡៅ ឃុំអន្លង់ជ្រៃ ស្រុកថាឡាបរិវ៉ាត់ ខេត្តស្ទឹងត្រែង កាលពីល្ងាចថ្ងៃទី២៤ ខែមេសាឆ្នាំ២០២០។
សមត្ថកិច្ចបានឲ្យដឹងថា ប្រតិបត្តិការនេះ ធ្វើឡើងក្រោយទទួលបានបញ្ជាផ្ទាល់ លោកម៉ុម សារឿន អភិបាលខេត្ត ដោយមូលហេតុឃាត់ខ្លួនលោកចាន់ សំអាត ផ្កាយពីរ គឺជាយោធាមួយរូប ដោយសារតែមានការជាប់ពាក់ព័ន្ធករណីធ្លីទ្រង់ទ្រាយធំ ហើយក៏មាន ការចុះដកហូតយកគ្រឿងចក្រឈូសឆាយដីព្រៃផងដែរ។
សមត្ថកិច្ចដកហូតយកបានវត្ថុតាងរួមមាន៖ ទី១ អេស្កាវ៉ាទ័រចំនួន១គ្រឿងម៉ាក់ ខេត (CAT .04) , ទី២ ត្រាក់ទ័រចំនួន១គ្រឿង (Belarus80)របស់សូវៀត , ទី៣ ប៊ុលធុនតូចចំនួន១គ្រឿង ។
បន្ទាប់មកក្រុមការងារបានសាកសួរព័ត៌មាន ពីម្ចាស់ទីតាងខាងលើ គាត់បានបំភ្លឺថា ក្បាលដីទទឹង៣០០ម៉ែត្រ បណ្តោយ១៦០០ម៉ែត្រ ហើយមានលិខិតកាន់កាប់ដីរបស់គាត់ទទួលស្គាល់ដោយអាជ្ញាធរឃុំអន្លង់ជ្រៃ មានផ្ទៃដីទំហំ៤៨ហិកតា។
កំណុតហេតុរបស់សមត្ថកិច្ចបានបញ្ជាក់ថា បន្ទាប់ពីបានស្តាប់ការបំភ្លឺរបស់គាត់រួចមក ក្រុមការងារបានសម្រេចចុះធ្វើការត្រួតពិនិត្យ ទៅលើទីតាំងឈូសឆាយដីជាក់ស្តែង ឃើញមានព្រៃដីឈូសឆាយរួចរាល់ ប្រមាណជា៣៦ហិកតា និងផ្ទៃដីព្រៃ មិនទាន់បានកាប់រាន និងឈូសឆាយមានចំនួនប្រមាណជា៣២ហិកតាទៀត។
គ្រឿងចក្រប្រព្រឹត្តបទល្មើសខាងលើ ត្រូវបានរក្សាទុកនៅទីតាំងកើតហេតុ ដោយមានកម្លាំងអធិការដ្ឋានស្រុកថាឡាបរិវ៉ាត់ និងប៉ុស្តិ៍រដ្ឋបាលឃុំអន្លង់ជ្រៃ ទទួលថែរក្សាជាបណ្តោះអាសន្ន។ ចំណែកម្ចាស់ដី ដែលមានតួនាទីជាយោធាឧត្តមសេនីយ៍ទោ ត្រូវបាននាំខ្លួន មកកាន់ស្នងការដ្ឋាននគរបាលខេត្តស្ទឹងត្រែង ដើម្បីធ្វើការសួរនាំ រួចកសាងសំណុំរឿងបន្តនៅតាមនីតិវិធីនៃច្បាប់ ៕ ដោយ ៖ សុខុម