ខេត្តស្វាយរៀងៈ កម្លាំងសមត្ថកិច្ច នៃអធិការដ្ឋាននគរបាលស្រុកចន្ទ្រា សហការជាមួយកម្លាំងជំនាញព្រហ្មទណ្ឌកម្រិតស្រាល នៃស្នងការដ្ឋាននគរបាលខេត្តស្វាយរៀង ធ្វើការឃាត់ខ្លួន កាលពីវេលាម៉ោង១៥និង១៥ នាទីរសៀលនៅថ្ងៃទី២៤ ខែមេសា ឆ្នាំ២០២០ បានហៅជនសង្ស័យ២ នាក់ មកធ្វើការសាកសួរ នៅប៉ុស្តិ៍នគរបាលរដ្ឋបាលច្រេស ដែលមានការសង្ស័យថា ពាក់ព័ន្ធករណី ហឹង្សាចេតនាលើអ្នកដទៃ នៅចំណុចភូមិធំ ឃុំត្នោត ស្រុកកំពង់រោទិ៍ ខេត្តស្វាយរៀង កាលពីថ្ងៃទី ២៤ ខែមេសា ឆ្នាំ២០២០ វេលាម៉ោង ២៤និង៣៥ នាទីយប់ ។
សមត្ថកិច្ចបានឱ្យដឹងថា បន្ទាប់ពីធ្វើការសាកសួររួចមក ពុំមានពាក់ព័ន្ធករណីព្រហ្មទណ្ឌ កម្លាំងជំនាញ នៃអធិការដ្ឋាននគរបាលស្រុក បានធ្វើតេស្តរកសារធាតុញៀន លើជនសង្ស័យខាងលើ មាន ឈ្មោះ ហោ ផាត ភេទ ប្រុស អាយុ ១៧ ឆ្នាំ ជនជាតិខ្មែរ មុខរបរ សិស្ស មានទីលំនៅភូមិ ត្រពាំងរុន ឃុំច្រេស ស្រុកចន្ទ្រា ខេត្តស្វាយរៀង ជាលទ្ធផល វិជ្ជមាន និងឈ្មោះ ពក ភត្រា ភេទ ប្រុស អាយុ ២៤ ឆ្នាំ ជនជាតិខ្មែរ មុខរបរ កម្មកររោងចក្រ មានទីលំនៅភូមិ ត្រពាំងរុន ឃុំច្រេស ស្រុកចន្ទ្រា ខេត្តស្វាយរៀង ជាលទ្ធផល វិជ្ជមាន ។ វត្ថុតាងដកហូតរួមមាន ទូរស័ព្ទដៃ ០១ គ្រឿង។
បច្ចុប្បន្នជនសង្ស័យបានឃាត់ខ្លួន នៅអធិការដ្ឋាននគរបាលស្រុកចន្ទ្រា ដើម្បីបំពេញសំណុំរឿង បញ្ជូនទៅការិយាល័យជំនាញ ចាត់ការតាមនីតិវិធី៕ដោយ៖ វ៉ៃកូ