ភ្នំពេញ៖ សមាគមគ្រឹះស្ថានឧត្តមសិក្សា ដែលមានគ្រឹះស្ថានសិក្សាចំនួន១១៣ជាសមាជិក បានអំពាវនាវ និងស្នើសុំដល់អាណាព្យាបាលរបស់សិស្សដែលកំពុងជួបវិបត្តិហិរញ្ញវត្ថុ ដាក់ពាក្យស្នើសុំទៅសាលាដោយផ្ទាល់ ដើម្បីទទួលបានការបញ្ចុះតម្លៃ។
បើយោងតាមសេចក្តីអំពាវនាវ របស់សមាគមគ្រឹះស្ថានឧត្តមសិក្សា ស្តីពីការដាក់ពាក្យសុំបញ្ចុះតម្លៃសិក្សា របស់មាតាបិតាឬអាណាព្យាបាលសិស្សានុសិស្ស ដែលកំពុងទទួលរងផលប៉ះពាល់ដោយសារជំងឺកូវីដ១៩ ដែលចេញផ្សាយនៅថ្ងៃទី២៤ ខែមេសា ឆ្នាំ២០២០នេះ បានឲ្យដឹងថា ស្ថានភាពនៃវីរុសកូវីដ១៩ បាននិងកំពុងតែរាតត្បាត បានធ្វើឱ្យស្ទើរគ្រប់វិស័យ ក្នុងប្រទេសកម្ពុជា ក្នុងនោះ គ្រឹះស្ថានសិក្សាអប់រំទាំងអស់ទូទាំងប្រទេសកម្ពុជា ត្រូវបានផ្អាកសេវាអប់រំតាំងពីថ្ងៃទី១៤ ខែមីនា ឆ្នាំ២០២០ រហូតមក។ ក្នុងរយៈពេលផ្អាកការបណ្ដុះបណ្ដាលនេះ គ្រឹះស្ថានសិក្សាចំនួន១១៣ ដែលជាសមាជិករបស់សមាគម បានជួបប្រទះនូវការលំបាក និងផលប៉ះពាល់យ៉ាងខ្លាំង ដូចជាត្រូវបន្តការបើកប្រាក់បៀវត្សរ៍ដល់គ្រូនិងបុគ្គលិក បន្តបង់ឈ្នួលអគារ និងបន្តបង់ការប្រាក់ និងប្រាក់ដើមធនាគារ ព្រមទាំងការចំណាយជាច្រើនផ្សេងៗទៀតដដែល។ ម្យ៉ាងវិញទៀត សមាជិកសមាគម ក៏កំពុងរងនូវផលលំបាកដ៏ធ្ងន់ធ្ងរបន្ថែមទៀត ដូចជា ការធ្លាក់ចុះបរិមាណសិស្ស ការបន្ថយថ្លៃដោយសមាជិក សមាគមដោយខ្លួនឯង និងការស្នើសុំបញ្ចុះថ្លៃដោយមាតាបិតា និងអ្នកអាណាព្យាបាលសិស្សបន្ថែមទៀត។ ការស្នើសុំបញ្ចុះថ្លៃនោះ សមាជិកសមាគមភាគច្រើន បានដោះស្រាយការសុំបញ្ចុះថ្លៃ ដោយករណីដោយឡែកៗ និងទល់មុខគ្នា។ លទ្ធផលបានមក គឺវិជ្ជមាន តាមវិធីឈ្នះឈ្នះ ដែលអាចទទួលយកបានទាំងអស់គ្នា។
នៅព្រឹកថ្ងៃទី២២ ខែមេសា ឆ្នាំ២០២០កន្លងមក សមាគម ក៏បានសង្កេតឃើញផងដែរ មានការផ្តុំគ្នាតវ៉ាសុំបញ្ចុះថ្លៃពីសំណាក់មាតាបិតា និងអ្នកអាណាព្យាបាលសិស្ស នៅសាលាអន្តរជាតិ ស៊ីអាយអេហ្វីសត៍ និងសាលាអន្តរជាតិផារ៉ាហ្គន ។ នៅក្នុងរដូវកាលកូវីដរាតត្បាតនេះ ពិតជាធ្វើឲ្យលំបាកដល់ជីវភាព មាតាបិតា និងអ្នកអាណាព្យាបាលសិស្ស ក៏ពិតមែន តែកូវីដនេះ ក៏ធ្វើឲ្យខ្ទេចខ្ទាំដល់គ្រឹះស្ថានសិក្សាអប់រំឯកជន ដូចដែលបានរៀបរាប់គោរពជូនខាងលើផងដែរ។ ទន្ទឹមនឹងការតវ៉ានេះ ម្ចាស់គ្រឹះស្ថានសិក្សាអប់រំឯកជន ក៏បានចេញសេចក្តីជូនដំណឹងស្តីពីការសម្របសម្រួលដល់ជីវភាពមាតាបិតា និងអ្នកអាណាព្យាបាលសិស្សបន្តបន្ទាប់រួចហើយដែរ។
ឆ្លៀតក្នុងឱកាសនេះដែរ សមាគមគ្រឹះស្ថានឧត្តមសិក្សាកម្ពុជា សូមអំពាវនាវដល់មាតាបិតា ឬអ្នកអាណាព្យាបាលសិស្សទាំងអស់ ដើម្បីចៀសវាងជំងឺរាតត្បាតកូវីដ១៩ ដោយផ្តុំគ្នា ដើម្បីបុត្រាបត្រីជាទីស្រឡាញ់ និងគ្រឹះស្ថានសិក្សាអប់រំឯកជន ដែលកូនចៅលោកអ្នកកំពុងតែសិក្សា និងដើម្បីសង្គមជាតិដ៏ល្អចៀសផុតពីជំងឺរាតត្បាតកូវីដ១៩ សូមមាតាបិតា ឬអ្នកអាណាព្យាបាលសិស្ស ដែលកំពុងជួបការលំបាក មេត្តាដាក់ពាក្យសុំបញ្ចុះតម្លៃ ដោយជម្រាបពីវិបត្តិហិរញ្ញវត្ថុរៀងៗខ្លួន ដែលបណ្ដាលមកពីជំងឺរាតត្បាតកូវីដ១៩ ជូនដល់ម្ចាស់ ឬគណៈគ្រប់គ្រងគ្រឹះស្ថានសិក្សាអប់រំឯកជននីមួយៗ ដើម្បីជួយដោះស្រាយ និងបន្ធូរបន្ថយជូនឱ្យអស់ពីលទ្ធភាព។
សមាគមគ្រឹះស្ថានឧត្តមសិក្សាកម្ពុជា បានបង្ហាញការជឿជាក់យ៉ាងមុតមាំថា មាតាបិតា ឬអាណាព្យាបាលសិស្ស នឹងចូលរួមដោះស្រាយដោយធ្វើសម្បទានគ្នាទៅវិញទៅមក និងដោយភាពអត់ធ្មត់បំផុត តាមវិធីឈ្នះៗទាំងអស់គ្នា ដើម្បីឆ្លងផុតដំណាក់កាលលំបាកនេះជាក់ជាពុំខានឡើយ។
នៅព្រឹកថ្ងៃទី ២២ និង២៤ ខែ មេសា ឆ្នាំ ២០២០ មាតាបិតា ឬអាណាព្យាបាលសិស្សានុសិស្ស រៀននៅសាលា CIA ច្រើនរយនាក់ បានប្រមូលផ្ដុំគ្នាតវ៉ានៅមុខសាលាដែលមានទីតាំងស្ថិតនៅ ផ្លូវ ២០០៤ សង្កាត់ទឹកថ្លា ខណ្ឌ សែនសែន ។
គោលបំណងតវ៉ារបស់ អាណាព្យាបាលសិស្សគឺសុំសាលាបញ្ចុះតម្លៃថ្លៃសិក្សាតាមអនឡាញ ត្រឹម ៥០% ដោយសារតែពួកគាត់មានការលំបាក ក្នុងការប្រកបមុខរបរក្នុងកាលៈទេសៈស្រុកទេស ជួបនញ្ហាជំងឺរាតត្បាត កូវីដ ១៩ ។ ប៉ុន្តែខាងសាលាបានយល់ព្រមបញ្ចុះតម្លៃ ២៥% សម្រាប់ថ្នាក់មត្តេយ្យ និង ១៥% សម្រាប់ថ្នាក់ G1-12 ។
អាណាព្យាបាលបានលើកបដាដែលសរសេរមានខ្លឹមសារថា ពហិកាមិនរៀនតាម អនឡាញ បើបង់ ១០០% ។ រហូតមកដល់ថ្ងៃនេះមិនទាន់មានដំណោះស្រាយព្រមព្រៀងគ្នានៅឡើយទេ៕ដោយ៖កូឡាប