ប្រទេសចិនបានបញ្ជូនមនុស្សមួយក្រុម រួមមានអ្នកជំនាញវេជ្ជាសាស្ត្រទៅកាន់ប្រទេសកូរ៉េខាងជើង ដើម្បីណែនាំដល់លោក គីម ជុងអ៊ុន។ នេះបើតាមមនុស្ស ៣នាក់ដែលដឹងច្បាស់ពីស្ថានភាពរបស់កូរ៉េខាងជើង។
ការធ្វើដំណើររបស់វេជ្ជបណ្ឌិត និងមន្ត្រីចិនទៅកាន់ប្រទេសកូរ៉េខាងជើង កើតឡើងចំពេលដែលមានសេចក្តីរាយការណ៍ ពីស្ថានភាពសុខភាព របស់មេដឹកនាំកូរ៉េខាងជើង គីម ជុងអ៊ុន។
គណៈប្រតិភូចិនដែលដឹកនាំដោយមន្ត្រីជាន់ខ្ពស់ នៃនៃនាយករដ្ឋានអន្តរជាតិ Liaison នៃបក្សកុមុ្មនិស្តចិន បានចាកចេញពីទីក្រុងប៉េកាំងនៅថ្ងៃព្រហស្បតិ៍។ នាយករដ្ឋាននោះគឺជាស្ថាប័ន្ធដ៏សំខាន់របស់ចិន ក្នុងការទំនាក់ទំនងជាមួយនឹងកូរ៉េខាងជើង។
សារពត៌មានកូរ៉េខាងជើង Daily NK ដែលមានមូលដ្ឋាននៅទីក្រុងសេអ៊ូល បានធ្វើការរាយការណ៍នៅដើមសប្តាហ៍នេះថា លោក គីម ជុងអ៊ុមបានជាសះស្បើយវិញ បន្ទាប់ពីឆ្លងកាត់ការវះកាត់សរសៃឈាមបេះដូងនៅថ្ងៃទី ១២ ខែមេសា។
រដ្ឋាភិបាលកូរ៉េខាងត្បូង និងមន្ត្រីចិននៃនាយករដ្ឋានអន្តរជាតិបានធ្វើការជំទាស់ ទៅនឹងសេចក្តីរាយការណ៍ដែលថា លោក គីម ជុងអ៊ុនកំពុងស្ថិតក្នុងស្ថានភាពគ្រោះថ្នាក់ បន្ទាប់ពីធ្វើការវះកាត់រួច។ មន្ត្រីកូរ៉េខាងជើងបាននិយាយថា ពួកគេមិនឃើញមានសញ្ញាអ្វីខុសប្លែកពីធម្មតាឡើងនៅកូរ៉េខាងជើង។
កាលពីថ្ងៃព្រហស្បតិ៍កន្លងទៅនេះ ប្រធានាធិបតីអាមេរិច ដូណាល់ ត្រាំ មិនចាប់អារម្មណ៍នឹងការរាយការណ៍ថាលោក គីម ជុងអ៊ុនឈឺធ្ងន់ឡើយ។ លោកលើកឡើងថា “ខ្ញុំគិតថា សេចក្តីរាយការណ៍នោះគឺមិនត្រឹមត្រូវ” ប៉ុន្តែគាត់បដិសេធមិននិយាយថាតើគាត់បានទំនាក់ទំនងជាមួយនឹងលោក គីម ជុងអ៊ុនឬអត់នោះទេ។
កាលពីថ្ងៃសុក្រម្សិលមិញ ប្រភពមួយរបស់កូរ៉េខាងត្បូងបានថ្លែងប្រាប់សារព័ត៌មាន Reuters ថាការស៊ើបការបានប្រាប់ថា លោក គីម ជុងអ៊ុនគឺនៅមានជីវិតនៅឡើយទេ ហើយគាត់ទំនងជានឹងលេចមុខក្នុងពេលឆាប់ៗនេះ។
សូមបញ្ជាក់ថា កូរ៉េខាងជើងគឺជាប្រទេសដែលឯកោរ និងមានការសម្ងាត់ជាងគេក្នុងលោក ហើយស្ថានភាពសុខភាពរបស់មេដឹកនាំនៃប្រទេសនេះត្រូវបានគេចាត់ទុកថា ជាបញ្ហាសន្តិសុខរដ្ឋ៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia