នាវិកយ៉ាងតិច ១៨នាក់នៅលើនាវាពិឃាតអាមេរិច ត្រូវបានគេធ្វើតេស្តរកឃើញមានផ្ទុកវីរុសកូរ៉ូណា ដែលនេះជាការផ្ទុះវីរុសលើកទី ២នៅសមុទ្រ នៅលើនាវាជើងទឹករបស់អាមេរិច។
មន្ទីរបញ្ចាកោណអាមេរិចបាននិយាយថា នឹងមានករណីបន្ថែមទៀត នៅលើនាវាពិឃាត USS Kidd។ នាវាពិឃាតអាមេរិច កំពុងតែស្ថិតនៅលើសមុទ្រក្បែរអាមេរិចខាងត្បូង។
មេបញ្ជាការលើនាវា កំពុងរៀបចំឲ្យនាវាធ្វើការត្រឡប់ទៅកាន់កំពង់ផែវិញ ដើម្បីយកបុគ្គលិកចេញ និងចាប់ផ្តើមធ្វើការលាងសម្អាតនាវា មុនពេលវាត្រឡប់ទៅកាន់សមុទ្រវិញ។ នេះជាការបញ្ជាក់របស់អ្នកនាំពាក្យមន្ទីរបញ្ចកោណអាមេរិចឈ្មោះ Jonathan Hoffman នៅថ្ងៃសុក្រ។
នាវាពិឃាត USS Kidd គឺជានាវាអាមេរិចទី ២នៅសមុទ្រ ដែលត្រូវបានគេបង្ខំឲ្យធ្វើដំណើរទៅកាន់កំពង់ផែ ដោយសារតែមានការផ្ទុះវីរុសកូរ៉ូណា ដោយការផ្ទុះលើកទី១ គឺនៅលើនាវាផ្ទុកយន្តហោះ USS Theodore Roosevelt។
សូមបញ្ជាក់ថា រហូតមកដល់ពេលនេះ សហរដ្ឋអាមេរិច មានអ្នកស្លាប់ដោយសារវីរុសកូរ៉ូណាជាង ៥០.០០០នាក់ និងមានអ្នកឆ្លងសរុបជិត ៩០០.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Xinhua