ថៃ៖ ការរាតត្បាតនៃវីរុស Covid-19 បាននិងកំពុងធ្វើឲ្យជីវិតមនុស្សយ៉ាងច្រើននៅជុំវិញពិភពលោក រងផលប៉ះពាល់ ខណៈមកទល់ពេលនេះ នៅតែមិនទាន់បង្ហាញសញ្ញាណាមួយធ្លាក់ចុះ ។ ពុំត្រឹមតែមនុស្សទេ សូម្បីតែជីវិតសត្វក៏រងផលប៉ះពាល់ផងដែរ ព្រោះតែកង្វះចំណីអាហារសម្រាប់ពួកវា ។ រឿងនេះត្រូវបានគេរាយការណ៍ថា គឺដោយសារតែបទបញ្ជាគ្រប់គ្រងការដើរហើរចេញចូលប្រទេស ។
នៅក្នុងប្រទេសថៃ សត្វដែលទទួលរងផលប៉ះពាល់ភាគច្រើនដោយសារតែវិបត្តិជំងឺកូវីដ១៩ នេះ គឺជាដំរី ។ យោងតាម Mongabay ចាប់តាំងពីមានការបង្កកទេសចរណ៍នៅក្នុងប្រទេសថៃ នោះយ៉ាងហោចណាស់ ជំរុំសត្វដំរី ៨៥ កន្លែង នៅភាគខាងជើងនៃប្រទេសថៃ ត្រូវបានបិទ ហើយបុគ្គលិកចំនួន ៥០០០ នាក់ ក៏ត្រូវបានបញ្ឈប់ការងារផងដែរ ។
នៅពេលដែលប្រទេសថៃ បិទព្រំដែនរបស់ខ្លួន កាលពីចុងខែមីនា ដោយសារការរាតត្បាតនៃវីរុស Covid-19 ការជិះដំរីដែលគ្មានសិលធម៌ខ្ពស់ត្រូវបានបិទ។ ដំបូង មនុស្សគ្រប់គ្នាសប្បាយចិត្តនៅពេលសត្វដំរីលែងត្រូវបានបង្ខំឱ្យធ្វើការ ប៉ុន្តែនេះក៏មានន័យថា មិនមានប្រាក់ចំណូល ដែលម្ចាស់ជំរុំមិនអាចមានលទ្ធភាពចិញ្ចឹមដំរីរបស់ពួកគេបានតទៅទៀត។
លោក Jan Schmidt-Burbach ប្រធានស្រាវជ្រាវសត្វព្រៃ និងសុខុមាលភាពសត្វ នៅអង្គការការពារសត្វពិភពលោក (WAP) បានប្រាប់ Mongabay ថា សត្វដំរីជាច្រើនក្បាលក៏ត្រូវបានបញ្ជូនត្រឡប់ទៅម្ចាស់ជនបទរបស់ពួកវាវិញ ហេតុនេះ គឺមានការពិបាកក្នុងការតាមដានស្ថានភាពរបស់ពួកវានៅទីនោះ។
សត្វដំរីពេញវ័យត្រូវការអាហារប្រហែល ៤០០ គីឡូក្រាមក្នុងមួយថ្ងៃ ដែលត្រូវចំណាយប្រហែល ២០០ ដុល្លារ – ៤០០ ដុល្លារក្នុងមួយខែ ។ ដើម្បីទប់ទល់នឹងបញ្ហានេះ ម្ចាស់ខ្លះបានព្យាយាមបញ្ជូនសត្វដំរីរបស់ពួកគេចូលទៅក្នុងព្រៃ ដើម្បីឲ្យពួកវាស្វែងរកចំណីដោយខ្លួនឯងពួកវា ប៉ុន្តែ ទោះយ៉ាងណា ពេលនេះក៏មិននាំមកនូវចំណីអាហារច្រើនសម្រាប់ពួកវាដែរ ដោយសារតែស្ថានភាពស្ងួតខ្លាំងដែលបណ្តាលមកពីភ្លើងឆេះព្រៃ ដែលធ្វើឲ្យដំរីមិនអាចរកចំណីស៊ីឲ្យបានត្រឹមត្រូវ។
សម្រាប់ពេលនេះ ដើម្បីទប់ទល់នឹងស្ថានភាពនេះ សួនឧទ្យានដំរី (Elephant Nature Park) កំពុងលក់ EleGiftCard របស់ពួកគេ ដោយសង្ឃឹមថានឹងទទួលបានប្រាក់មួយចំនួនដែលអាចជួយបង្កើនដំរីនៅក្នុងដែនជម្រកសត្វព្រៃរបស់ពួកគេ៕
ប្រែសម្រួល៖ លឹម ហុង (ប្រភព៖ worldofbuzz)