ភ្នំពេញ៖ កាលពីពេលថ្មីៗនេះ មានផេកហ្វេសប៊ុក Agri Founder បានបង្ហោះរូបភាព និងវីដេអូ រៀបរាប់អំពីការបង្ខំចិត្ត ចាក់ចោលផ្លែស្វាយ ដោយសារគ្មានទីផ្សារ ក្នុងកាលៈទេសៈនៃជំងឺកូវីដ-១៩។ សម័យ COVID-19 ស្វាយមួយចំការត្រូវបានចាក់ចោលទាំងអស់ ដោយសារតែគ្មានទីផ្សារលក់ (មានវីដេអូ)។
បន្ទាប់ពីមានករណីខាងលើកើតឡើង ក្រុមការងារក្រសួងពាណិជ្ជកម្ម បានចុះទៅធ្វើការស្រាវជ្រាវដោយចិត្តទុកដាក់ចំពោះករណីនេះ ក្នុងគោលបំណងស្វែងរកការពិត និងចាត់វិធានការជាក់លាក់ដើម្បីជួយដល់កសិកររងគ្រោះ។
ក្រសួងពាណិជ្ជកម្ម នៅថ្ងៃទី២៥ខែមេសាឆ្នាំ២០២០នេះ បានឲ្យដឹងថា លេខាធិការដ្ឋានអ្នកនាំពាក្យក្រសួងពាណិជ្ជកម្ម មានកិត្តិយសសូមធ្វើការបំភ្លឺ ជម្រាបជូនប្រិយមិត្តហ្វេសប៊ុក និងសាធារណជនទូទៅមេត្តាជ្រាបថា បន្ទាប់ពីបានឃើញរូបភាព និងវីដេអូ រៀបរាប់អំពីការបង្ខំចិត្ត ត្រូវចាក់ចោលផលិតផលកសិកម្មជាផ្លែស្វាយ ដោយសារគ្មានទីផ្សារក្នុងកាលៈទេសៈនៃជំងឺកូវីដ-១៩ រួចមក ក្រុមការងារក្រសួងពាណិជ្ជកម្ម បានចុះទៅធ្វើការស្រាវជ្រាវ ដោយចិត្តទុកដាក់ចំពោះករណីនេះ ក្នុងគោលបំណងស្វែងរកការពិត និងចាត់វិធានការជាក់លាក់ដើម្បីជួយដល់កសិកររងគ្រោះ។
ជាក់ស្ដែង បន្ទាប់ពីបានចុះដល់ទីតាំង និងពិនិត្យស្វាយ ដែលបានចាក់ចោលនេះ ព្រមទាំងសាកសួរដល់ភាគីពាក់ព័ន្ធ ក្រុមការងារបានរកឃើញថា ទីតាំងកើតហេតុស្ថិតនៅចំការស្វាយភូមិផ្សារត្រែងត្រយឹង ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ហើយស្វាយទាំងនោះ ជាស្វាយដែលខូចដោយសារទុំក្នុងកញ្ចប់ មានបរិមាណប្រហែលជាពីរតោន ដែលត្រូវតែចាក់ចោលដោយសារអ្នកទិញ មិនអាចទទួលទិញបាន ព្រោះមានបញ្ហាទាក់ទងនឹងគុណភាព។ ប្រិយមិត្ត និងសាធារណជន ក៏អាចសម្គាល់មើលជាក់ស្តែង ក្នុងរូបភាពដែលបង្ហាញរូបស្វាយទុំជោរ ពណ៌លឿង ដែលពុំអាចនឹងទុកឱកាស ឲ្យដឹកជញ្ជូនទៅលក់ឯណាទៀតបាន សូម្បីតែយកទៅរោងចក្រធ្វើតំណាប់ស្វាយ កុំថាឡើយនាំចេញទៅបរទេស ដែលត្រូវការរយៈពេលសម្រាប់ដឹកជញ្ជូន ដូច្នេះទាមទារផ្លែស្វាយ ដែលមានគុណភាពតាមតម្រូវការទីផ្សារ។
ក្រសួងសូមឆ្លៀតឱកាសនេះជម្រាបជូនថា បច្ចុប្បន្ននេះ ទោះជាស្ថិតក្នុងកាលៈទេសៈនៃជំងឺកូវីដ-១៩ ក៏ដោយ ក៏កសិផលកម្ពុជា នៅតែមានទីផ្សារទាំងសម្រាប់ការនាំចេញ និងទីផ្សារក្នុងស្រុក អោយតែទំនិញទាំងនោះ មានគុណភាពស្របតាមតម្រូវការទីផ្សារ ពិសេសផ្លែស្វាយ។ ផ្លែស្វាយដែលមានគុណភាពល្អ រោងចក្រផលិតដំណាប់ស្វាយ ទទួលប្រមូលទិញក្នុងតម្លៃពី ៥០០រៀល ទៅ ៥៥០រៀលក្នុងមួយគីឡូក្រាម ចំណែកផ្លែស្វាយដែលខ្ចប់ ក្នុងកញ្ចប់សម្រាប់នាំចេញគឺ បានថ្លៃដល់ ៩០០រៀលក្នុងមួយគីឡូក្រាម។ ដូច្នេះ ឲ្យតែស្វាយមានគុណភាពល្អ ពុំខ្វះទីផ្សារឡើយ។
បច្ចុប្បន្ន នៅខេត្តកំពង់ស្ពឺ ពុំមានសល់ស្វាយក្នុងចំការច្រើនទេ ឈ្មួញកណ្ដាលដឹកស្វាយ តាំងពីខេត្តកំពង់ឆ្នាំង កំពង់ធំ កំពង់ចាម ព្រះវិហារ ដើម្បីយកមកលក់ឱ្យឃ្លាំងធំៗ នៅកំពង់ស្ពឺ សម្រាប់នាំចេញ និងបម្រើតម្រូវការរោងចក្រកែច្នៃក្នុងស្រុក។ ក្រសួងពាណិជ្ជកម្ម និងស្ថាប័នពាក់ព័ន្ធកំពុងប្រឹងប្រែងអស់ពីកម្លាំងកាយចិត្ត ស្វះស្វែងបើកច្រកទីផ្សារ សម្រាប់ការនាំចេញកសិផលកម្ពុជា ឱ្យកាន់តែបានច្រើនថែមទៀត ទៅកាន់ទីផ្សារពិភពលោក។
អាស្រ័យហេតុនេះ ក្រសួងសូមអំពាវនាវយ៉ាងទទូច សូមប្រិយមិត្តហ្វេសប៊ុក មេត្តាពិចារណា និងប្រមូលព័ត៌មាន ឱ្យបានគ្រប់ជ្រុងជ្រោយ មុននឹងដាក់បង្ហោះនូវរូបភាព ឬ ខ្លឹមសារណាមួយដែលជះឥទ្ធិពលអវិជ្ជមាន ដល់ការប្រឹងប្រែងរបស់ រាជរដ្ឋាភិបាល ដែលបច្ចុប្បន្ននេះ កំពុងអនុវត្តគោលនយោបាយ លើកស្ទួយវិស័យកសិកម្ម និងគាំទ្រ លើកទឹកចិត្តដល់ការនាំចេញកសិផល។
សូមមេត្តារួមគ្នាលុបបំបាត់ព័ត៌មានមិនពិត (Fake News) ដែលមានចរិតបំពុលសង្គម ហើយធ្វើឱ្យរាំងស្ទះដល់ការរីកចម្រើន នៃសង្គមជាតិយើង។ “ការពិត ទើបនាំមកនូវការគាំទ្រ និងការកោតសរសើរ ចំណែកព័ត៌មានក្រឡៃ មិនពិត នឹងនាំមកនូវទុក្ខទោសដល់ខ្លូន!”៕ដោយ៖កូឡាប