ភ្នំពេញ៖ នៅថ្ងៃទី២៥ខែមេសា ឆ្នាំ២០២០ ប្រជាសហគមន៍ភូមិស្រែប្រាំង ឃុំត្រពាំងព្រីង ស្រុកតំបែរ ខេត្តត្បូងឃ្មុំ នៅតែបន្តធ្វើយុទ្ធនាការទាមទារ ឲ្យតុលាការខេត្តត្បូងឃ្មុំដោះលែង លោក សែម សាងដែលជាតំណាងរបស់ពួកគាត់ដែលត្រូវសម្ថកិច្ចចាប់ខ្លួនកាលពីថ្ងៃទី ១៧ ខែ តុលា ឆ្នាំ ២០១៩ ដោយអយុត្តិធម៌ គ្មានកំហុសមិនមានភស្តុតាងច្បាស់លាស់ ។
ប្រជាពលរដ្ឋស្នើ ក្រសួងពាក់ព័ន្ធនឹងរាជរដ្ឋាភិបាល ជួយអន្តរាគមន៍ ដោះលែង លោកសែម សាង នឹងទម្លាក់ចោលរាល់ការចោទប្រកាន់ មកលើសកម្មជនដីធ្លីបន្តទៀត ជាបន្ទាន់ដោយគ្មានលក្ខខណ្ឌ ពីព្រោះពួកគាត់មិនបានប្រព្រឹត្តិដូចគេចោទប្រកាន់នោះទេ។
ប្រជាសហគមន៍ស្រែប្រាំង នៅឃុំត្រពាំងព្រីង ស្រុកតំបែរ ខេត្តត្បូងឃ្មុំ នាំគ្នាឈរកាន់រូបថតតំណាងពួកគេ ដោយស្រែកទាមទារឱ្យតុលាការ ទម្លាក់ការចោទប្រកាន់ និងដោះលែងលោក សែម សាង ឱ្យមានសេរីភាពវិញ។
ការចាប់ខ្លួនលោក សែម សាង យកទៅឃុំក្នុងពន្ធនាការខេត្តត្បូងឃ្មុំ ទំនងជាអាចចេញពីរឿងលោក សែម សាង តែងតែសកម្មចេញមុខការពារដីព្រៃសហគមន៍ ដោយចាប់យកម៉ាស៊ីនអារឈើពីជនល្មើស។ អ្នកភូមិរូបនេះ ស្នើដល់តុលាការជួយដោះលែងតំណាងពួកគេឱ្យមានសេរីភាពវិញ ព្រោះលោក សែម សាង មិនបានប្រព្រឹត្តកំហុសធំដុំដូចការចោទប្រកាន់នោះទេ។
ភរិយាលោក សែម សាង គឺ លោកស្រី ឈឿន ស្រីសុខ បានថ្លែងថា ក្នុងអំឡុងពេលដែលប្ដីគាត់ឃុំក្នុងពន្ធនាគារ គាត់មិនអាចធ្វើការងារអ្វីបានទេ។ លោកស្រីឱ្យដឹងថា លោក សែម សាង គឺជាពលរដ្ឋដូចអ្នកភូមិឯទៀត ប្រកបរបរលក់ជី និងថ្នាំបាញ់សម្លាប់សត្វល្អិត ដោយដាក់ប្លង់ដីទៅខ្ចីប្រាក់ពីធនាគារ ដើម្បីធ្វើដើមទុនរកស៊ី។ ស្ត្រីរូបនេះ ស្នើដល់តុលាការជួយពន្លឿននីតិវិធី ដោះលែងប្ដីលោកស្រី ឱ្យបានជួបជុំគ្រួសារវិញ ព្រោះពេលនេះគ្រួសារកំពុងជួបបញ្ហាជីវភាពខ្លាំង។
លោក សែម សាង ត្រូវបានអាជ្ញាធរស្រុកតំបែរ ស្ទាក់ចាប់នៅភូមិស្រែប្រាំង ហើយនាំខ្លួនទៅឃុំនៅពន្ធនាគារ កាលពីថ្ងៃទី១៧ ខែតុលា ឆ្នាំ២០១៩ បន្ទាប់ពីលោកត្រឡប់មកពីចូលរួមសិក្ខាសាលាចិញ្ចឹមមាន់ និងផលិតទឹកសុទ្ធ នៅខេត្តកំពង់ឆ្នាំង។ តំណាងពលរដ្ឋរូបនេះ រងការចោទប្រកាន់ទាក់ទងនឹងបទចោទថា “កំហែងដោយមានស្ថានទម្ងន់ទោស ដោយសារការប្រើប្រាស់អាវុធ” ដែលបានប្រព្រឹត្តនៅភូមិស្រែប្រាំង ឃុំត្រពាំងព្រីង កាលពីថ្ងៃទី១៨ ខែកុម្ភៈ ឆ្នាំ២០១៦៕ដោយ៖បញ្ញាស័ក្តិ
