ថៃ៖ កសិករម្នាក់បាន Live វីដេអូនៅលើបណ្តាញសង្គម កាលពីថ្ងៃទី២១ ខែមេសា ឆ្នាំ២០២០ ដោយប្រកាសលក់ផ្លែឪឡឹកក្នុងតម្លៃត្រឹមតែ ៣ បាត ប៉ុណ្ណោះ (ជិត៤រយរៀលលុយខ្មែរ) ក្នុងមួយគីឡូក្រាម ។ កសិកររូបនេះបានបញ្ជាក់ថា ផ្លែឪឡឹកត្រូវបានលក់ក្នុងតម្លៃដ៏ថោក ព្រោះអ្នកស្រីត្រូវការរកប្រាក់សម្រាប់ថ្លៃធ្វើចម្ការ និងបង់ឱ្យកម្មករ។ អ្នកស្រីបន្តថា លុយលក់បានបន្តិចបន្តួចនេះ គឺប្រសើរជាងអត់លុយសោះ ហើយជម្រើសចុងក្រោយ គឺមានតែបោះចោលឪឡឹកទាំងអស់។
ម្ចាស់ចម្ការឪឡឹកខាងលើនេះក៏បានបញ្ចាក់ថា អ្នកស្រីមិនមែនជាអ្នករងទុក្ខវេទនាតែម្នាក់ទេ កសិករជាច្រើននៅក្នុងប្រទេសថៃ និងអ្នកផ្សេងទៀត ក៏កំពុងប្រឈមមុខនឹងបញ្ហាដូចគ្នានេះដែរ ជាមួយនឹងការចំណាយទុន និងគ្មានកន្លែងលក់ទំនិញចេញ។
Wirachayaporn អាយុ ៤០ ឆ្នាំ ជាចៅស្រីម្ចាស់ចម្ការឪឡឹកមួយ នៅខេត្តស៊ីសាកេត បានបង្ហើបតាមហ្វេសប៊ុកអ្នកស្រីដែលដាក់ឈ្មោះ «ស្ត្រីខ្លាំង បេះដូងដែក (หญิงแกร่ง หัวใจเหล็ก)» ថា ស្ថានភាព Covid-19 បានជះឥទ្ធិពលយ៉ាងខ្លាំងដល់កសិដ្ឋានគ្រួសាររបស់អ្នកស្រី ដែលបណ្តាលឱ្យឪឡឹករាប់តោននៅសល់ លក់មិនចេញ។ កសិដ្ឋានឪឡឹកមានទំហំប្រហែល ១០០ រ៉ៃ ឬប្រហែល ៣៩.៥ ហិចតា ជាធម្មតា កសិដ្ឋាននឹងលក់ឪឡឹកទុំដល់អ្នកទិញនៅមុខកសិដ្ឋានរបស់ពួកគេរាល់ថ្ងៃ។ តម្លៃធម្មតា ៦ បាតក្នុងមួយគីឡូក្រាម ឪឡឹកនៅក្នុងផ្សារទំនើបជាធម្មតាត្រូវបានលក់ក្នុងតម្លៃប្រហែល ៥០ បាតក្នុងមួយគីឡូក្រាម ។
អ្នកស្រី Wirachayaporn បានដឹងថា ផ្លែឪឡឹកមួយចម្ការនឹងត្រូវបោះបង់ចោលដោយបន្សល់ទុកបំណុលសម្រាប់គ្រួសារ ដោយគ្មានប្រាក់ចំណេញសូម្បីមួយរៀល។ អ្នកស្រីបានសម្រេចចិត្តផ្សាយបន្តផ្ទាល់តាមហ្វេសប៊ុក ដោយប្រកាសលក់ឪឡឹកក្នុងតម្លៃត្រឹម ៣ បាត ក្នុងមួយគីឡូក្រាមដែលជាថ្លៃដើម៕
ប្រែសម្រួល៖ លឹម ហុង (ប្រភព៖ Sanook)
