ប្រទេសចិន បានបដិសេធការស្នើឲ្យមាន ការស៊ើបអង្កេតឯករាជ្យអន្តរជាតិ ដើម្បីរកប្រភពដើមនៃវីរុសកូរ៉ូណា។
មន្ត្រីការទូតជាន់ខ្ពស់ចិនប្រចាំប្រទេសអង់គ្លេស អ្នកស្រី Chen Wen បានថ្លែងប្រាប់សារព័ត៌មាន BBC ដូច្នេះថា ការទាមទារនោះគឺជារឿងនយោបាយ ហើយវានឹងបង្វែរការយកចិត្តទុកដាក់ របស់ចិនពីការប្រយុទ្ធប្រឆាំងនឹងការរាតត្បាតវីរុស។
ការដឹងព័ត៌មានពីប្រភពនៃវីរុស COVID-19 និងពីរបៀបដែលវារាតត្បាតដំបូង អាចជួយប្រទេសជាច្រើន ក្នុងការដោះស្រាយបញ្ហាជំងឺនេះ។
វីរុសកូរ៉ូណា ដែលរហូតមកដល់ពេលនេះ បានសម្លាប់មនុស្សជិត ២០០.០០០នាក់ ត្រូវបានគេគិតថា ផ្ទុះចេញពីទីផ្សារលក់សត្វព្រៃមួយកន្លែង ក្នុងទីក្រុងវូហាន កាលពីចុងឆ្នាំ ២០១៩។
នៅពេលជាមួយគ្នានេះដែរ របាយការណ៍របស់សហភាពអឺរ៉ុប បានចោទប្រកាន់ចិនថា ផ្សព្វផ្សាយព័ត៌មានមិនពិតពីវិបត្តិវីរុស។
ប្រធានាធិបតីអាមេរិច ដូណាល់ ត្រាំ បានធ្វើការវាយប្រហារចិនជាច្រើនដង លើការដោះស្រាយរបស់ចិន ចំពោះការផ្ទុះវីរុស ហើយរដ្ឋមួយរបស់អាមេរិចឈ្មោះMissouri បានធ្វើការប្តឹងរដ្ឋាភិបាលចិន ដោយចោទចិនថា បានធ្វើកិច្ចការតិចតួច ដើម្បីបញ្ឈប់ការរាតត្បាតនៃវីរុស។
អ្នកវិទ្យាសាស្ត្របានធ្វើការរិះគន់ លើការប៉ាន់ស្មានថា វីរុសប្រហែលត្រូវបានគេបង្កើតឡើង នៅក្នុងមន្ទីរពិសោធន៍ក្រុងវូហាន។
តើអ្វីដែលចិនជំទាស់?
ចាប់តាំងពីការផ្ទុះមក មានការស្នើឲ្យអនុញ្ញាត ឲ្យអ្នកស៊ើបអង្កេតអន្តរជាតិ ចូលទៅកាន់ប្រទេសចិន ដើម្បីរកមូលហេតុតើវីរុសនោះ ចាប់ផ្តើមកើតឡើងយ៉ាងម៉េច។
នៅថ្ងៃព្រហស្បតិ៍កន្លងទៅនេះ នាយករដ្ឋមន្ត្រីអូស្ត្រាលី Scott Marrison បាននិយាយថា គាត់នឹងជំរុញឲ្យមានការស៊ើបអង្កេត នៅក្នុងកិច្ចប្រជុំប្រចាំឆ្នាំរបស់សភាសុខាភិបាលពិភពលោក ដែលនឹងធ្វើឡើងនៅខែក្រោយ។ សភាសុខាភិបាលពិភពលោក គឺជាស្ថាប័នធ្វើការសម្រេចចិត្ត របស់អង្គការសុខភាពពិភពលោក។ អូស្ត្រាលីជាសមាជិកក្រុមប្រឹក្សាប្រតិបត្តិនៃសភានោះ។
ទោះយា់ងណា មន្ត្រីការទូតជាន់ខ្ពស់ចិន អ្នកស្រី Chen និយាយថា ប្រទេសរបស់អ្នកស្រី មិនអាចយល់ព្រមឲ្យមានការស៊ើបអង្កេត ជាអន្តរជាតិឡើយ។
អ្នកស្រីនិយាយថា “ការស៊ើបអង្កេតឯករាជ្យជារឿងនយោបាយ”។
“ពួកយើងកំពុងប្រយុទ្ធប្រឆាំងនឹងវីរុសនៅពេលនេះ។ យើងកំពុងផ្តោតលើការប្រឹងប្រែងទាំងអស់ របស់យើងដើម្បីប្រឆាំងនឹងវីរុស។ ហេតុអ្វីត្រូវនិយាយពីរឿងស៊ើបអង្កេតលើបញ្ហានេះ។ វានឹងបង្វែរមិនត្រឹមការយកចិត្តទុកដាក់ របស់ចិននោះទេ ថែមទាំងធនធានផងដែរ”។
អ្នកស្រីនិយាយទៀតថា “វាគឺជាការផ្តួចផ្តើម ដែលមានហេតុផលនយោបាយ។ ខ្ញុំគិតថា គ្មាននរណាម្នាក់អាចយល់ព្រម លើរឿងនេះបានទេ”៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
