ករណីទំនាស់ ដែលមានភាគីផ្ទះហាងកាហ្វេមួយ ត្រូវបានគេអះអាងថាមានខ្នងធំ តែងតាមរករឿងវាយកម្ទេចផ្ទះម្ខាងទៀតជាប់គ្នា ដែលជាផ្ទះពេទ្យ មិនឲ្យសាងសង់អ្វីទាំងអស់ ដែលរំលោភច្បាប់ព្រហ្មទណ្ឌទាំងស្រុង បានធ្វើឲ្យមហាជននៅក្នុងបណ្តាញសង្គម ស្អប់ខ្ពើមយ៉ាងខ្លាំង បន្ទាប់ពីបានឃើញសកម្មភាព ជាមួយការប្រើប្រាស់សម្តីដ៏កោងកាចអាងបក្ខពួក មកលើភាគីខាងផ្ទះពេទ្យ ដោយមិនយកច្បាប់មកដោះស្រាយ ។
បើតាមជាងសំណង់ដែលកំពុងធ្វើឲ្យផ្ទះពេទ្យ បានប្រាប់ឲ្យដឹងថា ភាគីខាងផ្ទះហាងកាហ្វេ ដែលមិនយកច្បាប់មកដោះស្រាយគ្នានេះ ពុំត្រឹមតែចង់វាយម្ចាស់ផ្ទះពេទ្យទេ គឺសូម្បីរករឿងចង់វាយដាក់ខ្នោះមកលើពួកគាត់ជាជាងៗ ដែលមិនដឹងអីទៀតផង ។ អ្វីដែលពួកគាត់គ្រប់គ្នាមានការងឿងឆ្ងល់ និងហួសចិត្តនោះ គឺត្រង់ថា ម្ចាស់ផ្ទះដែលរករឿងគេនេះ អាចសាងសង់អ្វីៗបាន និងសូម្បីសង់ហាងកាហ្វេ ក៏លយរំលោភចំណីផ្លូវសាធារណៈទៀត តែបែរជាអាជ្ញាធរមើលមិនឃើញទៅវិញ ។
នេះបើតាមគណនីហ្វេសប៊ុកលោក Huy Ou Dom បានបង្ហោះវីដេអូ និងរៀបរាប់ពីហេតុការណ៍ដ៏អាក្រក់នេះឲ្យដឹងថា៖ «#ផ្ទះជាប់គ្នានៅភូមិត្រពាំងថ្លឹង ខណ្ឌពោធិ៍សែនជ័យ រាជធានីភ្នំពេញ មានទំនាស់ដោយសារភាគីម្ខាង អាងមានខ្នងធំតាមរករឿងវាយកម្ទេចផ្ទះម្ខាងទៀត ជាផ្ទះពេទ្យជួយសង្គ្រោះមនុស្សទូទៅ មិនឲ្យសាងសង់អ្វីទាំងអស់.. តែផ្ទះរករឿងគេនោះ បានសាងសង់ហាងកាហ្វេ រំលោភចំណីផ្លូវទាំងស្រុង បែរជាអាជ្ញាធរមើលមិនឃើញទៅវិញ.. ជួយស៊ែរម្នាក់មួយមកបងប្អូន ដើម្បីឲ្យថ្នាក់លើជួយអន្តរាគមន៍ផង! អាណិតគ្នាអ្នកតូចទាប» ៕ ដោយ៖ លឹម ហុង