ស្ទឹងត្រែង ៖ អ្នកចូលចិត្តផ្តិតយករូបភាពសម្រស់ធម្មជាតិ គ្រប់កន្លែង ក្នុងខេត្តស្ទឹងត្រែងបានបង្ហាញរូបថតជាច្រើនសន្លឹក តាមបណ្តាញសង្គមហ្វេសប៊ុក។
រូបថតទាំងនោះ បានបញ្ជាក់ថា គឺរូងភ្នំសត្វក្ងោកមាស។ រូងភ្នំនោះ បើមើលពីក្រៅ ហាក់
បីដូចជាមានភាពអាថ៌កំបាំង ក៏ប៉ុន្តែយើងអាចចូលទៅខាងក្នុងបាន។ អ្នកដែលបានចូលក្នុងរូងភ្នំ នឹងឃើញសភាពប្លែកៗ លើផ្ទាំងថ្មដូចជាល្អាង មានងងឹតនិងភ្លឺ ឬក៏វល្លិ៍ធ្លាក់ពីលើដើមឈើ ក្រោមម្លប់ត្រជាក់នៃសំណើមទឹក។
ទីនោះពីមុនសុទ្ធតែព្រៃមានសត្វជាច្រើនប្រភេទរស់នៅ។ តែសព្វថ្ងៃបានក្លាយជាដីចម្ការដាំដំណាំ ហើយនៅព្រៃសេសសល់គឺសហ
គមន៍រៀបចំអភិរក្សឲ្យក្លាយទៅជាតំបន់ទេសចរទាក់ទាញភ្ញៀវ។
បន្ទាប់ពីរៀបចំបានខ្លះសហគមន៍ភ្នំជម្រកសត្វនៅភូមិឆ្វាំង ឃុំសំអាង ស្រុកថាឡាបរិវ៉ាត់ បើកដំណើរទស្សនាចរជូនភ្ញៀវទេសចរនៅឆ្នាំ២០២០នេះ ដើម្បីបានប្រាក់ចំណូល ហើយបានបន្តរៀបចំអភិរក្សធនធានធម្មជាតិ នៅតំបន់នោះ ឲ្យបានគង់វង្សបន្ថែមទៀត។
លោក កែវ សុភាព សមាជិកក្រុមប្រឹក្សាឃុំសំអាង ទទួលស្គាល់ថា តំបន់ភ្នំជម្រកសត្វមានសក្ដានុពលសម្រាប់ភ្ញៀវទេសចរមកទស្សនា ព្រោះសម្បត្តិធនធានធម្មជាតិ ព្រៃឈើ សត្វព្រៃ នៅតំបន់ភ្នំឈ្ងូគ-ភ្នំក្ងោគមាស- ភ្នំដំរីជល-នេះ បានរំលេចនូវទេសភាពស្រស់ស្អាតណាស់។
ការអភិវឌ្ឍសហគមន៍នេះ អាជ្ញាធរពាក់ព័ន្ធបានឯកភាព ជាមួយមន្ទីរទេសចរណ៍ និងអង្គការដៃគូ រៀបចំជាតំបន់ភ្នំនេះជាតំបន់អេកូទេសចរណ៍ជម្រកសត្វ ដោយសាងសង់ជាហេដ្ឋារចនាសម្ព័ន្ធបានជាង៧០%ហើយ។
បើយើងធ្វើដំណើរចេញពីក្រុងស្ទឹងត្រែង ឆ្លងកាត់ស្ពានមេគង្គ តំបន់ភ្នំជម្រកសត្វនេះ ស្ថិតនៅចម្ងាយពីទីរួមខេត្តប្រមាណជាង៥០គីឡូម៉ែត្រ ហើយអាជ្ញាធរឃុំសំអាង ស្រុកថាឡាបរិវ៉ាត់ និងមន្ទីរទេសចរណ៍ រៀបចំជារមណីយដ្ឋានអេកូទេសចរណ៍ធម្មជាតិសម្រាប់បម្រើដល់ភ្ញៀវជាតិ និងអន្តរជាតិ បានបានទស្សនាកម្សាន្ត៕ ដោយ ៖ សុខុម