ភ្នំពេញ៖ មជ្ឈមណ្ឌលសិទ្ធិមនុស្សកម្ពុជា នៅថ្ងៃទី២៦ ខែមេសា ឆ្នាំ២០២០ បានឲ្យដឹងថា ប្រាំបីឆ្នាំក្រោយពីការស្លាប់នេះ យុត្តិធម៌សម្រាប់លោក ឈុត វុទ្ធី នៅតែមិនទាន់ទទួលបាននៅឡើយទេ។
មជ្ឈមណ្ឌលសិទ្ធិមនុស្សកម្ពុជា បានផ្សាយថា នៅថ្ងៃទី២៦ ខែមេសា ឆ្នាំ២០២០ នេះ យើងខ្ញុំនៅចងចាំពីការស្លាប់របស់លោក ឈុត វុទ្ធី ដែលជាសកម្មជនបរិស្ថានប្រឆាំងនឹងការកាប់បំផ្លាញព្រៃឈើខុសច្បាប់ដ៏លេចធ្លោម្នាក់របស់កម្ពុជា ត្រូវបានបាញ់សម្លាប់នៅក្នុងខេត្តកោះកុងកាលពីថ្ងៃទី២៦ ខែមេសា ឆ្នាំ២០១២។ ប្រាំបីឆ្នាំក្រោយពីការស្លាប់នេះ យុត្តិធម៌សម្រាប់លោក ឈុត វុទ្ធី នៅតែមិនទាន់ទទួលបាននៅឡើយទេ។
លោក ឈុត វុទ្ធី គឺ ជា ប្រធានអង្គការការពារធនធានធម្មជាតិត្រូវបានគេបាញ់សម្លាប់នៅថ្ងៃ ទី២៦ ខែមេសា ឆ្នាំ ២០១២ នៅត្រង់ចំណុច វាលបី ឃុំបាក់ខ្លង ស្រុកមណ្ឌលសីមា ខេត្តកោះកុង នៅខណៈចុះទៅស៊ើបអង្កេតនិងថតរូបសកម្មភាពបទល្មើសព្រៃឈើខុសច្បាប់នៅតំបន់ជួរ ភ្នំក្រវាញ។
បន្ទាប់ពីមរណភាពរបស់លោក ឈុត វុទ្ធី បានប៉ុន្មានថ្ងៃ នៅថ្ងៃ ទី៣០ ខែមេសា ឆ្នាំ ២០១៦ រដ្ឋាភិបាលបានបង្កើតគណៈកម្មាធិការស៊ើបអង្កេតចម្រុះដើម្បីធ្វើការស៊ើបអង្កេតបន្ថែមទៀត ហើយក៏បានប្រកាសថា លោក ឈុត វុទ្ធី ត្រូវបានលោក អ៊ិន រតនា បាញ់សម្លាប់ ហើយលោក អ៊ិន រតនា បានត្រូវគ្រាប់កាំភ្លើងដោយចៃដន្យ នៅពេលលោក រ៉ាន់ បូរ័ត្ន ដណ្ដើមកាំភ្លើងពីលោក រតនា។ នៅក្នុងសំណុំរឿងនោះសាលាដំបូងខេត្តកោះកុង បានបើកសវនាការជម្រះរឿងក្តីមនុស្សឃាតដោយអចេតនាតែតុលាការពុំបានចាត់ការសំណុំរឿងនេះទេ ដោយសារលោក ឈុត វុទ្ធី និងឃាតករ អ៊ិន រតនា បានស្លាប់ទាំងពីរនាក់។
គួរកត់សម្គាល់ផងដែរថា គណៈកម្មការចម្រុះស៊ើបអង្កេតករណីស្លាប់ លោក ឈុត វុទ្ធី និងលោក អ៊ិន រតនា បានចាប់ផ្ដើមបំពេញបេសកកម្មរបស់ខ្លួន នៅថ្ងៃទី២ ខែឧសភា ឆ្នាំ២០១២នេះ គឺបន្ទាប់ពីមានសេចក្ដីសម្រេចបង្កើតគណៈកម្មការចម្រុះមួយនេះ ពីសម្ដេចនាយករដ្ឋមន្ត្រី ហ៊ុន សែន កាលពីថ្ងៃទី៣០ ខែមេសា ឆ្នាំ២០១២។
លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័ស នៃទីស្តីការគណៈរដ្ឋមន្ត្រី និងជាសមាជិកគណៈកម្មការចម្រុះស៊ើបអង្កេតករណីស្លាប់ លោក ឈុត វុទ្ធី និងឈ្មោះ អ៊ិន រតនា បានមានប្រសាសន៍ឲ្យដឹងថា បន្ទាប់ពីជួបប្រជុំ កាលពីថ្ងៃទី១ឧសភា គណៈកម្មការចម្រុះ ដែលដឹកនាំដោយលោកឧត្តមសេនីយ៍ឯក ម៉ក់ ជីតូ ប្រធាននាយកដ្ឋានកណ្តាលយុត្តិធម៌ នៃអគ្គស្នងការដ្ឋាននគរបាលជាតិ ក្រសួងមហាផ្ទៃ ត្រូវចុះទៅកាន់ខេត្តកោះកុង ដើម្បីស្រាវជ្រាវស៊ើបអង្កេតដល់ទីកន្លែង នៅថ្ងៃទី២ឧសភា ឆ្នាំ២០១២។
លោក ទិត សុធា បានបន្តថា គណៈកម្មការចម្រុះនេះ ត្រូវស៊ើបអង្កេតបន្ថែមទៀតទៅលើហេតុការណ៍ដែលកើតឡើង បូករួមនឹងរបាយការណ៍ដែលបានចេញកន្លងមក និងរកព័ត៌មានបន្ថែមទៀត ដែលមានអ្នកវិទ្យាសាស្ត្រ អ្នកបច្ចេកទេសផ្សេងៗ កងរាជអាវុធហត្ថ ចម្រុះដោយអាជ្ញាធរស្រាវជ្រាវលំអិត និងរកភស្តុតាងបន្ថែមទៀត ដើម្បីឲ្យមានទម្ងន់មុន និងចេញសេចក្តីសន្និដ្ឋានចុងក្រោយ។
កាលពីថ្ងៃទី៣០មេសា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានចុះហត្ថលេខាលើសេចក្តីសម្រេចមួយ ស្តីពី ការបង្កើតគណៈកម្មការចម្រុះស៊ើបអង្កេត ករណីស្លាប់ ឈ្មោះ ឈុត វុទ្ធី និងឈ្មោះ អ៊ិន រតនា កាលពីថ្ងៃទី២៦ ខែមេសា ឆ្នាំ២០១២ នៅស្រុកមណ្ឌលសីមា ខេត្តកោះកុង។
សេចក្តីសម្រេចបង្កើតគណៈកម្មការចម្រុះស៊ើបអង្កេត ករណីស្លាប់របស់សកម្មជនការពារព្រៃឈើ និងប៉េអឹម មានសមាសភាព ៥ រូប រួមមាន៖ ទី១-លោកឧត្តមសេនីយ៍ឯក ម៉ក់ ជីតូ ប្រធាននាយកដ្ឋានកណ្តាលយុត្តិធម៌ នៃអគ្គស្នងការដ្ឋាននគរបាលជាតិ ក្រសួមហាផ្ទៃ ជាប្រធាន។ ទី២-លោកឧត្តមសេនីយ៍ទោ ស៊ិន សូផាន្នី មេបញ្ជាការរង និងជាស្នងការនៃស្នងការដ្ឋានស្រាវជ្រាវ និងយុត្តិធម៌ នៃបញ្ជាការដ្ឋានកងរាជអាវុធហត្ថលើផ្ទៃប្រទេស ជាអនុប្រធាន។ ទី៣-លោក ទិត សុធា អនុប្រធានអង្គភាពព័ត៌មាន និងប្រតិកម្មរហ័ស នៃទីស្ដីការគណៈរដ្ឋមន្ត្រី ជាសមាជិក។ ទី៤-លោក គឹម សន្ដិភាព អគ្គនាយករង អគ្គនាយកដ្ឋានបច្ចេកទេស នៃក្រសួងយុត្តិធម៌ ជាសមាជិក និងទី៥-លោក សោម សាបាន អនុប្រធាននាយកដ្ឋាន ទទួលពាក្យបណ្ដឹង និងអង្កេត ស្រាវជ្រាវ នៃក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ជាសមាជិក។
ក្នុងសេចក្តីសម្រេច ដែលបាន ៧ ប្រការ ក៏បានលើកឡើងថា គណៈកម្មការចម្រុះនេះ មានភារកិច្ច ដឹកនាំស៊ើបអង្កេតករណីស្លាប់ឈ្មោះ ឈុត វុទ្ធី និងឈ្មោះ អ៊ិន រតនា កាលពីថ្ងៃ២៦ ខែមេសា ឆ្នាំ២០១២ នៅក្នុងភូមិសាស្ដ្រ ស្រុកមណ្ឌលសីមា ខេត្តកោះកុង។ ស្រាវជ្រាវរកមុខសញ្ញាដែលមានការពាក់ព័ន្ធក្នុងករណីសម្លាប់។ ស្រាវជ្រាវរកភស្ដុតាង (សាក្សី និងវត្ថុតាង) ក្នុងករណីសម្លាប់។ សហការជាមួយអាជ្ញាធរមានសមត្ថកិច្ចដែនដី ស្ថាប័នច្បាប់ និងស្ថាប័នដែលមានពាក់ព័ន្ធ អនុវត្តច្បាប់ដោយម៉ឺងម៉ាត់បំផុតចំពោះមុខសញ្ញាប្រព្រឹត្តបទល្មើស ដែលមានការពាក់ព័ន្ធក្នុងករណីសម្លាប់នេះ។ ផ្អែកលើលទ្ធផល នៃការស៊ើបអង្កេតប្រកបដោយភាពយុត្តិធម៌ ត្រូវធ្វើរបាយការណ៍ និងការសន្និដ្ឋានឲ្យបានច្បាស់លាស់ករណីសម្លាប់នេះ រាយការណ៍ជូនប្រមុខរាជរដ្ឋាភិបាល។
សេចក្តីសម្រេច ដែលបានផ្សព្វផ្សាយដល់អ្នកកាសែត នៅថ្ងៃទី១ឧសភា ឆ្នាំ២០១២ សម្តេចនាយករដ្ឋមន្ត្រី ហ៊ុន សែន បានលើកឡើងថា គណៈកម្មការចម្រុះនេះ អាចប្រើប្រាស់មន្ត្រីក្រោមឱវាទ ដើម្បីជួយបំពេញការងារខាងលើ និងមានសិទ្ធិបង្កើតក្រុមការងារមួយចំនួន តាមការចាំបាច់។ គណៈកម្មការចម្រុះនេះ ក៏មានសិទ្ធិប្រើប្រាស់ត្រារបស់អគ្គស្នងការដ្ឋាននគរបាលជាតិ ក្នុងករណីពាក់ព័ន្ធខាងលើ។
សូមជម្រាបថា កាលពីម៉ោងវេលាជាង ១២ ថ្ងៃត្រង់ ថ្ងៃទី២៦ ខែមេសា ឆ្នាំ២០១២ លោក ឈុត វុទ្ធី ប្រធានអង្គការការពារធនធានធម្មជាតិ រួមដំណើរដោយកញ្ញា ផន បុប្ជា និងឈ្មោះ អូលេស្យា ប្លុកឃី (ស្រី) ជនជាតិកាណាដាជាបុគ្គលិកកាសែត ឌឹខេមបូឌា ដេលី បានចុះទៅយកព័ត៌មាននៅទីតាំងក្រុមហ៊ុនទទួលដីសម្បទានសេដ្ឋកិច្ចមួយ នៅភូមិកោះប៉ោ ឃុំបាក់ខ្លង ស្រុកមណ្ឌលសីមា ខេត្តកោះកុង ដោយបានថតរូបភាពស្តុកឈើនៅក្នុងក្រុមហ៊ុន បានធ្វើឲ្យមានការហាមឃាត់ពីសំណាក់សន្តិសុខក្រុមហ៊ុន ហើយក៏មានអន្តរាគមន៍ពីមន្ត្រីកងរាជអាវុធហត្ថខេត្ត ចុះទៅកន្លែងកើតហេតុ។ ក្រោយមក ក៏មានការប្រទាញប្រទង់គ្នា ធ្វើឲ្យមានការផ្ទុះអាវុធបណ្តាលឲ្យ លោក ឈុត វុទ្ធី ស្លាប់នៅនឹងកន្លែង ដោយសារគ្រាប់កាំភ្លើង បាញ់ចូលក្នុងឡានធ្លាយត្រូវជង្គង់ផ្លាតទៅចំពោះ (ស្លាប់ក្នុងឡាន)។ បន្ទាប់មកឈ្មោះ អ៊ិន រតនា បានបាញ់ខ្លួនឯង (ធ្វើអត្តឃាត) ចំនួន ២គ្រាប់ ១គ្រាប់ចំពោះ ១គ្រាប់ទៀតចំគល់ដោះខាងឆ្វេង ស្លាប់នៅនឹងកន្លែងក្បែរឡានលោក ឈុត វុទ្ធី។ នេះបើតាមរបាយការណ៍របស់សមត្ថកិច្ចប៉េអឹម៕
ដោយ៖កូឡាប