ភ្នំពេញ៖ កម្លាំងនគរបាលនាយកដ្ឋានក្រសួងមហាផ្ទៃសហការជាមួយស្នងការនគរបាលរាជធានីភ្នំពេញ អធិការដ្ឋានខណ្ឌបឹងកេងកង និងខណ្ឌមានជ័យ បានបើកការស្រាវជ្រាវមុខសញ្ញាឆក់ ដែលបណ្តាលមានស្ត្រីម្នាក់ ដួលបោកក្បាលស្លាប់ នៅលើស្ពានអាកាសស្ទឹងមានជ័យ កន្លងទៅថ្មីៗនេះ
ក្រោយពេលសមត្ថកិច្ច បើកការស្រាវជ្រាវតាមរយៈកាមេរ៉ាសុវត្ថិភាព ដែលនៅជុំវិញក្បែរកន្លែងកើតហេតុ នៅវេលាម៉ោង៦ល្ងាច ថ្ងៃទី២៥ ខែមេសា ឆ្នាំ២០២០ សមត្ថកិច្ចបានធ្វើការឃាត់ខ្លួនជនសង្ស័យ ជាបន្តបន្ទាប់ចំនួន៤នាក់ នៅចំណុចផ្លូវបេតុង ភូមិទ្រា សង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញ។
ជនសង្ស័យដែលកម្លាំងជំនាញឃាត់ខ្លួនបានរួមមាន ៖ទី១.ឈ្មោះ ឡាយ ពេជ្យបញ្ញា ភេទប្រុស អាយុ ២០ឆ្នាំ, ទី២ ឈ្មោះ ធា រ៉ាបី ភេទប្រុស អាយុ ២០ឆ្នាំ, ទី៣ឈ្មោះ សុខ ឡេង ភេទប្រុស អាយុ ២០ឆ្នាំ និងទី៤ឈ្មោះ ស៊ុន ធារ៉ា ភេទប្រុស អាយុ២០ឆ្នាំ នៅចំណុចភូមិទ្រា២ សង្កាត់ស្ទឹងមានជ័យ១ ខណ្ឌមានជ័យ រាជធានីភ្នំពេញ ។
ក្រោយពីធ្វើការសាកសួរបឋម ជនសង្ស័យឈ្មោះ ឡាយ ពេជ្យបញ្ញា, ឈ្មោះ ធា រ៉ាបី និងឈ្មោះ សុខ ឡេង បានសារភាពថាពួកខ្លួន និងបក្សពួកឈ្មោះ ទ្រី, ឈ្មោះ តូ និងឈ្មោះ រ័ត្ន (ពៅ) កាលពីថ្ងៃទី ២៣ ខែមីនា ឆ្នាំ២០២០ នៅទីតាំងកើតហេតុខាងលើ ពួកខ្លួនពិតជាបានធ្វើសកម្មភាពវាយជនរងគ្រោះឈ្មោះ តាន់ ឡាយហួត បណ្តាលឲ្យស្លាប់ពិតប្រាកដមែន ។ ដោយឡែក ឈ្មោះ ឡាយ ពេជ្យបញ្ញា ក៏បានសារភាពទៀតថា ក្រៅពីករណីខាងលើ កាលពីថ្ងៃទី០៩ ខែមេសា ឆ្នាំ២០២០ ខ្លួន, ឈ្មោះ រ័ត្ន (ពៅ), ឈ្មោះ ឌីន និងឈ្មោះ វីន ពិតជាបានធ្វើសកម្មភាពឆក់កាបូបពីជនរងគ្រោះឈ្មោះ ហុង សុខចេង រួចមកជនរងគ្រោះបានជិះម៉ូតូដេញតាម ទើបជ្រុលទៅបុករទេះអេតចាយបណ្តាលឲ្យដួលស្លាប់នៅចំណុចស្ពានអាកាសស្ទឹងមានជ័យ ។
ចំណែកមួយករណីទៀត លួចមានស្ថានទម្ងន់ទោស (ឆក់បណ្តាលឲ្យជនរងគ្រោះស្លាប់) នៅចំណុចផ្លូវ៤៣០ ភូមិ៤ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ សមត្ថកិច្ចចាប់ខ្លួន ជនសង្ស័យម្នាក់។
បច្ចុប្បន្នការិយាល័យ កំពុងតែបន្តស្រាវជ្រាវស្វែងរកចាប់ខ្លួនបក្ខពួកជនសង្ស័យខាងលើ មកផ្តន្ទាទោសទៅតាមនីតិវិធីច្បាប់ ។
ក្រោយពេលធ្វើការឃាត់ខ្លួនជនសង្ស័យទាំង៤នាក់ ខាងលើនេះ រួចមកសមត្ថកិច្ច បានបញ្ជូនជនសង្ស័យទាំង៤នាក់ តាមរថយន្តភ្លាមៗ ទៅកាន់នាយកដ្ឋានព្រហ្មទណ្ឌក្រសួងមហាផ្ទៃ ដើម្បីសាកសួតាមនីតិវិធី៕ដោយ៖CEN