កំពង់ស្ពឺ ៖ ក្រុមក្មេងទំនើងកែច្នៃស៊ីមាំងម៉ូតូប្រែន (ខុសលក្ខណៈបច្ចេកទេស) ត្រូវបានកម្លាំងនគរបាលធ្វើការឃាត់អប់រំឲ្យអាណាព្យាបាលមកធានា ធ្វើកិច្ចសន្យាឲ្យបញ្ឈប់សកម្មភាពរំខានដល់ពលរដ្ឋនិងសង្គម។
ស្នងការដ្ឋាននគរបាលខេត្ដកំពង់ស្ពឺ បានឲ្យដឹងថា នៅប៉ុស្ដិ៍នគរបាលរដ្ឋបាលស្វាយក្រវ៉ាន់ មានការប្រគល់ម៉ូតូជូនអាណាព្យាបាលដែលកូនៗគាត់ជាក្រុមទំនើង “កែច្នៃបំពង់ស៊ីមាំងម៉ូតូឲ្យលាន់សំឡេងខ្លាំង បង្កការរំខានដល់ប្រជាពលរដ្ឋនិងសង្គម ” ម៉ូតូដែលកម្លាំងនគរបាលធ្វើការឃាត់បានមានចំនួន ១៩គ្រឿង ។
ការប្រគល់ម៉ូតូដែលកែច្នៃខុសលក្ខណៈបច្ចេកទេសនេះ ឲ្យទៅអាណាព្យាបាលនាពេលនោះ បានការអញ្ជើញចូលរួមពីសំណាក់លោកឧត្ដមសេនីយ៍ត្រី តាប់ លន ស្នងការរង ទទួលផែនសណ្ដាប់ធ្នាប់ លោក ហុក ម៉ារ៉ាឌី អភិបាលក្រុងច្បារមន លោកចៅសង្កាត់ស្វាយក្រវ៉ាន់ និងមានការចូលរួមមកទទួលយកម៉ូតូ និងធ្វើកិច្ចសន្យាពីសំណាក់វត្ដមាន អាណាព្យាបាល សាមីខ្លួនជាកូនទំនើងផងដែរ ។ ក្រោយការអប់រំណែនាំ ធ្វើកិច្ចសន្យាបញ្ឈប់សកម្មភាពទាំងនោះ អាណាព្យាបាលនិងសាមីខ្លួនបានយកសម្ភារស៊ីមាំងម៉ូតូ (ស៊ីមាំងស្រ៊ីន) មកធ្វើការដោះដូរឲ្យដូចស្ថានដើមវិញ ទើបអនុញ្ញាតឲ្យយកទៅប្រើប្រាស់ជាធម្មតាវិញ ។
តាមការបញ្ជាក់ឲ្យដឹងបន្ថែម ពីលោកឧត្ដមសេនីយ៍ត្រី តាប់ លន ថា ប្រតិបត្ដិការនេះគឺ ក្រុមការងាររបស់ស្នងការដ្ឋាននគរបាលខេត្ដ ដោយបានការបញ្ជាដឹកនាំដ៏ខ្ពង់ខ្ពស់ពី ឯកឧត្ដម អភិបាលខេត្ដ និងការចង្អុលការផ្ទាល់ពីលោកឧត្ដមសេនីយ៍ទោ សម សាមួន ស្នងការនគរបាលខេត្ដ កម្លាំងនគរបាលការិយាល័យចរាចរណ៍ សហការជាមួយកម្លាំងរបស់គណៈបញ្ជាការឯកភាពក្រុង-ស្រុក ទាំង៨ ឃុំ.សង្កាត់បន្ដប្រតិបត្ដិការ និងចុះផ្សព្វផ្សាយណែនាំដោយផ្ទាល់ដល់មុខសញ្ញា ដែលជាក្រុមក្មេងទំនើងនិងទីតាំងលក់_ជួសជុលកែច្នៃស៊ីមាំងម៉ូតូនៅក្នុងភូមិសាស្ដ្រខេត្ដ ជាបន្ដបន្ទាប់ ប៉ុន្ដែនូវតែជាបញ្ហាទុក្ខកង្វល់អំពីក្រុមគ្រួសារ អាណាព្យាបាលមួយចំនួន ហាក់បីដូចជា មិនចាប់អារម្មណ៍ និងអប់រំប្រដៅដល់កូន-ក្មួយនោះទេ ។
ជាការសំណូមពរ សូមអាណាព្យាបាល មាតា បិតា ទាំងអស់សូមជួយអប់រំណែនាំដល់កូនឲ្យចូលរួមគោរពច្បាប់ និងបញ្ឈប់នូវសកម្មភាពទាំងឡាយ ដែលទាក់ទងដល់ផ្លូវច្បាប់ ” រួមគ្នាដើម្បីសង្គមជាតិរបស់យើង ត្រូវមានការចូលរួមពីសំណាក់ពលរដ្ឋនៅក្នុងសង្គម”៕ដោយ៖កូឡាប