ភ្នំពេញ ៖ ឧទ្យានុរក្សនៃក្រសួងបរិស្ថានរួមជាមួយសហគមន៍តំបន់ការពារធម្មជាតិទាំង ១៩ ដែលស្ថិតនៅក្នុងនិងនៅជុំវិញតំបន់ដែនជម្រកសត្វព្រៃព្រៃឡង់ទាំង ៤ បានចុះល្បាតដើម្បីការពារ អភិរក្សធនធានធម្មជាតិនៅក្នុងដែនជម្រកសត្វព្រៃព្រៃឡង់។
បើតាមការប្រកាសព័ត៌មាននៅថ្ងៃទី 26 ខែមេសាឆ្នាំ 2020 បានឲ្យដឹងថា ក្រសួងបរិស្ថានសូមកោតសរសើរ និងថ្លែងអំណរគុណចំពោះសមាជិកនៃសហគមន៍តំបន់ការពារធម្មជាតិ ទាំង ១៩ ដែលស្ថិតនៅក្នុងនិងនៅជុំវិញតំបន់ដែនជម្រកសត្វព្រៃព្រៃឡង់ទាំង ៤ ខេត្ត (ខេត្តកំពង់ធំ ព្រះវិហារ ស្ទឹងត្រែង និងក្រចេះ) ដែលបានចូលរួមយ៉ាងសកម្មក្នុង ចុះល្បាតដើម្បីការពារ អភិរក្សធនធានធម្មជាតិនៅក្នុងដែនជម្រកសត្វព្រៃព្រៃឡង់ជាមួយមន្ត្រីឧទ្យានុរក្ស។
នេះគឺជាសកម្មភាពគំរូក្នុងកិច្ចសហការជាមួយអាជ្ញាធរពាក់ព័ន្ធជាពិសេសជាមួយក្រសួងបរិស្ថានដែលជាអ្នកមានសមត្ថកិច្ចគ្រប់គ្រងតំបន់ការពារធម្មជាតិ។
កាលពីឆ្នាំ ២០១៩ កន្លងទៅ ក្រសួងបរិស្ថានបានប្រកាសទទួលស្គាល់សហគមន៍តំបន់ការពារធម្មជាតិចំនួន ១៩ នៅក្នុងដែនជម្រកសត្វព្រៃព្រៃឡង់ ហើយពួកគាត់បានចូលរួមសហការជាមួយមន្ត្រីឧទ្យានុរក្សចុះល្បាតនៅតាមតំបន់នានា។
នេះគឺជាការផ្តល់នូវការទទួលខុសត្រូវក្នុងការគ្រប់គ្រងថែរក្សាអភិរក្សធនធានធម្មជាតិដែលជាសម្បត្តិដ៏មានតម្លៃសម្រាប់កម្ពុជានិងសម្រាប់ពួកគាត់។
គោលដៅរបស់រាជរដ្ឋាភិបាលកម្ពុជាគឺបង្កើតសេដ្ឋកិច្ចមូលដ្ឋាន បង្កើនចំណូលជូនប្រជា ពលរដ្ឋនិងបង្កើតមុខរបរថ្មីជូនប្រជាសហគមន៍ កាត់ផ្តាច់មុខរបរប្រពៃណីដែលពួកគាត់ធ្លាប់តែប្រកបរបរ ចូលព្រៃកាប់ឈើ និងបរបាញ់សត្វមកជាការផ្តល់សេវាសម្រាប់ទេសចរណ៍ធម្មជាតិ ឬការការពារធនធាន ធម្មជាតិឱ្យបានគង់វង្ស រក្សាឈើឈរដើម្បីលក់ឥណទានកាបូនស្ម័គ្រចិត្តដើម្បីយកថវិកាមកគាំពារលើ ការអភិរក្ស និងអភិវឌ្ឍសហគមន៍៕
ដោយ៖កូឡាប