ខេត្តតាកែវ ៖ កម្លាំងប៉ុស្តិ៍នគរបាលចោមចៅ៣ ខណ្ឌពោធិ៍សែនជ័យ បានឃាត់ខ្លួនជនសង្ស័យម្នាក់ជាឪពុក ពាក់ព័ន្ធករណីរំលោភសេពសន្ថវៈទៅលើកូនស្រីរបស់ខ្លួនចំនួន ០២នាក់ ។
នៅថ្ងៃអាទិត្យ ទី២៦ ខែមេសា ឆ្នាំ២០២០ កម្លាំងអធិការដ្ឋាននគរបាលស្រុកត្រាំកក់ បានទទួលជនសង្ស័យ០១ នាក់ ឈ្មោះ រឿង ផុស ភេទប្រុស អាយុ ៤៣ឆ្នាំ នៅភូមិត្រពាំងចក ឃុំត្រពាំងក្រញូង ស្រុកត្រាំកក់ ខេត្តតាកែវ ពីអធិការដ្ឋាននគរបាលខណ្ឌពោធិ៍សែនជ័យ នៃស្នងការដ្ឋាននគរបាលរាជធានីភ្នំពេញ ពាក់ព័ន្ធករណីរំលោភសេពសន្ថវៈទៅលើកូនស្រីរបស់ខ្លួនចំនួន ០២នាក់ មានឈ្មោះ រ វប អាយុ ២២ឆ្នាំ និងឈ្មោះ រ សក អាយុ ១៧ឆ្នាំ នៅចំណុចភូមិត្រពាំងចេក ឃុំត្រពាំងក្រញូង ស្រុកត្រាំកក់ ចាប់តាំងពីអំឡុងឆ្នាំ២០១៩ រហូតមកដល់ថ្ងៃទី២៥ ខែមេសា ឆ្នាំ២០២០ ទើបកម្លាំងប៉ុស្តិ៍នគរបាលចោមចៅ៣ ខណ្ឌពោធិ៍សែនជ័យ បានឃាត់ខ្លួនជនសង្ស័យខាងលើតាមពាក្យបណ្តឹងរបស់ជនរងគ្រោះនៅចំណុចផ្ទះជួលក្នុងសង្កាត់ចោមចៅ ខណ្ឌ ពោធិ៍សែនជ័យ រាជធានីភ្នំពេញ ។
សូមបញ្ជាក់ថា បុរសម្នាក់ ត្រូវបានសមត្ថកិច្ច ចុះទៅឃាត់ខ្លួន នៅបន្ទប់ជួល បន្ទាប់ពីកូនស្រីបង្កើតទាំង២នាក់ រត់មកប្តឹងសមត្ថកិច្ចឲ្យជួយអន្តរាគមន៍។ ការឃាត់ខ្លួននេះ ធ្វើទ្បើងកាលពីវេលាម៉ោង ២០និង៣០នាទីយប់ថ្ងៃទី២៥ ខែមេសា ឆ្នាំ២០២០ ត្រង់ចំណុចបន្ទប់ជួល ខណ្ឌពោធិ៍សែនជ័យ រាជធានីភ្នំពេញ។ ជនសង្ស័យជាឪពុកឈ្មោះ រឿង ផុស អាយុ៤៥ឆ្នាំ មុខរបរមិនប្រាកដ មានស្រុកកំណើតនៅខេត្តតាកែវ។ ចំណែកជរងគ្រោះ ជាកូនស្រីបង្កើតម្នាក់ មានអាយុ២០ឆ្នាំ និងម្នាក់ទៀតអាយុ១៧ឆ្នាំ។
ប្រភពព័ត៌មានពីនារីរងគ្រោះជាកូនប្អូន បានប្រាប់សមត្ថកិច្ចឲ្យដឹងថា រយ:ពេលមួយឆ្នាំចុងក្រោយនេះ ពេលខ្លួនទៅធ្វើការឲ្យគេ នៅត្រែងត្រយឹងខេត្តកំពង់ស្ពឺ ឪពុកនាងបានធ្វើសកម្មភាពចាប់រំលោភនាងជាបន្តបន្ទាប់ចំនួន០៣ដងមកហើយ ក្រោយពីធ្វើសកម្មភាពរួច តែងតែគំរាមថា បើហ៊ានប្រាប់គេ នឹងសម្លាប់ចោល។ ជាហេតុនាំឲ្យនាងគេចមកធ្វើការនៅភ្នំពេញ ជាមួយម្តាយ លុះថ្ងៃទី០៨ ខែមេសា ឆ្នាំ២០២០ ឪពុកនាងបានមករកនាងនៅផ្ទះជួល និងបានស្នាក់នៅបណ្តោះអាសន្នជាមួយនាង។ ពេលដែលស្នាក់នៅបន្ទប់ជួល ឪពុកនាងបានប៉ុនប៉ងចាប់នាងរំលោភទៀត តែនាងបានព្យាយាមគេចចេញ រួចមកជួបម្តាយនិយាយដើមទងប្រាប់គាត់ ទើបម្តាយនាំមកប្តឹងសមត្ថកិច្ចឲ្យចុះចាប់ឃាត់ខ្លួនឪពុក ហើយក៏បានបែកធ្លាយរឿង ធ្លាប់ចាប់បងស្រីរំលោភជាច្រើនដងដូចគ្នាផងដែល។
គួររំឭកថា ជនសង្ស័យ ដែលចាប់រំលោភកូនខ្លួនឯង ដល់ទៅ២នាក់ខាងលើនេះ គឺប្រពន្ធបានចុះចោលជិត២ឆ្នាំមកហើយ ដោយទ្រាំទង្វើប្តីមិនបាន តែងតែធ្វើបាប ទើបគេចចេញមកធ្វើការជាកម្មការិនីរោងចក្រ នៅភ្នំពេញ។ ស្ត្រីជាអតីតប្រពន្ធ បានឲ្យដឹងថា ករណីដែលអតីតប្តីគាត់ ចាប់រំលោភកូនស្រីទាំង២នាក់ គាត់មិនដែលដឹងឡើយ ទើបយប់ថ្ងៃទី២៥ ខែមេសា ឆ្នាំ២០២០ ក្រោយពីគាត់បានជួបកូនស្រី តាមផ្លូវឃើញកូនយំ ក៏ដេញដោលសួរ ទើបដឹងការពិត ក៏នាំកូនស្រីទៅប្តឹងសមត្ថកិច្ច ឲ្យចុះឃាត់ខ្លួនតែម្តង។
បច្ចុប្បន្នជនសង្ស័យខាងលើ កម្លាំងជំនាញកំពុងធ្វើការសាកសួរ ដើម្បីកសាងសំណុំរឿងបញ្ជូនទៅសាលាដំបូងខេត្តតាកែវ ចាត់ការតាមនីតិវិធី ៕
ដោយ៖កូឡាប