ប្រទេសកូរ៉េខាងត្បូងបានប្រកាសនៅតែរក្សាជំហររបស់ខ្លួនពីបញ្ហាសុខភាពរបស់មេដឹកនកូរ៉េខាងជើង ដោយបានលើកឡើងថា “លោក គីម ជុងអ៊ុននៅមានជីវិត និងសុខសប្បាយ”។ ការប្រកាសរបស់កូរ៉េខាងត្បូង កើតឡើងចំពេលមានការប៉ាន់ស្មានជាច្រើនថា មេដឹកនាំផ្តាច់ការរូបនោះបានស្លាប់ កាលពីថ្ងៃសៅរ៍កន្លងទៅ បន្ទាប៉ធ្វើការវះកាត់រួច។
ទីប្រឹក្សាគោលនយោបាយបរទេសរបស់កូរ៉េខាងត្បូង លោក Moon Chung-in បានថ្លែងប្រាប់ CNNដូច្នេះថា “ជំហររបស់រដ្ឋាភិបាលយើងគឺនៅតែដដែល។ លោក គីម ជុងអ៊ុននៅមានជីវិត និងសុខសប្បាយ”។ លោកនិយាយថា លោក គីម ជុងអ៊ុនកំពុងស្នាក់នៅក្នុងតំបន់ Wonsan ចាប់តាំងពីថ្ងៃទី ១៣ ខែមេសាមក។ រហូតមកដល់ពេលនេះ មិនមានការរកឃើញពីចលនាគួរឲ្យសង្ស័យថាមួយឡើយ។
មានការលើកឡើងសំនួរជាច្រើនអំពីសុខភាពរបស់គីម ជុងអ៊ុន ក្រោយពេលលោកខកខានការប្រារព្ធខួបកំណើតរបស់ជីតារបស់លោកកាលពីថ្ងៃទី ១៥ ខែមេសា។ គាត់ត្រូវបានគេឃើញមានវត្តមានក្នុងកិច្ចប្រជុំនយោបាយ ៤ថ្ងៃមុនពេលវិធីខួបកំណើតជីតាលោក។
សារពត៌មាន CNN ធ្លាប់បានរាយការណ៍ខាងដើមថា អាមេរិចកំពុងត្រួតពិនិត្យមើលពត៌មានចារកម្មថា “គីម ជុងអ៊ុនកំពុងស្ថិតក្នុងស្ថានភាពគ្រោះថ្នាក់ខ្លាំង ក្រោយពេលធ្វើការវះកាត់រួច”។ នេះបើតាមការបញ្ជាក់របស់មន្ត្រីអាមេរិច។
មន្ត្រីអាមេរិចម្នាកទៀតបានប្រាប់ CNN ថាពត៌មានពីសុខភាពរបស់ គីម ជុងអ៊ុនគឺគួរឲ្យទុកចិត្តបាន ប៉ុន្តែភាពតឹងរឹងរបស់ពួកគេ ធ្វើឲ្យមានការពិបាកវាយតម្លៃ។
ការថ្លែងរបស់មន្ត្រីអាមេរិច កើតឡើងក្រោយពេលមានសារពត៌មាន Daily NK ដែលជាកាសែតអនឡាយនៅកូរ៉េខាងត្បូង ដែលផ្តោតលើកូរ៉េខាងជើង បានចុះផ្សាយថា គីម ជុងអ៊ុនទទួលការវះកាត់បេះដូង ដោយសារតែការជក់បារីខ្លាំង ការធាត់ហួស និងការធ្វើការងារហួសកម្រិត។ កាសែតបន្តទៀតថា បច្ចុប្បន្ន មេដឹកនាំរូបនោះកំពុងទទួលការព្យាបាលក្នុងវីឡាមួយ ស្ថិតក្នុងតំបន់ Hyangsan។
ក្រោយពេលវាយតម្លៃថា ស្ថានភាពរបស់លោក គីមបានប្រសើរឡើង ក្រុមវេជ្ជសាស្ត្រភាគច្រើនដែលបានធ្វើការព្យាបាលលោក បានត្រឡប់ទៅកាន់ទីក្រុងព្យុងយ៉ាងវិញ កាលពីថ្ងៃទី ១៩ ខណៈដែលអ្នកមួយចំនួននៅបន្តត្រួតពិនិត្យការជាសះស្បើយរបស់គាត់។ នេះបើតាមប្រព័ន្ធផ្សព្វផ្សាយ។
សូមបញ្ជាក់ថា កាលពីថ្ងៃអាទិត្យម្សិលមិញនេះ កាសែតរដ្ឋកូរ៉េខាងជើង Rodong Sinmun បាននិយាយថា គីម ជុងអ៊ុន បានផ្ញើការអរគុណដល់កម្មករទាំងអស់ ដែលបានជួយក្នុងការជួសជុលទីក្រុង Samjiyon ឡើងវិញក្នុងប្រទេស៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia