ព្រៃវែង ៖ តៃកុងរថយន្ត ដឹកអ្នកដំណើរពីភ្នំពេញ-ស្រុកមេសាង បានធ្វើសកម្មភាពចាប់បង្ខំនារីម្នាក់រំលោភបានសម្រេចនៅលើរថយន្ត របស់ជនសង្ស័យ ក្រោយពីដាក់មនុស្សអស់ សល់តែនាងម្នាក់ចុងក្រោយគេដែលជិះលើរថយន្តឈ្នួល ជាមួយនឹងតៃកុងទ្បាន ។
ថ្ងៃទី២៦ ខែមេសា ឆ្នាំ២០២០ វេលាម៉ោង១២និង៤៣នាទី កម្លាំងប៉ុស្តិ៍នគរបាលរដ្ឋបាលឃុំច្រេស នៃអធិការដ្ឋាននគរបាលស្រុកមេសាង បន្ទាប់ពីបានទទួលបណ្ដឹងពីជនរងគ្រោះឈ្មោះ ឆ ខ ភេទស្រី អាយុ ៣៣ឆ្នាំ នៅស្រុករមាសហែក ខេត្តស្វាយរៀងថា ខ្លួនត្រូវបានឈ្មោះ ខុន រិត ភេទប្រុស អាយុ ២៩ឆ្នាំ នៅភូមិបឹង ឃុំច្រេស ស្រុកមេសាង មុខរបរតៃកុងរថយន្ត ដឹកអ្នកដំណើរពីភ្នំពេញ-ស្រុកមេសាង បានធ្វើសកម្មភាពចាប់បង្ខំខ្លួនរំលោភសេពសន្ថវៈបានសម្រេចនៅលើរថយន្ត របស់ជនសង្ស័យ ក្រោយពីដាក់មនុស្សអស់ សល់តែខ្លួន និងតៃកុងទ្បាន នៅវេលាម៉ោង ៩និង៣០នាទី យប់ថ្ងៃ២៥ ខែមេសា ឆ្នាំ២០២០ នៅចំណុចវាលលើផ្លូវលំ ក្នុងភូមិប្រហ៊ារ ឃុំច្រេស ស្រុកមេសាង ។
ក្រោយពីទទួលបណ្តឹងភ្លាម កម្លាំងជំនាញនគរបាលស្រុកមេសាង ចុះសហការជាមួយកម្លាំងនគរបាលប៉ុស្តិ៍រដ្ឋបាលឃុំច្រេស បើកការស៊ើបអង្កេត រហូតឈានដល់នាំខ្លួនជនសង្ស័យឈ្មោះ ខុន រិត និងរថយន្ត របស់ជនសង្ស័យ មកសាកសួរនៅប៉ុស្តិ៍នគរបាលរដ្ឋបាលឃុំច្រេស។
ក្រោយពីសួរនាំពីកម្លាំងជំនាញ ជនសង្ស័យបានសារភាពថាខ្លួនពិតជាបានចាប់បង្ខំរំលោភបានសម្រេចទៅលើជនរងគ្រោះនៅលើរថយន្តរបស់ខ្លួនពិតប្រាកដមែន កាលពីយប់ថ្ងៃ២៥ ខែមេសា ឆ្នាំ២០២០កន្លងទៅ ដោយសារជនរងគ្រោះជិះរថយន្តរបស់ខ្លួនពីភ្នំពេញ មកស្រុកកំណើត។
បច្ចុប្បន្នជនសង្ស័យ និងរថយន្តកម្លាំងជំនាញបានឃាត់ខ្លួននាំមកអធិការដ្ឋាននគរបាលស្រុកមេសាង ដើម្បីបន្តនីតិវិធី និងត្រៀមបញ្ជូនទៅការិយាល័យជំនាញស្នងការដ្ឋាននគរបាលខេត្តចាត់ការតាមច្បាប់ ៕
ដោយ ៖ កូឡាប
