ស្ទឹងត្រែង៖ កសិករម្នាក់ បានរៀបរាប់ពីដំណើរ នៃការផលិត និងការប្រែម៉ាស៊ីនគោយន្តកន្ត្រៃ ឲ្យទៅជាត្រាក់ទ័រ សម្រាប់បម្រើការក្នុងវិស័យកសិកម្មរបស់គាត់។ លោក គ្រី លាងពៅ វ័យ៤៥ឆ្នាំ ជាកសិកររស់នៅក្នុងភូមិសំអាង ឃុំសំអាង ស្រុកថាឡាបរិវ៉ាត់ ខេត្តស្ទឹងត្រែង។
កសិកររូបនេះ គិតឃើញ ចង់ផលិតត្រាក់ទ័រនេះ គឺដោយសារតែលោកយល់ថា ការធ្វើស្រែចំការ ដោយប្រើកម្លាំងមនុស្ស គឺត្រូវចំណាយពេល និងចំណាយកម្លាំងច្រើន លុយកាក់ក៏ច្រើនដែរ។
កសិករខាងលើ យល់ថា ដើម្បីជាការងាយស្រួលលោ កក៏បានយកម៉ាស៊ីនគោយន្តកន្ត្រៃ ទៅកែច្នៃជាកូនត្រាក់ទ័រវិញ ហើយកង់គោយន្ត និងតួពីត្រាក់ទ័រ ភ្ជាប់គ្នាច្នៃគ្រប់កន្លែង។
តាមការបញ្ជាក់ថា លោកត្រូវចំណាយពេល ត្រឹមតែមួយខែប៉ុណ្ណោះ ដើម្បីផលិតគោយន្តដោយខ្លួនឯង ។ ឯថវិកាចំណាយ ក្នុងការទិញសម្ភារ លោកមិនទាន់បានបញ្ជាក់ថាបានចំណាយអស់ប៉ុន្មាននៅឡើយទេ ។
លោកថា ត្រាក់ទ័រនេះ មានមុខងារពិសេស ៥យ៉ាង គឺមុខងារទី១ អាចភ្ជួរដីបានដោយផ្លែភ្ជួរ ភ្ជាប់នៅក្រោយផ្នែកខាងក្រោមនៃត្រាក់ទ័រ មុខងារទី២ គឺអាចរុញដីបានដោយមានផ្លែប៉ែល រុញនៅខាងមុខត្រាក់ទ័រ ទី៣ អាចសណ្តោងរ៉ឺម៉កបាន ទី៤ មានក្បាលបាញ់ថ្នាំសម្រាប់បាញ់ស្មៅ និងទី៥ អាចបាញ់ថ្នាំជំនួយរុក្ខជាតិ ។
លោកពៅ បានបង្ហាញពីមហិច្ឆតារបស់ខ្លួនថា នៅពេលលោកផលិតត្រាក់ទ័រមួយប្រភេទនេះ បានជោគជ័យ ហើយនោះលោកនឹងឈានទៅធ្វើការផលិតប្រភេទយន្តហោះបញ្ជាដោយតេឡេ សម្រាប់ស្រោចដំណាំ និងបាញ់ថ្នាំសម្លាប់សត្វល្អិតបន្ថែមទៀត ។
កសិករស្រឡាញ់កសិកម្មនិយាយថា គំនិតរបស់គាត់ខ្លួនឯង មិនគ្រប់គ្រាន់លោកត្រូវសិក្សាតាមយូធូបបន្ថែម សម្រាប់ច្នៃត្រាក់ទ័រ ប្រភេទនេះយកទៅបម្រើការក្នុងវិស័យកសិកម្ម បានដោយស្រួល ។ ចំពោះគ្រឿង បន្លាស់ត្រាក់ទ័រកែច្នៃ ពេលវាខូចមិនពិបាករកទិញពីផ្សារទេ។ បើគ្រឿងបន្លាស់ត្រាក់ទ័រទិញ ពីក្រុមហ៊ុនទើបពិបាករក៕ ដោយ ៖ សុខុម
