រូបភាពផ្កាយរណបបង្ហាញរថភ្លើងដែលប្រហែលជារបស់មេដឹកនាំកូរ៉េខាងជើង គីម ជុងអ៊ុន បានចតនៅឯបរិវេណរបស់គាត់ នៅឯឆ្នេរខាងកើតរបស់ប្រទេសនេះ ចាប់តាំងពីសប្តាហ៍មុន ចំពេលមានការសង្ស័យអំពីសុខភាព ខណៈព័ត៌មានចចាមអារាមជាច្រើនថា គាត់កំពុងឈឺធ្ងន់ធ្ងរ បន្ទាប់ពីវះកាត់បេះដូង។
រូបភាពដែលចេញផ្សាយដោយ 38 North ជាគេហទំព័រមួយដែលមានឯកទេសក្នុងការសិក្សារបស់កូរ៉េខាងជើង ហាក់ដូចជាគាំទ្ររបាយការណ៍ស៊ើបការណ៍របស់រដ្ឋាភិបាលកូរ៉េខាងត្បូង ដែលថា គឹម ជុងអ៊ុន មិននៅក្នុងរដ្ឋធានីព្យុងយ៉ាង នោះទេ។
ក្រុងសេអ៊ូលបានបញ្ជាក់ម្តងហើយម្តងទៀតថា មិនមានសញ្ញាមិនធម្មតាណាមួយ ដែលអាចបង្ហាញថា លោក គីម កំពុងមានបញ្ហាសុខភាពនោះទេ។
ប៉ុន្តែរបាយការណ៍ប្រព័ន្ធផ្សព្វផ្សាយដែលមិនបានបញ្ជាក់ ទាក់ទងអំពីសុខភាពរបស់លោក គីម បានផ្ទុះឡើងគឺបន្ទាប់ពីលោកបានខកខានបុណ្យរំឭកខួបថ្ងៃទី១៥ ខែមេសា សម្រាប់ថ្ងៃកំណើតគម្រប់អាយុ ១០៨ ឆ្នាំ នៃជីតារបស់លោកគឺស្ថាបនិកកូរ៉េខាងជើងលោក គីម អ៊ីលស៊ុង។
38 North និយាយថា រូបភាពពីផ្កាយរណបបង្ហាញថា រថភ្លើងត្រូវបានចតនៅស្ថានីយ៍រថភ្លើងមេដឹកនាំ ដែលសេវាបរិវេណ Wonsan របស់លោក គីម ចាប់តាំងពីថ្ងៃទី ២១ ខែមេសា មកម្លេះ។
គេហទំព័រនេះបាននិយាយថា រថភ្លើងប្រវែងប្រហែល ២៥០ ម៉ែត្រ មិនមានវត្តមានកាលពីថ្ងៃទី ១៥ ខែមេសា ទេ ប៉ុន្តែមានវត្តមាននៅថ្ងៃទី ២១ និង ២៣ ខែមេសា។
38 North បាននិយាយទៀតថា “បើទោះជាវត្តមានរបស់រថភ្លើងមិនបង្ហាញពីទីកន្លែងរបស់មេដឹកនាំកូរ៉េខាងជើង ឬចង្អុលបង្ហាញអំពីសុខភាពរបស់គាត់យ៉ាងណាក៏ដោយ ប៉ុន្តែវាផ្តល់ទំងន់ដល់របាយការណ៍ដែលថាលោក គីម កំពុងស្នាក់នៅតំបន់អភិជនមួយនៅឆ្នេរភាគខាងកើតរបស់ប្រទេសនេះ” ។
រូបភាពដែលត្រូវបានថតកាលថ្ងៃទី ២៣ ខែមេសា បានបង្ហាញថារថភ្លើងត្រូវបានគេកំណត់ឱ្យចាកចេញ។ ប៉ុន្តែគ្មានការចង្អុលបង្ហាញថាតើពេលណាការចាកចេញនោះអាចកើតឡើងទេ។
តាំងពីពេលនោះមក រដ្ឋាភិបាលកូរ៉េខាងត្បូងបានរក្សាការវាយតម្លៃរបស់ខ្លួនថា សុខភាពរបស់លោក គីម នៅតែដដែល។
ប្រព័ន្ធផ្សព្វផ្សាយរបស់កូរ៉េខាងត្បូងមួយចំនួនដែលដកស្រង់សំដីមន្ត្រីរដ្ឋាភិបាលដែលមិនស្គាល់អត្តសញ្ញាណ បានរាយការណ៍ថា លោក គីម បានកំពុងស្នាក់នៅឯទីក្រុង Wonsan។
ទោះយ៉ាងណា ប្រព័ន្ធផ្សព្វផ្សាយរដ្ឋរបស់កូរ៉េខាងជើង នៅតែរក្សាភាពស្ងាត់ស្ងៀមអំពីការសង្ស័យចេះសង្ស័យចុះ ទៅលើសុខភាពរបស់លោក គឹម។
កាលពីថ្ងៃសៅរ៍ ទីភ្នាក់ងារសារព័ត៌មានផ្លូវការរបស់កូរ៉េខាងជើង បានរាយការណ៍ថា លោក គីម បានទទួលសារស្វាគមន៍ពីប្រធានគណៈកម្មាធិការកណ្តាលនៃបក្សកុម្មុយនិស្តរុស្ស៊ី ដែលក៏បានជូនពរដល់លោក គីម មាន «សុខភាពល្អ និងសុភមង្គលក្នុងគ្រួសារ»។
នេះមិនមែនជាលើកទីមួយទេដែលលោក គីម បានបាត់ពីក្រសែភ្នែកសាធារណៈ ហើយការអវត្តមានកន្លងមកនៅក្នុងប្រព័ន្ធផ្សព្វផ្សាយរបស់រដ្ឋ ក៏បង្កឱ្យមានការសង្ស័យអំពីសុខភាពរបស់គាត់ដែរ។
នៅឆ្នាំ ២០១៤ ប្រព័ន្ធផ្សព្វផ្សាយរដ្ឋមិនបានរាយការណ៍ពីសកម្មភាពសាធារណៈណាមួយសម្រាប់លោកគីម អស់រយៈពេលប្រហែល ៦ សប្តាហ៍ មុនពេលគាត់បង្ហាញខ្លួនជាមួយដើរកាន់ឈើច្រត់ ដែលក្រោយមក ទីភ្នាក់ងារស៊ើបការណ៍សម្ងាត់របស់កូរ៉េខាងត្បូងបាននិយាយថា គាត់ត្រូវបានវះកាត់យកដុំពកចេញពីកជើងរបស់គាត់។
លោក គីម គឺជាជំនាន់ទី ៣ នៃគ្រួសាររបស់លោកដែលគ្រប់គ្រងប្រទេសកូរ៉េខាងជើង ហើយលោកក៏មិនបានខកខានព្រឹត្តិការណ៍ថ្ងៃទី១៥ ខែមេសា ដែលជាព្រឹត្តិការណ៍មួយដ៏សំខាន់បំផុតសម្រាប់កូរ៉េខាងជើង ចាប់តាំងពីបានឡើងកាន់អំណាច បន្ទាប់ពីមរណភាពឪពុករបស់លោក គឺលោក គីម ជុងអ៊ីល កាលពីចុងឆ្នាំ ២០១១ ។
សុខភាពរបស់លោក គីម គឺមានសារៈសំខាន់ខ្លាំងណាស់ ដោយសារតែការព្រួយបារម្ភថាជំងឺធ្ងន់ធ្ងរ ឬការស្លាប់របស់មេដឹកនាំ ដែលបង្ហាញការគោរពដូចព្រះពីសំណាក់ប្រជាជនកូរ៉េខាងជើងរាប់លាននាក់ អាចបង្កអស្ថិរភាពនៅក្នុងប្រទេសមានអាវុធនុយក្លេអ៊ែរ ដែលធ្វើឲ្យប្រជាជនជួបទុក្ខលំបាក៕
ប្រែសម្រួល៖ លឹម ហុង (ប្រភព៖ https://www.abc.net.au/)
ABC (Australian Broadcasting Corporation)
