ភ្នំពេញ៖ នៅព្រឹកថ្ងៃទី ២៧ ខែ មេសា ឆ្នាំ ២០២០ ទំព័រ ហ្វេសប៊ុកផ្លូវការរបស់ ឯកឧត្ដម ដួង ដារ៉ា ជំនួយការផ្ទាល់ សម្ដេចតេជោ ហ៊ុន សែន បានបង្ហោះព័ត៌មាន ពាក់ព័ន្ធនឹងករណី លោកថម ជនជាតិអាមេរិក ដែលរងគ្រោះបញ្ហាដីធ្លីនៅខេត្ត កំពត បានឲ្យដឹងថា ករណី របស់លោកថូម ឯកឧត្ដម បានគោរពរាយការណ៍ជូនសម្ដេចតេជោ ហ៊ុន សែន នាយករដ្ឋមន្ត្រី ។ ពេលនេះសម្ដេចតេជោ ហ៊ុន សែន កំពុងអន្តរាគមន៍ក្នុងរឿងនេះហើយ ។
ជាមួយគ្នានេះដែរ នៅលើ គណនី ហ្វេសប៊ុក របស់ លោកថម ព្រឹកនេះ ក៏បានរៀបរាប់អំពីការគោរព អរគុណ សម្ដេចតេជោ ហ៊ុន សែន និង អរគុណ ប្រជាពលរដ្ឋកម្ពុជា ទាំងអស់ ដែលបានជួយឈឺឆ្អាលនិង អន្តរាគមន៍ រកយុត្តិធម៌ជូនគាត់ ។
ឯកឧត្ដម ដួង ដារ៉ា បានថ្លែងថា អរគុណសន្តិភាព អរគុណសម្តេចតេជោ អរគុណបងប្អូនទាំងអស់គ្នា។ ករណីលោក ថម (O’BRIEN GEORGE ALLEN) នៅកំពត នៅពេលដែលខ្ញុំបានស្តាប់សាច់រឿងគាត់អស់ហើយ ខ្ញុំក៏បានជម្រាបជូនទៅ សម្តេចតេជោ ហ៊ុន សែន នាយករដ្ឋមន្ត្រី ដែលពេលនេះកំពុងស្ថិតនៅក្នុងអន្តរាគមន៍ផ្ទាល់ពីសម្តេចប្រមុខដឹកនាំ។
សម្តេចតេជោ ហ៊ុន សែន លោកតែងតែមានក្តីសណ្តោស និងព្រហ្មវិហារធម៍ធំធេងបំផុតទាំងចំពោះពលរដ្ឋខ្មែរ ក៏ដូចជាពលរដ្ឋបទេសដែលមកលេងស្រុកយើង ឬក៏មករស់នៅប្រកបការងារតូចធំនៅក្នុងប្រទេសយើង។ កម្ពុជាក្រតូចមែន តែបេះដូងកម្ពុជាពោរពេញដោយក្តីស្រឡាញ់មហាធំធេងបំផុត។ មានសម្តេចដឹកនាំប្រទេស គឺកម្ពុជានិងជនបរទេសមានភាពកក់ក្តៅគ្រប់ៗគ្នា។
សូមអរគុណបងប្អូនជនរួមជាតិ ដែលបានចូលរួមជួយជាទឹកចិត្ត និងផ្តល់ក្តីបារម្ភចំពោះលោកថម ។ យើងទុកភារកិច្ចនេះជូនប្រមុខដឹកនាំដើម្បីដោះស្រាយជូនគាត់។ ហើយក៏សូមជូនពរលោកថម និងបងប្អូនទាំងអស់រស់នៅប្រកបការងារបានសុខសប្បាយនៅក្នុងប្រទេសកម្ពុជា។
យើងចូលរួមកសាងអំពើល្អ ចែករំលែកក្តីស្រឡាញ់ និងស្នាមញញឹមគ្រប់ទីកន្លែង ដោយគ្មានការរើសអើង។
សូមបញ្ជាក់ថា លោកវីលាមប្រធានគណបក្សខ្មែរក្រោកនិងជាសមាជិកឧត្តមក្រុមប្រឹក្សាពិគ្រោះនិងផ្ដល់យោបល់នៅថ្ងៃទី ២១ ខែមេសាបានសរសេរសារនៅលើផេកហ្វេសប៊ុកផ្លូវការថា «សុំកុំស្រេកឃ្លានប្រយោជន៍រហូតសុខចិត្តបោកជនជាតិបរទេសដែលនាំអោយជាតិអាប់អោនកេរ្តិ៍ឈ្មោះ» ។
លោកបន្តថា ជនជាតិអាមេរិក ឈ្មោះ ថម បានមកប្ដឹងខ្ញុំដើម្បីឲ្យខ្ញុំជួយអន្តរាគមន៍និងពិនិត្យមើលចំណាត់ការរបស់ព្រះរាជអាជ្ញាជុំវិញការតម្កល់រឿងឥតចាត់ការ ពាក់ព័ន្ធករណីជនជាតិខ្មែរ២ នាក់ប្ដីប្រពន្ធឆបោកប្រាក់របស់គាត់អស់ពីខ្លួន ។
ការសាកសួរបឋម នឹងជាការអះអាងរបស់ជនរងគ្រោះ ជនជាតិបរទេសរូបនេះ មានឈ្មោះពេញ obrien georger allen ជនជាតិអាមេរិកកាំង ជាអ្នកនេសាទម្នាក់នៅ រដ្ឋអាឡាស្កា និងជាមនុស្សកំព្រា ម្ដាយឪពុកស្លាប់អស់ គ្មានបងប្អូន ប្រពន្ធកូនឡើយ ។ គាត់បានស្រឡាញ់កម្ពុជានឹងចង់រស់នៅរហូតដល់ស្លាប់នៅកម្ពុជាទើបសម្រេចចិត្តលក់ទូកនេសាទនិងទ្រព្យសម្បត្តិបានសរុបប្រមាណ ជាង៣០ម៉ឺនដុល្លារ និងពឹងពាក់ប្អូនធម៌ជាជនជាតិខ្មែរ ដើម្បីជួយឈរឈ្មោះទិញដី ដើម្បីបានរស់នៅខ្មែរ ក្រោយមកជនជាតិខ្មែរនោះបានឆបោកគាត់ យកដីទាំងអស់ ធ្វើឲ្យគាត់បានរលាយគ្រប់យ៉ាងហើយគាត់បានប្ដឹងទៅតុលាការដើម្បីរកយុត្តិធម៌ តែតុលាការបានតម្កល់រឿងឥតចាត់ការ ។
លោកថា ករណីនេះខ្ញុំកំពុងពិនិត្យលទ្ធភាពក្នុងការស៊ើបអង្កេតបន្ថែម ដើម្បីរកភស្តុតាងរៀបចំសំណុំរឿងទៅសម្ដេចតេជោ ប្រសិនជារកឃើញថាព្រះរាជអាជ្ញារងពិតជាតម្កល់រឿងឥតចាត់ការដោយភាពមិនប្រក្រតីណាមួយនៃការអនុវត្តន៍ច្បាប់ ដោយឡែកខ្ញុំបានណែនាំដល់គាត់អោយប្ដឹងបន្តទៅសាលាឧទ្ទរណ៍បន្ថែមទៀតដើម្បីជំទាស់ការតម្កល់រឿងរបស់តំណាងអយ្យការសាលាដំបូងខេត្តកំពត ។
ពាក់ព័ន្ធករណីខាងលើនេះអយ្យការអមសាលាដំបូងខេត្តកំពត នៅថ្ងៃទី ២១ ខែមេសា បានចេញសេចក្តីថ្លែងការណ៍ដោយបានលើកឡើងថាក្នុងរយៈពេលប៉ុន្មានថ្ងៃនេះនៅក្នុងបណ្ដាញទំនាក់ទំនងសង្គមមានការផ្សព្វផ្សាយថាតំណាងអយ្យការអមសាលាដំបូងខេត្តកំពតមិនចាត់ការទៅលើបណ្ដឹងរបស់ឈ្មោះ ថម។
អ្នកនាំពាក្យនៃអយ្យការអមសាលាដំបូងបានបញ្ជាក់ថា អយ្យការអមសាលាដំបូងខេត្តកំពត បានទទួលពាក្យបណ្ដឹងរបស់ឈ្មោះថម ដែលបានប្ដឹងលើឈ្មោះអ៊ុកបញ្ញានិងប្រពន្ធឈ្មោះគឹមចន្ថាពីបទរំលោភលើទំនុកចិត្តនិងបទធ្វើឲ្យខូចខាតដោយចេតនាប្រព្រឹត្តនៅភូមិកំពង់សំរោងខាងត្បូងឃុំកំពង់សំរោងស្រុកទឹកឈូខេត្តកំពតកាលពីអំឡុងឆ្នាំ 2016 នៅឆ្នាំ 2017។ ក្រោយពីទទួលបានពាក្យបណ្ដឹងនិងបានអង្កេតបឋមរូចមកឃើញថា ពុំមានធាតុផ្សំគ្រប់គ្រាន់ដើម្បីធ្វើការចោទប្រកាន់ទៅលើឈ្មោះអ៊ុកបញ្ញានិងប្រពន្ធឈ្មោះគឹមចន្ថាឡើយ។ អង្គហេតុខាងលើនេះគឺជាវិវាទរដ្ឋប្បវេណីសុទ្ធ សាធ ដែលជាហេតុធ្វើឲ្យតំណាងអយ្យការអមសាលាដំបូងខេត្តកំពតសម្រេចតម្កល់រឿងទុកឥតចាត់ការ ។ ចំពោះអង្គហេតុខាងលើភាគីទាំងពីរបាននិងកំពុងប្ដឹងផ្ដល់នៅតុលាការរដ្ឋប្បវេណី។
យោងតាមគណនីហ្វេសប៊ុកឈ្មោះ Tom Obriengeorgerallen គឺជាជនជាតិអាមេរិកបានមករស់នៅកម្ពុជា ដោយគ្មានក្រុមគ្រួសារ និងបានលក់ទ្រព្យសម្បតិ្តរបស់លោកទាំងអស់នៅក្នុងប្រទេសលោក ដោយសង្ឍឹមថាបានរស់នៅក្នុងផ្ទះក្តីស្រមៃបានរៀបរាប់ពីជីវិតជូរចត់របស់លោក ។គាត់បានលើកឡើងដែលមានន័យជាភាសាខ្មែរថា៖ “កម្ពុជាខ្ញុំស្រឡាញ់អ្នក ។
ជីវិតរបស់ខ្ញុំកំពុងជួបទុក្ខនៅក្នុងខេត្តកំពត ។ ខ្ញុំបានចាកចេញពីប្រទេសរបស់ខ្ញុំ ។ខ្ញុំបានលក់ទ្រព្យសម្បត្តិរបស់ខ្ញុំទាំងអស់ដើម្បីមករស់នៅកម្ពុជា ។ ជីវិតរបស់ខ្ញុំត្រូវបានរក្សានៅទីនេះ ។ ខ្ញុំបានកសាងផ្ទះក្នុងក្តីស្រមៃរបស់ខ្ញុំនៅក្បែរមាត់ព្រែកកំពត ។ នៅមុនពេលដែលខ្ញុំចូលនិវត្តន៍ ខ្ញុំគឺជាអ្នកនេសាទម្នាក់នៅក្នុងរដ្ឋអាឡាស្កា ។ ខ្ញុំបានខំប្រឹងធ្វើការយ៉ាងខ្លាំងស្ទើរពេញមួយជីវិត” ។
លោកបាននិយាយពីប្រវត្តិថា៖ “ខ្ញុំបានទុកចិត្តភ្នាក់ងារអចលនទ្រព្យនៅក្នុងតំបន់ ហើយបានទិញដី៦ប្លង់នៅក្បែរព្រែកនោះ ដើម្បីសង់ផ្ទះក្នុងក្តីស្រមៃរបស់ខ្ញុំកាលពី៤ឆ្នាំមុន ។ ខ្ញុំបានស្គាល់មនុស្សល្អៗ និងមានមិត្តភក្តិល្អជាច្រើន នៅក្នុងសហគមន៍នេសាទឥស្លាមនៅក្នុងភូមិ ក៏ដូចជាបានជួយតាមការស្នើរសុំរបស់ពួកគេជាច្រើនផងដែរ”លោកបានបន្ថែមថា៖ “ជាសំណាងអាក្រក់ ភ្នាក់ងារអចលនទ្រព្យនោះបានលក់ដីរបស់គាត់ដោយគ្មានលិខិត ឯកសារពិតប្រាកដ ដែលវាបានផ្លាស់ប្តូរពីមិត្តភាពទៅជាការបោកប្រាស់ទៅវិញ ។ អ្វីដែលកាន់តែអាក្រក់ជានេះ គឺគាត់ជាភ្នាក់ងារនៅកម្ពុជាដែលមានការបើកដំណើរការតាមច្បាប់ត្រឹមត្រូវ ហើយបន្តដំណើរការមកដល់បច្ចុប្បន្ន ។
បទឧក្រិដ្ឋដ៏ភ្ញាក់ផ្អើលនេះដូចជាបានសម្លាប់បុរសវ័យចំណាស់ដ៏ស្មោះត្រង់ម្នាក់នេះអ៊ីចឹង ដូច្នេះភ្នាក់ងារនេះគឺមិនត្រឹមតែបានបោកប្រាស់ខ្ញុំប៉ុណ្ណោះទេ ប៉ុន្តែវាក៏ជាករណីបំផ្លាញទំនុកចិត្តប្រជាជនមកពីអាឡាស្កា និង ខេត្តកំពត ពីព្រោះ បទល្មើសដ៏អាក្រក់នឹងក្លាយជាការប្រមានចំពោះជនបរទស និង អាចចែកចាយជាសាធារណៈនៅក្នុងកាសែត និង ទូរទស្សន៍ ជាសាកល ជាពិសេសសម្រាប់ពេលដែលបណ្តាញទំនាក់ទំនងសង្គមមានការរីកសាយលឿនថែមទៀត”ចុងបញ្ជប់លោកបានលើកឡើងថា៖ “ប្រហែលជា ការពិតនឹងក្លាយជាដែកគោលនៅក្នុងមឈូស ចំពោះទង្វើដ៏អសីលធម៌របស់ភ្នាក់ងារអចលនទ្រព្យនេះ ។ ខ្ញុំដឹងថាគាត់ជានរណា ដូចគ្នានឹងប្រជាជននៅក្នុងខេត្តកំពត ។ ខ្ញុំពិតជាសោកស្តាយចំពោះរឿងរ៉ាវរបស់ខ្ញុំ ខ្ញុំស្រឡាញ់ប្រទេសកម្ពុជា។
ខ្ញុំគិតថាខ្ញុំអាចចំណាយជីវិតនៅទីនេះ ខ្ញុំគ្មានក្រុមគ្រួសារទេ ខ្ញុំរស់នៅម្នាក់ឯង ហើយខ្ញុំសង្ឃឹមថាកម្ពុជាអាចផ្តល់ជីវិតសន្តិភាពសម្រាប់ខ្ញុំ ប៉ុន្តែអ្វីគ្រប់យ៉ាងគ្រាន់តែជាក្តីសុបិនសម្រាប់ខ្ញុំ ។ ខ្ញុំត្រូវការរដ្ឋាភិបាល ឬ ច្បាប់កម្ពុជា សូមជួយខ្ញុំស្វែងរកយុត្តិធម៌”៕ ដោយ៖កូឡាប