ដូចដែលបងប្អូនប្រិយមិត្តបានភ្ញាក់ផ្អើលរួចហើយ ចំពោះអ្នកសារព័ត៌មានមួយរូប ដែលគេស្គាល់ថាជាចាងហ្វាងគេហទំព័រ ចក្រវាឡ ធីវីអនឡាញ (www.ckvtvonline.com) បានទទួលរងការរិះគន់យ៉ាងខ្លាំងកាលពីពេលកន្លងទៅនេះ ចំពោះសកម្មភាពស្ទាក់ឃាត់ទុករថយន្តដឹកជ្រូក១គ្រឿងធ្វើដូចខ្លួនជាសមត្ថកិច្ច ទាក់ទងរឿងឆ្ងល់ឡានមានផ្លាកលេខ២ខុសគ្នា (មុខ និងក្រោយ) និងបានប្រើពាក្យសម្តីហាក់មិនសមរម្យ ខ្វះវិជ្ជាជីវៈជាអ្នកសារព័ត៌មាន ខណៈមានតួនាទីបានត្រឹមមានសិទ្ធិផ្សាយព័ត៌មានប៉ុណ្ណោះនោះ។
ដោយសារនៅតែសង្កេតឃើញសកម្មភាពផ្សាយព័ត៌មានរបស់លោក ចាន់ រិទ្ធី មិនកែប្រែឥរិយាបទក្នុងការប្រើប្រាស់ពាក្យសម្តីនេះ ក្រសួងព័ត៌មាន ក៏ហៅមកព្រមាន និង ឲ្យធ្វើកិច្ចសន្យា ឈប់ផ្សាយខុសពីក្រមសីលធម៌ និង វិជ្ជាជីវៈអ្នកសារព័ត៌មាន ចំនួន២ដងរួចមកហើយផងដែរ ។
ដោយឡែក នៅថ្ងៃទី២៧ ខែមេសា ឆ្នាំ២០២០ ក្រសួងព័ត៌មានបានចេញប្រកាសបិទអាជ្ញាប័ណ្ណធ្វើអាជីវកម្មលើគេហទំព័ររបស់លោក ចាន់ រិទ្ធី តាមរយៈសេចក្តីសម្រេចដូចខាងក្រោម៖
ប្រការ១ – លុបប្រកាសលេខ២៨៣ ព.មប្រក ចុះថ្ងៃទី១ ខែសីហា ឆ្នាំ២០១៧ របស់ក្រសួងព័ត៌មាន ដែលអនុញ្ញាតឲ្យលោក ចាន់ ប្ញទ្ធី បើកគេហទំព័រឈ្មោះ ចក្រវាឡ ធីវីអនឡាញ www.ckvtvonline.com ដោយម្ចាស់អាជ្ញាប័ណ្ណបានធ្វើសកម្មភាពយកព័ត៌មាន និងផ្សព្វផ្សយព័ត៌មានរំលោភយ៉ាងធ្ងន់ធ្ងរខាងផ្នែកវិជ្ជាជីវៈអ្នកសារព័ត៌មាន នាំឲ្យប៉ះពាល់ដល់សណ្តាប់ធ្នាប់សាធារណៈ និងបានបំពានលើកិច្ចសន្យាជាមួយក្រសួងព័ត៌មាន។
ប្រការ២ – ប្រកាស និងលិខិតទាំងឡាយណាដែលមានខ្លឹមសារផ្ទុយពីប្រកាសនេះត្រូវទុកជានិរាករណ៍។
ប្រការ៣ – អ្នកនាយកដ្ឋានព័ត៌មាន និងសោតទស្សន៍ អគ្គនាយកដ្ឋានរដ្ឋបាល និងហិរញ្ញវត្ថុ ខុទ្ធកាល័យក្រសួងព័ត៌មាន មន្ទីរព័ត៌មានរាជធានីខេត្ត សាមីខ្លួន និងសមត្ថកិច្ចពាក់ព័ន្ធ ត្រូវអនុវត្តប្រកាសនេះតាមភារកិច្ចរៀងៗខ្លួន។
ប្រការ៤ – ប្រកាសនេះត្រូវអនុវត្តចាប់ពីថ្ងៃចុះហត្ថលេខានេះតទៅ៕ ដោយ៖ លឹម ហុង
