រថយន្តម៊ែរសឺដែសស៊េរីទំនើប១គ្រឿង មិនដឹងថាបើកបរក្នុងស្ថានភាពយ៉ាងណាទេ បានបើកបុកទៅនឹងម៉ូតូ១គ្រឿងយ៉ាងពេញទំហឹង បណ្តាលឲ្យម្ចាស់ម៉ូតូរងរបួសធ្ងន់ធ្ងរ ត្រូវបានបញ្ចូនទៅសង្គ្រោះនៅមន្ទីរពេទ្យភ្លាមៗ។ ហេតុការណ៍គ្រោះថ្នាក់ចរាចរណ៍នេះ បានកើតឡើងនៅពីវេលាម៉ោង ២ និង ៣០ នាទី រសៀលថ្ងៃទី២៧ ខែមេសា ឆ្នាំ២០២០ នេះ ស្ថិតនៅតាមបណ្តោយផ្លូវ១៦៩ ទល់មុខសាលាបាក់ទូក ក្នុងសង្កាត់វាល់វង់ ខណ្ឌ៧មករា រាជធានីភ្នំពេញ។
រថយន្តសេរ៊ីទំនើបនេះ ម៉ាកម៊ែរសឺដែស ពណ៌ផ្កាឈូក ពាក់ផ្លាកលេខ ភ្នំពេញ 2BB-9966 (ម្ចាស់រថយន្តជិះម្នាក់ឯងរត់គេចខ្លួនបាត់ក្រោយពេលកើតហេតុ) ។ ចំណែកម៉ូតូរងគ្រោះត្រូវបានស្គាល់ម៉ាកហុងដា PCX ពាក់ផ្លាកលេខ ភ្នំពេញ 1FG-7755 ម្ចាស់រងគ្រោះធ្ងន់ ជិះម្នាក់ឯង ។
បើតាមសាក្សីនៅកន្លែងកើតហេតុ បានប្រាប់អ្នកសារព័ត៌មានស៊ីអ៊ីអិនឲ្យដឹងថា រថយន្តបង្កខាងលើនេះ បានបើកបោះពួយយ៉ាងលឿន និងបានបុកម៉ូតូ PCX ១គ្រឿង បណ្តាលឲ្យទាំងម្ចាស់ និងម៉ូតូខ្ទាតជាច្រើនម៉ែត្រ រួចជ្រុលទៅបុកនឹងក្បាលថ្មពុះចែកទ្រូងផ្លូវ បណ្តាលឲ្យបាក់រលំខ្ទាតចេញពីគ្នាទៅមុខលែងរួច។
ក្រោយពេលកើតហេតុ កម្លាំងសមត្ថកិច្ចមូលដ្ឋាន និងកម្លាំងជំនាញប៉ូលិសចរាចរណ៍ក្រុង បានមកដល់កន្លែងកើតហេតុ ជាមួយរថយន្តស្ទួច១គ្រឿង ដើម្បីស្ទួចយករថយន្តបង្ក និងព្រមទាំងម៉ូតូជនរងគ្រោះ ទៅរក្សាទុកនៅស្នងការក្រុង ដើម្បីរង់ចាំការដោះស្រាយជាមួយភាគីម្ចាស់ម៉ូតូ និងការបង្កការខូចសម្បត្តិរដ្ឋ តាមផ្លូវច្បាប់៕ ដោយ៖ លឹមហុង