បាត់ដំបង៖កសិករអ្នកចឹញ្ចឹមមាន់នៅក្នុងស្រុកបាណន់ បានប្រាប់ឲ្យដឹងថា ការចិញ្ចឹមមាន់កូនកាត់ ធ្វើឲ្យចំណេញពេលវេលានៃការចិញ្ចឹមមានតម្លៃគួសម ហើយមានអ្នកគាំទ្រច្រើនផងដែរ។
លោក ធី រ៉ាវុធ ម្ចាស់កសិកដ្ឋានចិញ្ចឹមមាន់ ស្ថិតក្នុងភូមិបត់សាលា ឃុំឈើទាល ស្រុកបាណន់ បានប្រាប់ឲ្យដឹងថា គាត់បានចាប់ផ្ដើមចិញ្ចឹមមាន់កូនកាត់នេះ ចាប់តាំងពីឆ្នាំ២០១៩ នៅលើផ្ទៃដីជាង ១ហិកតា ដោយមាន់កូនកាត់នេះ ត្រូវយកមេមាន់ស្រែ បង្កាត់ជាមួយមាន់ឈ្មួលមកពីក្រៅប្រទេស (មាន់ពីរសាសន៍)។ ដោយឲ្យវាស៊ីចំណីសម្រេចដាក់មួយថ្ងៃ២ដង រួមទាំងទឹកដាក់ឲ្យផឹកជាប់រហូត ២៤ម៉ោង ហើយក៏មានឲ្យស៊ីថ្នាំវីតាមីន និងថ្នាំវ៉ាក់សាំងផងដែរ។ ការចាប់ផ្ដើមដំបូង គឺគាត់ចិញ្ចឹមត្រឹម ១០០០ក្បាល ប៉ុន្តែដោយមានតម្រូវការទីផ្សារកាន់តែច្រើន ទើបបង្កើនការចិញ្ចឹមដល់ ៥០០០ក្បាលទៅ ១ម៉ឺនក្បាល រហូតមកដល់បច្ចុប្បន្នគាត់ចិញ្ចឹមដល់ ៣ម៉ឺនក្បាលហើយ គម្រោងជាបន្តនឹងបង្កើនដល់ច្រើនរាប់សែនក្បាលទៀត ។
លោក ធី រ៉ាវុធ បានបញ្ជាក់ថា ខណៈពិភពលោក ក៏ដូចជាប្រទេសកម្ពុជា មានការឆ្លងរីករាលដាលជំងឺកូវីដ១៩ ផងដែរ។ បញ្ហានេះគឺធ្វើឲ្យតម្រូវការទីផ្សារធ្លាក់ចុះ និងតម្លៃក៏ធ្លាក់ចុះដែរ។ បញ្ហាកូវីដ១៩នេះ ធ្វើឲ្យអ្នកចិញ្ចឹមខ្លះឈប់ចិញ្ចឹម ដែលវាបានផ្ដល់ឱកាសឲ្យគាត់បន្ថែមការចិញ្ចឹមកាន់តែច្រើន។
បុរសជនជាតិជប៉ុនម្នាក់ឈ្មោះ ខាសាគិ ម៉ាសាមូតុ ជាដៃគូសហការចិញ្ចឹមមាន់កូនកាត់ ជាមួយលោក រ៉ាវុធ បានប្រាប់ឲ្យដឹង
ថា ការសហការចិញ្ចឹមមាន់កូនកាត់នៅពេលនេះ ក្នុងគោលបំណងចង់ជួយអភិវឌ្ឍន៍នៅតំបន់នេះ ក៏ដូចជាផ្ដល់ឱកាសការងារ ដល់ពលរដ្ឋក្នុងតំបន់នេះផងដែរ។
គួរបញ្ជាក់ផងដែរថា កសិកដ្ឋានអានស៊ីនេះ មិនត្រឹមតែចិញ្ចឹមមាន់កូនកាត់នោះទេ គឺមានចិញ្ចឹមសត្វគោជាច្រើនរយក្បាលទៀត ហើយកសិកដ្ឋាននេះ ក៏បានបង្កើតជាការងារដល់ពលរដ្ឋនៅតំបន់នោះ មានការងារធ្វើ និងទទួលបានប្រាក់ខែចាប់ពី ១លានរៀល ទៅដល់ជាង ១លានរៀល ៕ដោយ៖អ៊ុងសារុំ
