បន្ទាយមានជ័យ ៖ នៅថ្ងៃចន្ទនេះ មានគ្រោះថ្នាក់ដោយគ្រាប់សំណល់ជាតិផ្ទុះពីសង្គ្រាម មួយករណីដែលបណ្តាលឱ្យស្លាប់ស្ត្រីអាយុ២៥ឆ្នាំម្នាក់ និងបង្ករបួសកុមារអាយុ២ឆ្នាំម្នាក់ អាយុ១២ឆ្នាំម្នាក់ និងស្ត្រីអាយុ៣៥ឆ្នាំម្នាក់។
អាជ្ញាធរមីនបានឲ្យដឹងថា នៅព្រឹកថ្ងៃទី២៧ ខែមេសា ឆ្នាំ២០២០ វេលាម៉ោង១១និង០០នាទី មានករណីផ្ទុះគ្រាប់បេ១គ្រាប់ នៅភូមិកណ្តាល ឃុំសឹង្ហ ស្រុកអូរជ្រៅ ខេត្តបន្ទាយមានជ័យ បណ្តាលឲ្យរងរបួស៣នាក់ និងស្លាប់ម្នាក់។ មូលហេតុ ជនរងគ្រោះ បានបបួលគ្នាមករកបេះផ្លែព្រីង ហើយបានប្រទះឃើញគ្រាប់នៅលើដំបូក យកមកគប់លេងបណ្តាលឲ្យផ្ទុះ។
ជនរងគ្រោះទាំងនោះរួមមាន: ១.ឈ្មោះ ជា សរ ភេទស្រី អាយុ២៥ឆ្នាំ នៅភូមិកំពង់ក្តី ឃុំគោកធ្លកលើ ស្រុកជីក្រែង ខេត្តសៀមរាប (ស្លាប់)។ ២.ឈ្មោះ ជា ស្រីមួយ ភេទស្រី អាយុ៣៤ឆ្នាំ មានទីលំនៅភូមិកំពង់ក្តី ឃុំគោកធ្លកលើ ស្រុកជីក្រែង ខេត្តសៀមរាប (រងរបួសស្រាល)។ ៣.ឈ្មោះ សុខ បញ្ញា ភេទប្រុស អាយុ១២ឆ្នាំ នៅភូមិកំពង់ក្តី ឃុំគោកធ្លកលើ ស្រុកជីក្រែង ខេត្តសៀមរាប (រងរបួសធ្ងន់)។ ៤.ឈ្មោះ គា សំណាង ភេទប្រុស អាយុ២ឆ្នាំ មានទីលំនៅភូមិកំពង់ក្តី ឃុំគោកធ្លកលើ ស្រុកជីក្រែខេត្តសៀមរាប (រងរបួសស្រាល)។ បច្ចុប្បន្នជនរងគ្រោះ ត្រូវបានបញ្ជូនទៅមន្ទីរពេទ្យមណ្ឌលសុខភាពសិង្ហ និងមន្ទីរពេទ្យខេត្ត។
ឯកឧត្តមហេង រតនា អគ្គនាយកស៊ីម៉ាក់ តាមរយៈហ្វេសប៊ុកផ្លូវការ បានសូមសំដែងការសោកស្តាយ ក្នុងការបាត់បង់អាយុជីវិត និងបង្ករបួសដោយគ្រាប់សំណល់ជាតិផ្ទុះពីសង្គ្រាមនេះ។ សូមបងប្អូនមេត្តាប្រុងប្រយ័ត្ន និងចៀសវាងដាច់ខាត ក្នុងការវាយដុំ និងប៉ះពាល់គ្រាប់សំណល់ជាតិផ្ទុះ ពីសង្គ្រាមគ្រប់ប្រភេទ៕ដោយ៖កូឡាប