ភ្នំពេញ ៖ ចាប់ពីថ្ងៃទី ១ ខែកក្កដា ឆ្នាំ ២០២០ អគ្គនាយកដ្ឋានអន្តោប្រវេសន៍ នឹងអនុវត្តវិធានការមិនផ្ដល់ទិដ្ឋាការបន្តពេលស្នាក់នៅក្នុងប្រទេសជាណាចក្រកម្ពុជា ចំពោះជនបរទេសណាដែលគ្មានឈ្មោះក្នុងប្រព័ន្ធគ្រប់គ្រងវត្តមានជនបរទេសក្នុងព្រះរាជាណាចក្រកម្ពុជា។
ឯកឧត្តមនាយឧត្តមសេនីយ៍ គៀត ច័ន្ទថារិទ្ធ អគ្គនាយកនៃអគ្គនាយកដ្ឋានអន្តោប្រវេសន៍បានចេញលិខិតជម្រាបជូនដល់ឯកឧត្តមឧត្តមសេនីយ៍ឯកអគ្គស្នងការរងនិងជាស្នងការនគរបាលរាជធានីភ្នំពេញនិងលោកស្នងការនគរបាលខេត្តទាំងអស់ ក្នុងកម្មវត្ថុស្ដីពីការអនុវត្តន៍ វិធានការមិនផ្ដល់ទិដ្ឋាការបន្ត រយៈពេលស្នាក់នៅ នៅក្នុងព្រះរាជាណាចក្រកម្ពុចំពោះជនបរទេសណាដែលគ្មានឈ្មោះក្នុងប្រព័ន្ធគ្រប់គ្រងវត្តមានជនបរទេសក្នុងព្រះរាជាណាចក្រកម្ពុជា។
ការចេញលិខិតនេះយោងតាមចំណារឯកភាពដ៏ខ្ពង់ខ្ពស់របស់សម្ដេចក្រឡាហោមសខេងឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ។
អគ្គនាយកដ្ឋានអន្តោប្រវេសន៍សូមស្នើដល់ឯកឧត្តមនិងលោកស្នងការនគរបាលរាជធានីខេត្តទាំងអស់ធ្វើការផ្សព្វផ្សាយគោលការណ៍ណែនាំជូនដល់ម្ចាស់ឬអ្នកកាន់កាប់លំនៅឋានគ្រប់ប្រភេទឲ្យធ្វើសេចក្ដីរាយការណ៍អំពីវត្តមានជនប្រទេសដែលបានស្នាក់នៅក្នុងលំនៅឋានរបស់ខ្លួនទៅក្នុងប្រព័ន្ធគ្រប់គ្រងវត្តមានជនបរទេសក្នុងព្រះរាជាណាចក្រកម្ពុជាដើម្បីទទួលបានការអនុញ្ញាតឱ្យបន្តរយៈពេលស្នាក់នៅ។
ពាក់ព័ន្ធករណីនេះដែរ ផែនការងារឣន្តោប្រវេសន៍ នៃស្នងការដ្ឋាននគរបាលខេត្តកំពត មានកិត្តិយសសូមជម្រាបជូន ៖ ម្ចាស់ផ្ទះសំណាក់ សណ្ឋាគារ រោងចក្រ កាស៊ីណូ ម្ចាស់ផ្ទះជួល លំនៅឋាន និងកន្លែងផ្សេងៗដែលមានជនបរទេស បាននិងកំពុងស្នាក់នៅ និងធ្វើការក្នុងខេត្តកំពតទាំងមូលឣោយបានជ្រាបថា៖
ដោយមានសំណើសុំគោលការណ៍ ឣនុវត្តន៍វិធានការមិនផ្តល់ទិដ្ឋាការបន្តរយៈពេលស្នាក់នៅក្នុងព្រះរាជាណាចក្រកម្ពុជាចំពោះជនបរទេសណាដែលគ្មានឈ្មោះក្នុងប្រព័ន្ធគ្រប់គ្រងវត្តមានជនបរទេសក្នុងព្រះរាជាណាចក្រកម្ពុជា(FPCS) របស់ឣគ្គនាយកដ្ឋានឣន្តោប្រវេសន៍ និងមានចំណារឯកភាពរបស់ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ ឣោយឣនុវត្តន៍វិធានការនេះ ចាប់ថ្ងៃទី០១ ខែកក្កដា ឆ្នាំ ២០២០ ខាងមុខនេះតទៅ។
ឣាស្រ័យហេតុនេះ សូមឣស់លោក លោកស្រី ដែលពាក់ព័ន្ធកន្លែងមួយចំនួនដូចបានរៀបរាប់ខាងលើ និងជនបរទេសដែលមានវត្តមានក្នុងខេត្តទាំងឣស់មេត្តាសហការភ្ជាប់ប្រព័ន្ធខាងលើជាបន្ទាន់ ជៀសវាងមានបញ្ហាផ្សេងៗ នៅពេលឣនុវត្តន៍ ។យេីងខ្ញុំសង្ឃឹមលើស្មារតីយកចិត្តទុកដាក់ និងសហការខ្ពស់របស់បងប្អូន៕
ដោយ៖កូឡាប