នេះគឺជាខណៈពេលដ៏រន្ធត់បំផុតមួយ ដែលបង្ហាញឲ្យឃើញដំរីទឹកដ៏ធំ១ក្បាល បានដេញវាយប្រហារម្តាយ និងកូនតូចម្នាក់យ៉ាងសាហាវ បន្ទាប់ពីវាបានរត់គេចចេញពីម្ចាស់របស់វានៅតាមផ្លូវ ។
យោងតាម Daily Mail ហេតុការណ៍ដ៏រន្ធត់នេះបានកើតឡើងនៅក្នុងទីក្រុង Heyuan ខេត្ត Guangdong ភាគខាងត្បូងនៃប្រទេសចិន កាលពីថ្ងៃទី១៩ មេសា កន្លងទៅនេះ ។ ហើយហេតុការណ៍នេះ ត្រូវបានថតបានដោយកាមេរ៉ាបំពាក់នៅខាងក្រៅផ្ទះគ្រួសាររងគ្រោះ។
នៅក្នុងវីដេអូ យើងអាចឃើញថា ម្តាយនោះបានកំពុងពរកូនរបស់នាងនៅខាងក្រៅផ្ទះ នៅពេលនោះស្រាប់តែមានសត្វក្របីទឹកមួយក្បាល បានដេញវាយប្រហារមកលើនាងពីក្រោយ។ ភ្លាមៗនោះ នាងក៏បានជំពប់ជើងដួលទៅនឹងដី និងព្យាយាមគេចខ្លួនពីសត្វក្របីនេះ ប៉ុន្តែ មិនអាចទៅរួចទេ ដែលជាហេតុធ្វើឲ្យវាបុកគាស់នាងឲ្យផ្ទប់នឹងជញ្ជាំង ជាមួយស្នែងដ៏មុតស្រួចរបស់វាយ៉ាងសាហាវ ។
សម្លេងស្រែកឲ្យជួយខ្លាំងៗរបស់ស្ត្រីជាម្តាយ និងកូនតូចរបស់នាង បានលឺដល់សមាជិកគ្រួសារប្រុស២នាក់ ស្ទុះចេញមកជួយយ៉ាងលឿន ហើយពួកគេបានព្យាយាមរុញច្រានក្របីនោះចេញទៅ ហើយម្តាយ និងកូនតូច ក៏ត្រូវបាននាំយកទៅខាងក្នុងដោយសុវត្ថិភាព ។
បន្ទាប់មក ប៉ូលិសក្នុងតំបន់ក៏បានមកដល់កន្លែងកើតហេតុ និងចាប់សត្វក្របីនោះ ។ ទោះយ៉ាងណា សត្វក្របីនេះត្រូវបានបាញ់សម្លាប់ដោយប៉ូលិស បន្ទាប់ពីពួកគេត្រូវបានផ្តល់ការយល់ព្រមពីការិយាល័យសន្តិសុខសាធារណៈ។
ម្តាយដែលគេជឿថាមានអាយុខ្ទង់ ៣០ ឆ្នាំ បានរងរបួស។ ចំណែកកូនតូចរបស់នាងមិនមានបញ្ហាអ្វីនោះទេ៕
ប្រែសម្រួល៖ លឹម ហុង (ប្រភព៖ Daily Mail)