ប្រធានាធិបតីអាមេរិច ដូណាល់ ត្រាំ បាននិយាយនៅថ្ងៃចន្ទថា ចិនគួរតែអាចបញ្ឈប់វីរុសកូរ៉ូណាបាន មុនពេលវាឆ្លងរាតត្បាតទៅកាន់ពិភពលោក។ លោកថ្លែងថា រដ្ឋាបាលរបស់លោកកំពុង តែធ្វើការស៊ើបអង្កេតយ៉ាងម៉ដ្ឋចង់ចំពោះអ្វីដែលបានកើតឡើង។
លោកថ្លែងក្នុងសន្និសីទសារព័ត៌មាននៅសេតវិមានដូច្នេះថា “ពួកយើងកំពុងតែធ្វើការស៊ើបអង្កេតយ៉ាហ្មត់ចត់… ពួកយើងមិនសប្បាយចិត្តជាមួយនឹងចិនឡើយ”។
“មានវិធីជាច្រើនដែលអ្នកអាចឲ្យពួកគេទទួលខុសត្រូវ”។
“យើងជឿជាក់ថា វាគួរតែអាចត្រូវបញ្ឈប់បាននៅកន្លែងវាផ្ទុះ។ វាគួរត្រូវគេបញ្ឈប់បានយ៉ាងលឿន ហើយដូច្នេះ វានឹងមិនមានការឆ្លងរាតត្បាតជុំវិញពិភពលោកឡើយ”។
ត្រាំ និយាយទៀតថា គាត់ប្រហែលនឹងទារសំណងនៃការខូចខាតពីចិន។ កាលពីពេលថ្មីៗកាសែតអាល្លឺម៉ង់ ស្នើឲ្យចិនផ្តល់សំណងជាទឹកប្រាក់ ១៦៥ពាន់លានដុល្លារដល់អាល្លឺម៉ង ដោយសារតែសេដ្ឋកិច្ចអាល្លឺម៉ង់ត្រូវបំផ្លាញដោយវីរុស។
លោកត្រាំ ត្រូវបានគេសួរថាតើគាត់នឹងពិចារណា ធ្វើដូចអាល្លឺម៉ងឬយ៉ាងណា ហើយគាត់បាននិយាយថា “ពួកយើងអាចធ្វើអ្វីផ្សេងដែលស្រួលជាងនោះ”។
លោកថ្លែងថា “អាល្លឺម៉ង់កំពុងសម្លឹងមើលរឿងមួយ ពួកយើងកំពុងមើលរឿងមួយ។ ពួកយើងកំពុងតែនិយាយពីបញ្ហាលុយច្រើនជាងដែលអាឡឺម៉ងកំពុងនិយាយ”។
“ពួកយើងមិនទាន់បានកំណត់ពីចំនួនទឹកប្រាក់នៅឡើយទេ”។
កាលពីសប្តាហ៍មុន រដ្ឋមន្ត្រីការបរទេសអាមេរិច លោក Mike Pompeo បាននិយាយថា អាមេរិចជឿជាក់ថា ទីក្រុងប៉េកាំងខកខានក្នុងការរាយការណ៍ ពីការផ្ទុះវីរុសឲ្យទាន់ពេលវេលា និងបិទបាំងពីគ្រោះថ្នាក់ដែលបង្កឡើងដោយវីរុស។
ចំណែកអ្នកនាំពាក្យក្រសួងការបរទេសចិន Hua Chunying បានធ្វើការឆ្លើយតបវិញថា លោក Pompeo “គួរឈប់លេងល្បែងនយោបាយ”។ យកល្អគួរសន្សំកម្លាំងជួយសង្គ្រោះជីវិតវិញ។
សូមបញ្ជាក់ថា វីរុសកូរ៉ូណា ឬ COVID-19 បានផ្ទុះឡើងចេញពីប្រទេសចិនកាលពីចុងឆ្នាំ ២០១៩។ រហូតមកដល់ពេលនេះ វីរុសដ៏កាចសាហាវនេះ បានឆក់យកជីវិតមនុស្សច្រើនជាង ២១១.០០០នាក់ និងឆ្លងទៅកាន់មនុស្សជាង ៣.០០០.០០០នាក់ជុំវិញពិភពលោក។
អាមេរិចគឺជាប្រទេសរងគ្រោះខ្លាំងជាងគេពីវីរុសនេះ ដោយមានអ្នកឆ្លងសរុបជិត ១.០០០.០០០នាក់ និងស្លាប់ជាង ៥០.០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia / Johns Hopkins
