ពោធិ៍សាត់ ៖ គ្រាប់យុទ្ធភណ្ឌមិនទាន់ផ្ទុះចំនួន២គ្រាប់ បន្សល់ទុកពីសម័យសង្គ្រាម នៅក្នុងអូរនិងស្ទឹង ត្រូវបានប្រទះឃើញ នៅក្នុងស្រុក២ផ្សេងគ្នា គឺស្រុកកណ្តៀង និងស្រុកបាកាន ខេត្តពោធិ៍សាត់ កាលពីថ្ងៃទី២៧ ខែមេសា ឆ្នាំ២០២០។
កម្លាំងមូលដ្ឋានអាវុធហត្ថស្រុកកណ្តៀង បានប្រាប់ឱ្យដឹងថា នៅវេលាម៉ោង៨និង៣០នាទី ថ្ងៃទី២៧ ខែមេសា ឆ្នាំ២០២០នេះ មានប្រជាពលរដ្ឋ បានប្រទះឃើញគ្រាប់មិនទាន់ផ្ទុះចំនួន១គ្រាប់ប្រភេទផ្លែទឹកគោ នៅក្នុងស្ទឹងស្ថិតក្នុងភូមិវត្តពោធិ៍ទី២ ឃុំអន្លង់វិល ស្រុ
កកណ្តៀង ខេត្តពោធិ៍សាត់។
ចំណែកកម្លាំងអាវុធហត្ថស្រុកបាកាន បានប្រាប់ឱ្យដឹងដែរថា នៅវេលាម៉ោង៩និង៤០នាទី ថ្ងៃទី២៧ ខែមេសា ឆ្នាំ២០២០នេះ មានប្រជាពលរដ្ឋឈ្មោះ ពៅ កុសល ភេទប្រុស អាយុ៥២ឆ្នាំ រស់នៅភូមិប្រឡាយរំដេង ឃុំរំលេច ស្រុកបាកាន ខេត្តពោធិ៍សាត់ បានមករាយការណ៍ជូនប៉ុស្តិ៍រដ្ឋបាលរំលេចថា គាត់បានប្រទះឃើញគ្រាប់យុទ្ធភណ្ឌ មិនទាន់ផ្ទុះនៅក្នុងអូរ ក្រោយផ្ទះគាត់។ ក្រោយពីទទួលបានព័ត៌មាន កម្លាំងប៉ុស្តិ៍រដ្ឋបាលរំលេច បានទៅពិនិត្យជាក់ស្តែង គឺឃើញប្រភេទគ្រាប់បែកអន្លូង។
គួរបញ្ជាក់ផងដែរថា គ្រាប់ទាំងអស់នោះ គឺបានបន្សល់ទុកតាំងពីសម័យសង្គ្រាមមកម្ល៉េះ។ បច្ចុប្បន្ន សមត្ថកិច្ច បានយកបន្លាហ៊ុមព័ទ្ធ និងរាយការណ៍ទៅអង្គភាព HELO TRUST ដូចគ្នា ដើម្បីយកទៅកម្ទេចចោល៕ ដោយ ៖ អ៊ុងសារុំ