បាត់ដំបង៖ ស្រីវ័យចំណាស់ ជាអ្នកជួយគ្រឿងញៀនម្នាក់ ត្រូវបានឃាត់ខ្លួននៅក្រុងបាត់ដំបង កាលពីថ្ងៃ ចន្ទ ទី២៧ ខែមេសា ឆ្នាំ២០២០ វេលាម៉ោង១៥និង៣៥ នាទីនៅចំណុចក្រុមទី៣០ ភូមិកំពង់ក្របី សង្កាត់ស្វាយប៉ោក្រុងបាត់ដំបង ខេត្តបាត់ដំបង។
ដោយអនុវត្តតាមមតិដឹកនាំជាប្រចាំរបស់ឯកឧត្តម ឧត្តមសេនីយ៍ទោ អ៊ុច សុខុន ស្នងការនៃស្នងការដ្ឋាននគរបាលខេត្តបាត់ដំបង ក៏ដូចជាយោបល់ណែនាំលើការងារជំនាញ ពីលោកឧត្តមសេនីយ៍ត្រី កុយ ហៀង ស្នងការរងផែនការងារគ្រឿងញៀននៃស្នងការដ្ឋាន នគរបាលក្រុងបាត់ដំបង ដែលមានលោកវរសេនីយ៍ឯក ឆាង វណ្ណឆៃ ជាអធិការនគរបាលក្រុងបាត់ដំបងដឹកនាំកម្លាំងផ្នែកជំនាញប្រឆាំងគ្រឿងញៀន ចូលរួមជាមួយកម្លាំងក្រុមអន្តរាគមន៍ នៃ អធិការដ្ឋាន បានធ្វើការបង្ក្រាបករណីរក្សាទុកដឹកជញ្ជូនឬជួញដូរដោយខុសច្បាប់ នូវសារធាតុញៀន ក្នុងបទល្មើសជាក់ស្តែងចំនួន១ករណី
និងឃាត់ខ្លួនជនសង្ស័យ ចំនួន ១នាក់ គឺឈ្មោះ វិន តឿ ហៅ យាយតឿ ហៅ យាយសក់ស ភេទស្រី អាយុ ៧៤ឆ្នាំ មានទីលំនៅក្នុងរ៉ាជង្រុក ភូមិកំពង់ក្របី សង្កាត់ស្វាយប៉ោ ក្រុងបាត់ដំបង ខេត្តបាត់ដំបង ។
ក្នុងប្រតិបត្តិការនេះ ដកហូតវត្ថុតាងរួមមាន៖ ម្សៅក្រាមពណ៌សថ្លាច្រកក្នុងថង់ប្លាស្ទិកថ្លា ដែលជាគ្រឿងញៀនប្រភេទមេតំហ្វេតាមីនម៉ាទឹកកកICEចំនួន ៤ថង់មានទម្ងន់១៦,៥៨ក្រាម កូនថង់សម្រាប់រំលែក្រកថ្នាំញៀនលក់មួយចំនួន។
នៅពេលសាកសួរស្រាវជ្រាវជនសង្ស័យខាងលើបានសារភាពថានោះគឺជាគ្រឿងញៀន ដែលខ្លួនជាអ្នកចែកចាយនារយៈកន្លងមក។
បច្ចុប្បន្ននគរបាលក្រុងបាត់ដំបង បានរៀបចំសំណុំរឿងបញ្ជូនខ្លួន និងវត្ថុតាងមកកាន់ការិយាល័យជំនាញ ដើម្បីចាត់ការបន្តតាមផ្លូវច្បាប់៕ដោយ៖កូឡាប
