ប្រទេសឥណ្ឌា បានលុបចោលការបញ្ជាទិញ ឧបករណ៍ធ្វើតេស្តលឿន រកវីរុសកូរ៉ូណា ពីប្រទេសចិន ក្រោយពេលឧបករណ៍នោះ ផ្តល់លទ្ធផលមិនត្រឹមត្រូវ។
រដ្ឋធានីដេលី ក៏បានដកយកមកវិញនូវឧបករណ៍ ធ្វើតេស្តរបស់ចិនទាំងអស់ ដែលត្រូវបានគេប្រើប្រាស់ នៅក្នុងរដ្ឋជាច្រើន។
ឧបករណ៍ទាំងនោះ ត្រូវគេសន្មតប្រើប្រាស់ ដើម្បីរកអង្គបដិបក្ខ នៅក្នុងឈាមរបស់មនុស្ស ដែលអាចមានការឆ្លងវីរុសកូរ៉ូណា។ (អង្គបដិបក្ខ គឺជាសារធាតុក្នុងឈាម ដែលជួយទប់ទល់នឹងរោគផ្សេងៗ)។
ឧបករណ៍ធ្វើតេស្តនោះត្រូវការពេល ៣០នាទីដើម្បីដឹងលទ្ធផល ហើយវាជួយអាជ្ញាធរ បានយ៉ាងលឿន ឲ្យយល់ដឹងពីទំហំ នៃការឆ្លងក្នុងតំបន់ច្បាស់លាស់ណាមួយ។
ប៉ុន្តែ ឧបករណ៍ធ្វើតេស្តលឿនោះ មិនអាចធ្វើតេស្តរកឃើញវីរុសកូរ៉ូណាឡើយ ហើយអ្នកវិទ្យាសាស្ត្រជាច្រើន មានក្តីកង្វល់ពីការប្រើប្រាស់វា សម្រាប់ធ្វើរោគវិនិច្ឆ័យ។
នៅពេលជាមួយគ្នានេះដែរ ចិនបានបដិសេធ ការអះអាងរបស់ឥណ្ឌា។
“គុណភាពផលិផលនាំចេញពីចិនគឺជាអាទិភាព។ វាមិនយុត្តិធម៌ និងមានទំនួសខុសត្រូវសោះ ចំពោះបុគ្គលដែលបានចាត់ផលិតផលចិន ជាផលិតផលមិនត្រឹមត្រូវ និងមើលលើបញ្ហាប្រកបដោយការរើសអើង”។ នេះជាការលើកឡើង របស់អ្នកនាំពាក្យស្ថានទូតចិនឈ្មោះ Ji Rong នៅក្នុងសេចក្តីប្រកាស នៅថ្ងៃអង្គារនេះ។
មានរដ្ឋជាច្រើនបានជំរុញ ក្រុមប្រឹក្សាស្រាវជ្រាវវេជ្ជសាស្ត្រឥណ្ឌា (ICMR) ដើម្បីអនុញ្ញាតឲ្យមានការធ្វើតេស្ត ជាមួយនឹងឧបករណ៍ទាំងនោះ ចំពេលមានការព្រួយបារម្ភថា ឥណ្ឌាមិនបានធ្វើតេស្តរកវីរុស នៅតំបន់ផ្សេងៗគ្រប់គ្រាន់។
ដំបូងឡើយ ICMR មានការស្នាក់ស្ទើរ ប៉ុន្តែបានសម្រេចនាំចូលឧបករណ៍ ធ្វើតេស្តលឿនពីក្រុមហ៊ុនចិន។
ទោះយ៉ាងណា មិនយូរប៉ុន្មាន រដ្ឋជាច្រើនក៏បានចាប់ផ្តើមត្អូញត្អែរថា ឧបករណ៍ធ្វើតេស្តទាំងនោះ ផ្តល់ភាពត្រឹមត្រូវត្រឹមតែ ៥ភាគរយប៉ុណ្ណោះ។ លើសពីនេះទៀត នៅពេលគេប្រើប្រាស់ឧបករណ៍ធ្វើតេស្ត លើអ្នកដែលគេបានដឹងថា មានផ្ទុកវីរុសរួចហើយ លទ្ធលបង្ហាញថាគ្មាន (អវិជ្ជមាន)។
សូមបញ្ជាក់ថា បច្ចុប្បន្ន ឥណ្ឌាមានអ្នកឆ្លងវីរុសកូរ៉ុណាសរុបជិត ៣០.០០០នាក់ និងមានអ្នកស្លាប់ជិត ១០០០នាក់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC