ភ្នំពេញ៖ មន្ត្រីជាន់ខ្ពស់នៃក្រសួងការងារ ថ្លែងថា ការនាំចេញផលិតផលវាយនភណ្ឌ សម្លៀកបំពាក់ និងស្បែកជើងរបស់កម្ពុជាទៅកាន់ទីផ្សារអន្តរជាតិ នឹងរងផលប៉ះពាល់ប្រមាណ៥០ទៅ៦០ភាគរយ នៅត្រីមាសទី២ ឆ្នាំ២០២០នេះ។
ផលប៉ះពាល់នេះ តម្រូវឱ្យភាគីពាក់ព័ន្ធរួមគ្នារិះរកដំណោះស្រាយ ពិសេសភាគីរាជរដ្ឋាភិបាល និយោជក សហជីព-កម្មករ និងអង្គការដៃគូនានា។
លោក ហេង សួរ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ ថ្លែងបែបនេះ បានធ្វើឡើងក្នុងសន្និសីទសារព័ត៌មានស្ដីពី បច្ចុប្បន្នភាព នៃការធ្វើចត្តាឡីស័កចំពោះកម្មកររោងចក្រ ដែលឈប់សម្រាកនាអំឡុងពេលបុណ្យចូលឆ្នាំថ្មី។
លោក ហេង សួរ បន្តថា នាពេលនេះបណ្តាប្រទេសនៅទ្វីបអឺរ៉ុប និងអាមេរិករងផលប៉ះពាល់ ដោយសារជំងឺកូវីដ-១៩ ដូច្នេះគេសម្រេចបិទទីផ្សារលក់ដូរជាបន្តបន្ទាប់ រីឯប្រជាពលរដ្ឋក៏គ្មាន អ្នកណាចាយវាយខ្ជីខ្ជាទៀតដែរ ដែលជាហេតុធ្វើឱ្យតម្រូវការសម្លៀកបំពាក់ ស្បែកជើង សម្ភារវាយនភណ្ឌនានា និងទំនិញផ្សេងទៀតនោះ ត្រូវបានកាត់បន្ថយយ៉ាងកំហុក។
លោក ហេង សួរ បានបន្ថែមថា រោងចក្រផលិតសម្ភារវាយនភណ្ឌ សម្លៀកបំពាក់ និងស្បែកជើងមួយចំនួនធំនៅកម្ពុជា បានដាក់ពាក្យស្នើសុំព្យួរដំណើរការផលិត និងសុំបិទទ្វារជាបន្តបន្ទាប់រហូតជាង១០០រោងចក្រ។ ប៉ុន្តែដោយសារការខិតខំសម្របសម្រួលគ្នា រវាងភាគីពាក់ព័ន្ធទាំងឡាយ ទាំងភាគីរាជរដ្ឋាភិបាល ភាគីនិយោជក និងកម្មករនិយោជិត បានសម្រួលពីការស្នើសុំបិទទ្វារ មកត្រឹមការព្យួរបណ្ដោះអាសន្នសិន។
គិតមកដល់ពេលនេះ មានរោងចក្រប្រមាណជាង ១៣០ ហើយដែលបានដាក់ពាក្យស្នើសុំព្យួរ ក្នុងនោះមានកម្មករនិយោជិតប្រមាណជិត ១០ ម៉ឺននាក់ ដែលរងផលប៉ះពាល់ពីការព្យួរនេះ ហើយរាជរដ្ឋាភិបាល បានដាក់ចេញវិធានការជាបន្តបន្ទាប់ ដើម្បីរក្សានូវការងារ រក្សាប្រាក់ចំណូលខ្លះសម្រាប់កម្មករនិយោជិតទាំងនោះដែរ។
ថ្វីដ្បិតភាគីទាំងឡាយហាក់បន្ធូរបន្ថយ ឱ្យគ្នាទៅវិញមកក៏ពិតមែន ប៉ុន្តែចំពោះការនាំចេញផលិតផលផលវាយនភណ្ឌ សម្លៀកបំពាក់ និងស្បែកជើងក៏កំពុងរងផលប៉ះពាល់ជាបណ្ដើរៗហើយដែរ ដោយមកដល់ត្រីមាសទី១ នៃឆ្នាំ២០២០ ការនាំចេញផលិតផលវាយនភណ្ឌ សម្លៀកបំពាក់ និងស្បែកជើងនៅសល់ប្រមាណ ៨០ ភាគរយ បើប្រៀបធៀបនឹងរយៈពេលដូចគ្នានៅឆ្នាំ២០១៩។
លោក ហេង សួរ បានបញ្ជាក់ថា គិតត្រឹមថ្ងៃទី២៧ ខែមេសា ឆ្នាំ២០២០នេះ កម្ពុជាមិនទាន់ទទួលបានការបញ្ជាទិញ ពីអ្នកបញ្ជាទិញនៅឡើយទេ សម្រាប់ខែឧសភា និងខែមិថុនា។ លោកបានថ្លែងយ៉ាងដូច្នេះថា «យើងទទួលស្គាល់ថា ការនាំចេញរបស់យើង គឺពិតជាប៉ះពាល់ ពិសេសក្នុងត្រីមាសទី២នេះតែម្ដង ដែលយើងគិតថាអាចប្រហាក់ប្រហែល ៥០-៦០ ភាគរយ នៃតួលេខឆ្នាំទៅ»៕ដោយ៖សម្ផស្ស
