ភ្នំពេញ៖ លោក ម៉េង វិមានតារា អធិការនគរបាលខណ្ឌមានជ័យបានប្រាប់សាព័ត៌មាន CEN ថា បន្ទាប់ពីទទួលដំណឹងថា មាននារីម្នាក់ត្រូវគេសម្លាប់ស្លាប់ទាំងអាក្រាតកាយនៅបន្ទប់នៃផ្ទះជួលស្ថិតនៅភូមិទ្រា៤ ក្នុងសង្កាត់ស្ទឹងមានជ័យទី៣ ខណ្ឌមានជ័យ នោះ ដោយក្រោមការបញ្ជាពី នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និង ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានបញ្ជាលោក ម៉េង វិមានតារា អធិការនគរបាលខណ្ឌមានជ័យ បានដឹកនាំកម្លាំងជំនាញចាប់បានហេីយជនដៃដល់បន្ទាប់ពីព្យាយាមរត់ក្រោយធ្វេីសកម្មភាពរំលោភរួចបានប៉ុន្មានម៉ោង។
លោក អធិការខណ្ឌមានជ័យបានប្រាប់ថា នារីរងគ្រោះគឺត្រូវបានជនដៃដល់វាយនិងយកកាំបិតចាក់។
ហេតុការណ៍នៅវេលាម៉ោង១៩និង៥០នាទីយប់ ថ្ងៃទី២៨ ខែមេសានេះ ស្ត្រីរងគ្រោះឈ្មោះសៀត ស៊ន អាយុ២៨ឆ្នាំមានស្រុកកំណើតភូមិចា ឃុំរំដេងស្រុកមេសាង ខេត្តព្រៃវែង បច្ចុប្បន្នស្នាក់នៅផ្ទះជួលនៅចំណុចកើតហេតុ
ស្ត្រីរងគ្រោះមានប្តីជាកម្មករសំណង់នៅខេត្តកំពត និងមានកូនម្នាក់។
តាមប្រភពពីលោកវរសេនីយ៍ត្រី ឯម ភារី នាយនគរបាលប៉ុស្តិ៍ស្ទឹងមានជ័យទី៣បានប្រាប់ថា ជនរងគ្រោះត្រូវឃាតកររំលោភរួចសម្លាប់ ដោយមានរូបភាពអាក្រាតមួយកំណាត់ក្រោមនិងដេកផ្កាប់មុខ។
សេចក្ដីរាយការណ៍ពីCEN បានឲ្យដឹងថា នៅវេលាម៉ោងជាង៧យប់ ថ្ងៃទី២៨ ខែមេសា ឆ្នាំ២០២០នេះ មានការប្រទះឃើញស្ដ្រីម្នាក់ដេកស្លាប់ ក្នុងថ្លុកឈាមទាំងអាក្រាតកាយល្វែងខាងក្រោម នៅក្នុងបន្ទប់ជួលជាន់ទី២ ស្ថិតក្នុងភូមិទ្រា៤ សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ។
បើតាមសេចក្ដីរាយការណ៍ជំហានដំបូង បានបញ្ជាក់ថា ការស្លាប់របស់ស្ដ្រីខាងលើ ត្រូវបានគេដាក់ការសង្ស័យថា ជាករណីឃាតកម្ម។ ប៉ុន្ដែទោះជាយ៉ាងណា កម្លាំងសមត្ថកិច្ចជំនាញ កំពុងតែធ្វើកោសល្យវិច្ច័យលើសាកសពរបស់ស្ដ្រីរងគ្រោះ និងស្រាវជ្រាវបន្ដទៀត ដើម្បីសន្និដ្ឋានជុំវិញការស្លាប់នេះផងដែរ។ ចំណែកជនល្មើសកំពុងតែស្ថិត ក្នុងកណ្ដាប់ដៃរបស់សមត្ថកិច្ចសួរនាំដោយសមត្ថកិច្ចពុំទាន់បញ្ចេញអត្តសញ្ញាណឃាតករនោះ និងមូលហេតុនៃការចាប់រំលោភនេះនៅឡើយទេ៕ ដោយ៖CEN
