ភ្នំពេញ៖ ឧត្តមសេនីយ៍ ទី ចំរើនកុសល បានថ្លែងតាមរយៈហ្វេសប៊ុកនៅថ្ងៃទី២៩ខែមេសានេះថា ករណីរថយន្ត Ford ស៊េរីទំនើ ផ្លាកលេខ ខម បើកបុកមនុស្សម្នាក់ស្លាប់ ហើយរត់គេចខ្លួននោះ ខ្ញុំបំបែកសំណុំរឿងនេះបានហើយ ប៉ុន្តែជនបង្កឈ្មោះ ឈុន សារ៉េត ឋានន្តរសក្តិ សក្តិ៥កងយោធពលខេមរភូមិន្ទ ហើយបច្ចុប្បន្នរត់គេចខ្លួន។
ចំណែកលោកផែង វណ្ណៈ បានលើកឡើងថា “ម្ចាស់រថយន្ត Ford លេខ ខម ត្រូវបានអ្នកស្រឡាញ់យុត្តិធម៌ ផ្ញើរូបមកឲ្យខ្ញុំចុះផ្សាយដើម្បីឲ្យបុគ្គលរូបនេះចូលខ្លួនមកដោះស្រាយសំណងជូនជនរងគ្រោះ ជាកម្មកររោងចក្រដែលបានស្លាប់ក្នុងហេតុការណ៍គ្រោះថ្នាក់ចរាចរណ៍ កាលពីយប់ថ្ងៃទី ២៥ ខែ មេសា ឆ្នាំ ២០២០ នៅផ្លូវ ២០០៤ ខណ្ឌ ពោធិ៍សែនជ័យ ។ ប្រភពបានបញ្ជាក់ថា ជនបង្កមានឈ្មោះ ឈុន សារ៉េត ។ ដូច្នេះ សូមបុគ្គលរូបនេះចេញមុខមកទទួលខុសត្រូវចំពោះមុខច្បាប់ ជាពិសេសត្រូវផ្ដល់សំណងសមរម្យដល់គ្រួសារសព” ។
ចំណែកលោកឧត្តមសេនីយ៍ ទី ចំរើនកុសល បានសរសេរលើហ្វេសប៊ុកថា “សូមជម្រាបថា សមត្ថកិច្ចបានស្គាល់ជនបង្ករួចហើយ មិនយូរទេ នឹងចាប់បុគ្គលនេះមកអនុវត្តទោស។ ប៉ុន្តែជនបង្កគួតែចូលខ្លួនមកទទួលទោសប្រសើរជាងគេចខ្លួន។ ព្រោះអ្នកអាចរត់គេច ប៉ុន្តែមិនអាចពួនបានរហូតទេ ព្រោះពេលនេះខ្ញុំស្គាល់អ្នកឯងជានណាហើយ !”។
លោកបន្តថា “យកល្អចូលខ្លួនទៅសមត្ថកិច្ចដើម្បីទទួលខុសត្រូវ ក្រែងបានស្រួលខ្លួនខ្លះ ! គេច ឬរត់រហូតមិនបានទេ ខ្ញុំជឿថាមានអ្នកស្គាល់បុគ្គលនេះ ទោះបីថាថតផ្លាកលេខមិនច្បាស់ពិតមែន។ សំណូមពរដល់បងប្អូនប្រជាពលរដ្ឋដែលស្គាល់បុគ្គលនេះ មេត្តាជួយរាយការណ៍ជូនសមត្ថកិច្ចអំពីទីតាំងស្នាក់នៅ ឬអង្គភាពដែលបុគ្គលនេះធ្វើការ “។
លោកបានបញ្ជាក់ថា “បុគ្គលនេះសាហាវព្រៃផ្សៃណាស់! ចិត្តគ្មានមេត្តាធម៌សោះ ! បុកគ្នាដេកដួលលើផ្លូវហើយ គួណាស់តែហៅរថយន្តសង្គ្រោះមកជួយ មិនមែនបិទភ្នែកបើកចេញយករួចខ្លួនអ៊ីចឹងទេ !”។
“ខ្ញុំបំបែកសំណុំរឿងនេះបានហើយ ! ! ! ជនបង្កឈ្មោះ (ឈុន សារ៉េត ) បច្ចុប្បន្នរត់គេចខ្លួន។ អង្គភាពធ្វើការ (សុំលាក់) ឋានន្តរសក្តិ សក្តិ៥កងយោធពលខេមរភូមិន្ទ មុខរបរកស៊ីក្រៅ ខួងបុកគ្រឹះ គឺស្គាល់អស់ហើយ ! ! !
ធានាថាមិនយូរទេ និងអូសករយកមកឲ្យទទួលខុសត្រូវចំពោះមុខច្បាប់។ យកល្អជនបង្កត្រូវចូលខ្លួន មកទទួលខុសត្រូវចំពោះបញ្ហានេះ។ អ្នកអាចរត់ ប៉ុន្តែអ្នកមិនអាចគេចពីសំណាញ់ច្បាប់បានរហូតទេ !”ចំណែកលោកឧត្តមសេនីយ៍ ទី ចំរើនកុសល បានបញ្ជាក់បន្ថែមយ៉ាងដូច្នេះ។
លោកផែង វណ្ណៈ បានលើកឡើងថា ដោយមើលឃើញនូវទុក្ខលំបាករបស់ក្មួយស្រី សិន ថា ប្រពន្ធ ឈ្មោះ វង រដ្ឋា កម្មកររោងចក្រដែលស្លាប់ដោយសារគ្រោះថ្នាក់ចរាចរណ៍ ជាមួយរថយន្តលេខ ខម កាលពីយប់ថ្ងៃទី ២៥ ខែ មេសា ឆ្នាំ ២០២០ នៅរសៀលថ្ងៃទី ២៨ ខែ មេសា ឆ្នាំ ២០២០ ខ្ញុំបានយកថវិកាសប្បុរសជនសរុបចំនួន ៧៥០ ដុល្លារ ទៅឧបត្ថម្ភដល់ ផ្ទះក្មួយស្រីនៅ ភូមិ ថ្មី ឃុំ ពោធិ៍ម្រាល ស្រុក បសេដ្ឋ ខេត្ត កំពង់ស្ពឺ ។ ខ្ញុំបាទជួសមុខអោយក្មួយស្រី សិន ថា និង ក្រុមគ្រួសារសព សូមគោរពអរគុណ និងសូមជូនពរ សប្បុរសជនទាំងអស់ ជួបប្រទះតែសេចក្ដីសុខ សេចក្ដីចំរើន ជានិច្ចនិរន្តរ៍ ។
សូមបញ្ជាក់ថា បើតាមផេក Traffic Spy – អ្នកប្រមាញ់ចរាចរណ៍ ចេញផ្សាយព័ត៌មាន កាលពីថ្ងៃទី២៦ខែមេសាឆ្នាំ២០២០ វេលាម៉ោង១និង៣៥នាទីថា “កាលពីវេលាម៉ោង១១នាទីយប់ថ្ងៃទី២៥ខែមេសានេះ មានឡាន ខម ផ្លាកលេខ មើលមិនច្បាស់ ប្រហែល 2-4594 ឬ 2-4994 មើលមិនច្បាស់ បើកបុកគេហើយ ចុះមកលើកម៉ូតូគេចេញពីមុខឡានរត់បានដោយសុវត្តិភាព! ពួកជេរអ្នកថត សុទ្ធតែជាពួកតែស្ករឈាមថោក បើកូនមីចោណាខ្លាំងម៉េចក៏ពេលនោះមិនប្រកាច់ទៅជួយ?
ហើយបងប្អូនជនរងគ្រោះបើបានឃើញ ទាកទងមកផេក ចាំខ្ញុំឲ្យទីតាំងម្ចាស់ឡាន”៕ដោយ៖កូឡាប