ចំនួនអ្នកស្លាប់ដោយសារវីរុសកូរ៉ូណានៅអាមេរិចកាលពីថ្ងៃអង្គារ កើនលើសចំនួនទាហ៊ានអាមេរិច ៥៨.២២០ ដែលបានបាត់បង់ជីវិតនៅអំឡុងសង្គ្រាមវៀតណាម ខណៈដែលចំនួនអ្នកឆ្លងកើនលើស ១លាននាក់។
ក្នុងរយៈពេល ១៨ថ្ងៃចុងក្រោយ អ្នកឆ្លងថ្មីនៅអាមេរិចកើនឡើងទ្វេដង ដែលតួលេខនោះស្មើនឹង ១ភាគ ៣នៃចំនួនអ្នកឆ្លងសរុបទូទាំងពិភពលោក។
ចំនួនអ្នកឆ្លងពិប្រាកដត្រូវគេគិតថាខ្ពស់ជាងនោះ ដោយមន្ត្រីសុខាភិបាលសាធារណៈព្រមានថា ការខ្វះបុគ្គលិកបណ្តុះបណ្តាល និងបរិក្ខារ បានកម្រិតដល់សមត្ថភាពនៃការធ្វើតេស្ត។
ចំនួនអ្នកឆ្លងប្រហែល ៣០ភាគរយកើតមាននៅក្នុងរដ្ឋញូវញ៉ក ដែលជាកន្លែងផ្ទុះធ្ងន់ធ្ងរជាងគេ ហើយរដ្ឋដែលធ្ងន់ធ្ងរបន្ទាប់មានដូចជា រដ្ឋ New Jersey រដ្ឋ Massachusetts និង California ជាដើម។
បើតាមការព្យាករណ៍របស់សកលវិទ្យាល័យ Washington ការរាតត្បាតវីរុសអាចឆក់យកជីវិតពលរដ្ឋអាមេរិចច្រើនជាង ៧៤.០០០នាក់ត្រឹមថ្ងៃទី ៤ ខែសីហា។
សូមបញ្ជាក់ថា វីរុសកូរ៉ូណា ត្រូវបានគេជឿជាក់ថា បានផ្ទុះចេញពីផ្សារសើមក្នុងទីក្រុងវូហាន ប្រទេសចិនកាលពីឆ្នាំមុន។ រហូតមកដល់ពេលនេះ វីរុសដ៏កាចសាហាវនេះ បានឆក់យកជីវិតមនុស្សច្រើនជាង ២១៧.០០០នាក់ និងឆ្លងទៅកាន់មនុស្សជាង ៣.១១០.០០០នាក់ជុំវិញពិភពលោក៕
អត្ថបទប្រែសម្រួលដោយ៖ សុភ័ក្រ
ប្រភព៖ Channelnewsasia
