បន្ទាយមានជ័យ ៖ រៀមច្បងនិងអ្នកពាក់ព័ន្ធត្រូវតែផ្តល់កម្លាំងចិត្ត ពិសេសលើកទឹកចិត្តដល់សិស្សពូកែទើបពួកគេខិតខំរៀន។ ម្ចាស់ជំនួយ អង្គការកូនក្មេង ក៏ដូចជាអាជ្ញាធរដែនដីមូលដ្ឋានទទួលស្គាល់និងបានដាស់តឿនក្មួយសិស្សានុសិស្សទាំងឡាយថា ត្រូវតែខិតខំរៀនសូត្រតាំងពីនៅតូចឡើងទៅអោយមានចំណេះជំនាញ ទើបមានអនាគតល្អ។
កញ្ញា ត្រាយ ស្ខលាភ ប្រធានតំបន់នៃអង្គការកូនក្មេងនិងលោកខាល ហេលស៊ី (Mr Carl Healhy) តំណាងក្រុមជំនំនិងជាម្ចាស់ជំនួយក្រុមវីឡូ ក្រីក សហរដ្ឋអាមេរិក( Willow Creek Association,USA) និយាយក្នុងពីធីចែកសម្ភារ:សិក្សាដល់សិស្សពូកែជាង៣០០នាក់លើ១.៦០០នាក់ នៅវិហារក្រុមជំនំមេតូឌីស្តមង្គលបូរីកាលពីថ្ងៃទី២១មករាថា៖ ការដែលយើងចែករង្វាន់សម្រាប់តែសិស្សមឋមសិក្សាដែលរៀនពូកែនេះ គឺមានបំណងអោយក្មួយៗជាសិស្សទាំងឡាយខិតខំរៀនសូត្រហើយទៅមុខអោយមានចំណេះ មានជំនាញទើបមានអនាគតល្អ។ ទោះយ៉ាងណា យើងក៏ផ្តល់កម្លាំងចិត្តដល់សិស្សដែលរៀនមិនទាន់ពូកែដែរ។
លោកដោត ជិន មេឃុំស្តីទីឃុំឬស្សីក្រោកស្រុកមង្គលបូរីនិយាយថា: កន្លងមកក្នុងមូលដ្ឋានរហូតដល់ថ្នាក់ខេត្តនៅបន្ទាយមានជ័យ ទាំងសាលារៀន ទាំងអាជ្ញាធរ សមត្ថកិច្ចជំនាញនិងអង្គការឬម្ចាស់ជំនួយនានាបានគាំទ្រ បានជម្រុញលើកទឹកចិត្តដល់សិស្សានុសិស្សអោយខិតខំរៀនសូត្រ។ ហើយបានរៀនបានពូកែឆ្នើមនឹងទទួលបានការលើកទឹកចិត្តតាំងពីនៅក្នុងថ្នាក់រៀន សាលារៀន ក្នុងមូលដ្ឋានដល់ខេត្តនិងប្រទេស។ ដូចជាសិស្សជាប់បាក់ឌុបក្នុងខេត្តបានកើនចំនួន ហើយរង្វាន់ក៏ធំៗទៅៗ ។
លោក ប៉ាង សុផានី អគ្គនាយកអង្គការកូនក្មេងនិយាយថា៖ អង្គការនេះបានប្រតិបត្តិការនៅកម្ពុជាពីឆ្នាំ២០០៧មកដោយធ្វើការជាមួយក្រុមជំនំគ្រីស្ទានមេតូឌីសតាមមូលដ្ឋានជាង១២០ក្រុម។ ក្នុងនោះសកម្មភាព អង្គការបានផ្តោតខ្លាំងលើជំនួយអប់រំដោយការគាំទ្រលោកគ្រូអ្នកគ្រូបំប៉នបន្ថែម,ទឹកស្អាត.,អនាម័យនិងសុខភាពមូដ្ឋាន។ លោកបានលើកឡើងពីការខិតខំចូលរួមចំណែករបស់អង្គការនេះដែលបានរួមចំណែកជាមួយអាជ្ញាធរពីមូលដ្ឋានដល់រាជរដ្ឋាភិបាលដើម្បីលើកស្ទួយឧត្តមប្រយោជន៍របស់កុមារ។
លោកប៉ាង សុផានី បានរំលឹកដែរពីអតីតកាលសម្រាប់ក្មួយៗកុមារបានយល់ដឹងថា កាលមុននៅភូមិស្រុកយើងគ្មានសាលារៀន គ្មានផ្លូវថ្នល់ គ្មានលទ្ធភាព ជីវភាពគ្រួសារប្រជាជនមិនសមស្របក្នុងការរៀនសូត្រទេ។ យើងខ្វះខាត ខ្សត់ខ្សោយគ្រប់ផ្នែក។ តែឥឡូវនិងទៅខាងមុខ ទាំងមូលដ្ឋានទាំងថ្នាក់ជាតិនឹងរីកចម្រើនក្រោមការដឹកនាំរបស់រាជរដ្ឋាបាលមានសម្តេចតេជោហ៊ុន សែនជាប្រមុខ។ ហេតុនេះហើយ ដើម្បីអោយក្មួយៗអាចមានការងារ មានមុខរបរនិងមានលទ្ធភាពទទួលបានចំណែកពីការអភិវឌ្ឍន៍រីកចម្រើនបែបនេះ ទាល់តែក្មួយៗខិតខំរៀនសូត្រអោយមានចំណេះជំនាញសមស្របនិងត្រូវចេះធ្វើបច្ចុប្បន្នភាពបន្ថែមជាប្រចាំ។ ដូច្នេះ ទាំងអង្គការ ទាំងអាជ្ញាធរនិងសមត្ថកិច្ចគ្របើថ្នាក់នឹងបន្តគាំទ្រជម្រុញលើកទឹកចិត្តអោយក្មួយៗបន្ថខិតខំរៀនសូត្រ។
ឆ្លៀតឱកាសនោះដែរ លោកអគ្គនាយកបានថ្លែងអំណរគុណដល់អាជ្ញាធរមានសមត្ថកិច្ចមូលដ្ឋានរហូតដល់រាជរដ្ឋាភិបាលដែលបានគាំទ្រ អនុញ្គាតិនិងសម្របសម្រួលដល់អង្គការក្នុងប្រតិបត្តិការ ។ក៏អរគុណដល់ម្ចាស់ជំនួយក្រុមជំនំវីឡូក្រីកនៃសរអា ដែលតែងតែផ្តល់ជំនួយនានា រួមទាំងសម្ភារ:សិក្សាដល់អង្គការសម្រាប់នាំមកចែកជូនសិស្សពូកែនិងអគុណដល់បញ្ជាការដ្ឋានអង្គរក្សសម្តេចតេជោហ៊ុន សែន នាយករដ្ឋមន្ត្រីដែលបានជួយសម្របសម្រួលដល់ការនាំចូលមកនូវសម្ភារ:បរិក្ខាខាងលើ។ អង្គការកូនក្មេងបានចែករង្វាន់ស្នាដៃ និងរង្វាន់លួងចិត្តដល់សិស្សានុសិស្សរៀនពូកែនិងក៏ដល់អ្នកពាក់ព័ន្ធផងដែរ៕ ដោយ ៖ បន្ទាយ