មន្ត្រីប៉ូលិសចរាចរណ៍ថៃម្នាក់ បានធ្វើឲ្យគ្រប់គ្នាស្លុតរន្ធត់ និងព្រឺជំនួសជាខ្លាំង នៅពេលឃើញគាត់ជិះពោបលើក្បាលរថយន្ត Mitsubishi Mirage ១គ្រឿង ដែលបានបើករត់គេចពីគាត់ក្នុងគ្រោះថ្នាក់ចរាចរណ៍ រហូតចម្ងាយ២គីឡូម៉ែត្រ កាលពីថ្ងៃពុធ កន្លងទៅ ។
ប៉ូលិសបាននិយាយថា មន្ត្រីប៉ូលិសរងគ្រោះខាងលើនេះ បានកំពុងនៅលើកង់ដោយឈប់នៅផ្លូវបំបែកមួយ នៅពេលនោះក៏ស្រាប់តែរថយន្ត Mitsubishi Mirage បានមកបុកពីខាងក្រោយកង់របស់គាត់តែម្តង។
ការប៉ះទង្គិចនេះមិនជាធ្ងន់ធ្ងរនោះទេ ហើយគាត់ក៏បានចុះពីកង់ ដើម្បីនិយាយរកខុសត្រូវជាមួយអ្នកបើករថយន្ត ។ ប៉ុន្តែ ដោយសារតែអ្នកបើកបរមិនធ្វើការចរចាគ្នា ហើយបម្រុងបើកគេច ជាហេតុធ្វើឲ្យគាត់ស្ទុះឡើងជិះពោបលើក្បាលរថយន្តតែម្តង ។ ជាលទ្ធផល រថយន្តនោះបាននាំយកគាត់រហូតចម្ងាយប្រហែល ២ គីឡូ ម៉ែត្រ។
ទោះយ៉ាងណា នៅទីបំផុត រថយន្តនោះបានឈប់ និងបានលើកគាត់ចុះដីពីរថយន្ត រួចបង្កើនល្បឿនចាកចេញទៅបាត់ស្រមោល ។ នេះបើតាម Bangkok Post រាយការណ៍ឲ្យដឹង។
ប៉ូលិសនិយាយថា ពួកគេនឹងព្យាយាមកំណត់អត្តសញ្ញាណអ្នកបើកបររូបនោះ តាមរយៈវីដេអូកត់ត្រាពីកាមេរ៉ាសុវត្ថិភាព ៕
ប្រែសម្រួល៖ លឹម ហុង (ប្រភព៖ chiangraitimes)
