តាកែវ៖ អភិបាលខេត្តតាកែវ បានថ្លែងថា ចំពោះជំងឺកូវីដ១៩នេះ យើងមិនអាចធ្វេសប្រហែសបានឡើយ ជាពិសេសប្រជាពលរដ្ឋ ដូច្នេះអាជ្ញាធរពាក់ព័ន្ធទាំងអស់ត្រូវ តែបន្តពង្រឹងការចុះពិនិត្យតាមដានរាល់ការវិលត្រឡប់ របស់បងប្អូនដែលមានសាច់ញាតិ ទើបត្រឡប់មកពីក្រៅប្រទេស។
ថ្លែងក្នុងកិច្ចប្រជុំពិនិត្យ និងតាមដានការអនុវត្តការងារ របស់គណៈកម្មការប្រយុទ្ធប្រឆាំងការរីករាលដាលជំងឺកូវដី១៩ នៅទូទាំងខេត្តតាកែវ នាព្រឹកថ្ងៃទី ២៩ ខែមេសា នេះ ឯកឧត្តម អ៊ូច ភា អភិបាលខេត្តតាកែវ នៅតែបន្តក្រើនរំលឹកដល់អជ្ញារធរ និងមន្ត្រីពាក់ព័ន្ធទាំងអស់ត្រូវតែបន្តយុទ្ធនាការប្រយុទ្ធប្រឆាំង និងជំងឺកូវីដ១៩នេះ បន្តទៀត បើទោះបីជាស្ថានភាពនៃជំងឺកូវីដ១៩ នៅក្នុងប្រទេសកម្ពុជាកំពុងតែស្រាកស្រានក៏ដោយ ។
ឯកឧត្តមអភិបាលខេត្តតាកែវ បន្តថា ចំពោះជំងឺកូវីដ១៩នេះ យើងមិនអាចឆ្វេសប្រហែសបានឡើយ ជាពិសេសប្រជាពលរដ្ឋ ដូច្នេះអាជ្ញាធរពាក់ព័ន្ធទាំងអស់ត្រូវ តែបន្តពង្រឹងការចុះពិនិត្យតាមដានរាល់ការវិលត្រលប់ របស់បងប្អូនដែលមានសាច់ញាតិ ទើបត្រលប់មកពីក្រៅប្រទេស ក្នុងនាមអាជ្ញាធរមូលដ្ឋានត្រូវធ្វើការពន្យល់ និងអប់រំពួកគាត់ ត្រូវធ្វើការដាក់ខ្លួនដាច់ដោយឡែក រយៈពេល១៤ថ្ងៃសិន ចាំចូលមកស្និទ្ធស្នាលជាមួយជាមួយសាច់ញាតិក្រុមគ្រួសារ ឬបងប្អូននៅមូលដ្ឋាន ដើម្បីជៀសវាងការឆ្លងរីករាលដាល នៃមេរោគកូវីដ១៩ នៅសហគមន៍ ប្រសិនមានអាការសង្ស័យណាមួយត្រូវប្រញាប់ទាក់ទង មកមណ្ឌលសុខភាព មន្ទីរពេទ្យបង្អែកស្រុក ឬទំនាក់ទំនងសាកសួរព័ត៌មានបន្ថែមលេខ ១១៥ ។
ទន្ទឹមនោះដែរឯកឧត្តម អ៊ូច ភា អភិបាលខេត្តតាកែវ បានធ្វើការកោតសរសើរដល់ អាជ្ញាធរពាក់ព័ន្ធទាំងអស់ ដែលបានខិតខំយកចិត្តទុកដាក់អនុវត្តន៍ការ ប្រយុទ្ធប្រឆាំងការរីករាលដាលនៃជំងឺកូវីដ១៩ ស្របតាមអនុសាសន៍ណែនាំដ៏ខ្ពង់ខ្ពស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃកម្ពុជា ក៏ដូចជាសេចក្ដីណែនាំរបស់ក្រសួងស្ថាបនពាក់ព័ន្ធនានា ដើម្បីចូលរួមទប់ស្កាត់កុំឲ្យមានការរីករាលដាល នៃមេរោគនេះ នៅក្នុងសហគមន៍របស់យើង ព្រោះថាជំងឺកូវីដ១៩នេះ បាននិងកំពុងរាតត្បាតជាសកល៕ដោយ៖ តាកែវ
