ភ្នំពេញ ៖ ឧត្តមសេនីយ៍ ទី ចំរើនកុសល បានថ្លែងថា នាពេលនេះជនបង្កគ្រោះថ្នាក់ ដែលនាំឲ្យជនរងគ្រោះស្លាប់ បានកំពុងពឹងពាក់បុគ្គលម្នាក់ ដែលមានឈ្មោះល្បីនៅក្នុង facebook ដើម្បីរត់ការសងសំណងរដ្ឋប្បវេណី និងបញ្ចប់រឿងនេះ។ ខ្ញុំរង់ចាំមើលថាតើច្បាប់ អូសកលោកឯងចូលគុកបានឬអត់?
បើតាមផេកហ្វេសប៊ុកផ្លូវការនៅថ្ងៃទី២៩ខែមេសានេះ ឧត្តមសេនីយ៍ ទី ចំរើនកុសល បានប្រកាសផ្សព្វផ្សាយដំណឹងបន្ទាន់ !! !។ លោកថា “ខ្ញុំបានទទួលដំណឹងថា ពេលនេះជនបង្កគ្រោះថ្នាក់ដែលនាំឲ្យជនរងគ្រោះស្លាប់ បានកំពុងពឹងពាក់បុគ្គលម្នាក់ដែលមានឈ្មោះល្បីនៅក្នុង facebook ដើម្បីរត់ការសងសំណងរដ្ឋប្បវេណី និងបញ្ចប់រឿងនេះ។ ក្នុងនាមខ្ញុំជាអ្នកបំបែកសំណុំរឿងនេះផ្ទាល់ ខ្ញុំរង់ចាំមើលថាតើរឿងនេះគេដោះស្រាយតាមរូបភាពណា? តើគេគិតយ៉ាងម៉េចចំពោះបណ្តឹងអាជ្ញា បន្ទាប់ពីមានសំណង? បុគ្គលនេះសាហាវព្រៃផ្សៃណាស់ បុកគេហើយមិនព្រមហៅរថយន្តសង្គ្រោះមកជួយគ្នាទេ បែរជាបើករថយន្តរត់គេចខ្លួន ទុកឲ្យជនរងគ្រោះដេកស្លាប់នៅកន្លែងកើតហេតុ”។
លោក បានបញ្ជាក់ថា “រឿងសំណងរដ្ឋប្បវេណី ចង់សងអីសងទៅ ប៉ុន្តែបណ្តឹងអាជ្ញា អ្នកឯងត្រូវតែមានការទទួលខុសត្រូវ ចំពោះមុខច្បាប់។ ខ្ញុំរង់ចាំមើលថាតើច្បាប់ អូសកលោកឯងចូលគុកបានឬអត់? ព្រោះអីលោកឯងគ្មានសារជាតិជាមនុស្សទេ លោកឯងបុកគេហើយ គួរណាស់តែជួយហៅរថយន្តសង្គ្រោះមកជួយសង្គ្រោះបឋម យ៉ាងហោចណាស់អាចសង្គ្រោះជីវិតជនរងគ្រោះបានដែរ តែលោកឯងមើលឃើញជីវិតជនរងគ្រោះមិនបានស្មើនឹងជីវិតសត្វផង។
ក្នុងនាមខ្ញុំជាមន្ត្រីនគរបាលយុត្តិធម៌មួយរូប ខ្ញុំនិងធ្វើជាដើមបណ្តឹង ដើម្បីប្តឹងលោកឯងទៅស្ថាប័នអយ្យការ បើក្នុងករណីលោកឯងគ្រាន់តែបញ្ចប់រឿងមួយនេះនៅក្រៅប្រព័ន្ធច្បាប់” ។
លោកថា ខ្ញុំបំបែកសំណុំរឿងនេះបានហើយ ! ! ! ជនបង្កឈ្មោះ ឈុន សារ៉េត បច្ចុប្បន្នរត់គេចខ្លួនដែលអង្គភាពធ្វើការ (សុំលាក់) មាន ឋានន្តរសក្តិ សក្តិ៥កងយោធពលខេមរភូមិន្ទនិង មានមុខរបរកស៊ីក្រៅ ខួងបុកគ្រឹះ គឺស្គាល់អស់ហើយ ! ! ! ធានាថាមិនយូរទេ និងអូសករយកមកឲ្យទទួលខុសត្រូវចំពោះមុខច្បាប់។ យកល្អជនបង្កត្រូវចូលខ្លួនមក ទទួលខុសត្រូវចំពោះបញ្ហានេះ។ អ្នកអាចរត់ ប៉ុន្តែអ្នកមិនអាចគេចពីសំណាញ់ច្បាប់បានរហូតទេ !
ចំណែកផេកហ្វេសប៊ុក Li Qing បានសរសេរថា “ទាំងអស់ខាងក្រោមនេះ ជារូបអាឃាតករឈាមត្រជាក់បើកបុកមនុស្សហើយ មិនអន្តរាគមន៍ហៅឡានសង្គ្រោះ បែរលើកម៉ូតូជនរងគ្រោះចេញ រួចបន្តដំណើរទៅមុខដោយរត់គេចមិនព្រមទទួលខុសត្រូវ ឲ្យជនរងគ្រោះស្លាប់ក្រោមដំណក់ទឹកភ្លៀង យ៉ាងសាហាវព្រៃផ្សៃ។ ជនបង្កឈ្មោះថា ឈុន សារ៉េត បច្ចុប្បន្នរត់គេចខ្លួន!!! នាងខ្ញុំនិងតាមដានប្រមាញ់រឿងនេះ រហូតជនរងគ្រោះទទួលបានយុត្តិធម៌មកវិញ ។ ចាំមើលអាកន្តឿខុសខ្នាតឈាមខ្មៅមួយនេះវារត់ពូនដល់ក្រហែងថ្មណា!!!”៕
ដោយ៖កូឡាប