ភ្នំពេញ៖ លោកជំទាវ ជូ ប៊ុនអេងបន្តថា ទោះបីជារាជរដ្ឋាភិបាលត្រៀមបម្រុង ថវិកាប្រហែល ៣០០ លានដុល្លារអាមេរិក ជួយដល់ពលករខ្វះខាតមកពីវិបត្តិ កូវីដ-១៩ យ៉ាងណាក៏ដោយ ក៏ការផ្តល់ជូនការឧបត្ថម្ភនេះ គ្រាន់តែជាការដោះស្រាយបញ្ហាជួយសម្រាល ប៉ុន្តែពលករខ្វះខាតត្រូវតែគិតអំពីលទ្ធភាពឲ្យបានគ្រប់គ្រាន់ ដើម្បីផ្គត់ផ្គង់ខ្លួនឯងបន្ថែមនៅក្នុងការរស់នៅ។
នៅទីស្តីការក្រសួងមហាផ្ទៃ នាព្រឹកថ្ងៃពុធ ទី២៩ ខែមេសា ឆ្នាំ២០២០ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានសហការជាមួយអង្គការអន្តរជាតិទេសន្តរប្រវេសន៍ IOM បើកកិច្ចប្រជុំស្តីពីកិច្ចសហការក្នុងការឆ្លើយតបនឹងវិបត្តិ កូវីដ-១៩ ក្នុងចំណោមពលករចំណាកស្រុក និងសហគមន៍ ដែលដឹកនាំដោយ លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស (គ.ជ.ប.ជ) ដោយមានការចូលរួមពី អនុរដ្ឋលេខាធិការ អគ្គលេខាធិការដ្ឋានក្រសួងមហាផ្ទៃ អគ្គលេខាធិការដ្ឋាន គ.ជ.ប.ជ ទីភ្នាក់ងារ អង្គការសហប្រជាជាតិ ថ្នាក់ដឹកនាំ និងមន្ត្រី នៃអង្គការ IOM ព្រមទាំងស្ថាប័ន អង្គការដៃគូជាតិ អន្តរជាតិពាក់ព័ន្ធជាច្រើនផងដែរ។
ក្នុងកិច្ចប្រជុំនាឱកាសនោះ លោកជំទាវ ជូ ប៊ុនអេង បានមានប្រសាសន៍ថា កិច្ចនេះគឺធ្វើឡើងដើម្បីស្វែងរកការចូលរួមពីដៃគូរអភិវឌ្ឍន៍ និងសង្គមស៊ីវិល ឆ្លើយតបទៅនឹងវិបត្តិកូវីដ១៩ លើជនទេស្តរប្រវេសន៍ និងសហគមន៍ ក្នុងព្រះរាជាណាចក្រកម្ពុជា ផ្លាស់ប្តូរបទពិសោធន៍ក្នុងសកម្មភាពតាមសហគមន៍របស់អង្គការដៃគូរ និងមេរៀនទទួលបាន និងសម្រេចលើគោលការណ៍សកម្មភាពរួមគ្នា ដែលត្រូវអនុវត្ត នៅតាមបណ្តាសហគមន៍ ដែលមានជនទេស្តរប្រវេសន៍វិលត្រឡប់ ដែលប្រឈមនឹងការខ្វះខាត ដើម្បីលើកកម្ពស់សុខភាព និងកិច្ចការពារ ព្រមទាំងដើម្បីលើកកម្ពស់សុវត្ថិភាពស្បៀង និងជីវភាពរស់នៅផងដែរ។
លោកជំទាវ ក៏បានបញ្ជាក់បន្ថែមថា កិច្ចប្រជុំនេះ នឹងពិភាក្សាគ្នាលម្អិតបន្ថែមលើការធ្វើបច្ចុប្បន្នភាពលើយន្តការរបស់រាជរដ្ឋាភិបាល ស្តីពីការឆ្លើយតបនូវគម្រោងក្នុងការឆ្លើយតបចំពោះកូវីដ១៩ (COVID-19) និងការវិលត្រឡប់របស់ជនចំណាកស្រុក ដោយផ្អែកលើលទ្ធផលនៃកិច្ចប្រជុំពិគ្រោះយោបល់រវាងរដ្ឋាភិបាល និងក្រុមការងារអង្គការសហប្រជាជាតិ កាលពីថ្ងៃទី២២ ខែមេសា ឆ្នាំ២០២០ផងដែរ។
លោកជំទាវ ជូ ប៊ុនអេង បានថ្លែងថា រាជរដ្ឋាភិបាលត្រៀមថវិកា ៣០០លានដុល្លារសម្រាប់បម្រុងជួយគាំពារសង្គម និងសន្តិសុខស្បៀងក្នុងអំឡុងពេលវិបត្តិកូវីដ-១៩។ ថវិកាប្រហែល ៣០០លានដុល្លារអាមេរិកនេះ នឹងត្រៀមបម្រុងជាជំនួយគាំពារសង្គម ក៏ដូចជាសន្តិសុខស្បៀង ដែលគ្រោងនឹងដំណើរការអនុវត្តន៍ នៅចុងខែឧសភា ឬដើមខែមិថុនា ឆ្នាំ២០២០ខាងមុខនេះ។
លោកស្រី ជូ ប៊ុនអេង បានបញ្ជាក់យ៉ាងដូច្នេះថា៖ «កាលពីពេលប្រជុំកន្លងទៅ លោកអគ្គលេខាធិការ (គ.ជ.ប.ជ) បានលើកឡើងថា យើងកំពុងតែពិនិត្យលើកញ្ចប់ថវិកា រៀបចំជាបញ្ជី ប្រហែលជាក្នុងចុងខែ៥ ឬដើមខែ៦អីហ្នឹង យើងនឹងមានលទ្ធផលនៃការបើកផ្តល់។ ខ្ញុំមិនហ៊ានអះអាងថា តើដៃគូយើងជួយប៉ុន្មាន យើងជួយប៉ុន្មាន គ្រាន់តេដឹងថា ពេលនេះដល់ដាច់ឆ្នាំ ត្រូវការលុយប្រហែល ៣០០លានដុល្លារ»។
បើតាមលោកជំទាវ ជូ ប៊ុនអេង រាជរដ្ឋាភិបាលកម្ពុជា ថែមទាំងបានគិតគូរទាំងពលករដែលកំពុងនៅក្រៅប្រទេស និងក្នុងប្រទេស។ បើនិយាយពីពលករនៅក្រៅប្រទេសត្រូវជាបន្ទុករបស់ ប្រទេសគោលដៅ ក្នុងការទំនុកបម្រុងពួកគាត់ពេលខ្វះខាត ក្នុងអំឡុងមានវិបត្តិកូវីដ១៩ ប៉ុន្តែបើនិយាយពីពលករដែលចូលមកក្នុងស្រុកវិញ គឺជាការទទួលខុសត្រូវរបស់រាជរដ្ឋាភិបាលកម្ពុជាតែម្តង។
លោកជំទាវថ្លែងថា រាជរដ្ឋាភិបាលមានគោលនយោបាយរួចហើយ នៅក្នុងការផ្តល់ជំនួយគាំពារសង្គម ក៏ដូចជាការគិតគូរលើកកម្ពស់ជីវភាព នៃការរស់នៅរបស់ពលករទេសន្តរប្រវេសន៍ លើបញ្ហាសន្តិសុខស្បៀង។ ចំពោះសកម្មភាព នៃការអនុវត្តគោលនយោបាយនោះ គឺជាសកម្មភាពថ្នាក់ជាតិតែម្តង បានន័យថា ទាំងការការពារកូវីដ១៩ និងលើកកម្ពស់សុខភាព គឺក្រសួងសុខាភិបាល របស់លោក ម៉ម ប៊ុនហេង ដឹកនាំធ្វើការផ្នែកនេះ។
ដើម្បីធ្វើការងារនេះឲ្យបានល្អ រាជរដ្ឋាភិបាលកម្ពុជា ក៏នឹងសហការជាមួយអង្គការសហប្រជាជាតិ អង្គការសុខភាពពិភពលោក (WHO) និងក្រុមការងារប្រយុទ្ធប្រឆាំងជំងឺឆ្លងអាមេរិក (CDC) ផងដែរ។ ចំណែកឯក្រសួងសេដ្ឋកិច្ច និងហិរញ្ញវត្ថុ ដើរតួនាទីសំខាន់ ដើម្បីគិតគូរទៅដល់ការផ្គត់ផ្គង់ ការត្រៀមបម្រុងនូវស្បៀង ក៏ដូចជាការគាំពារសង្គម ដែលគ្រោងនឹងមានការចុះឈ្មោះប័ណ្ណក្រីក្របន្ថែមទៀត ព្រោះថាត្រូវមានពលករចំណាកស្រុកចូលស្រុកវិញ ដែលមានការ ខ្វះខាត ត្រូវទទួលបានប័ណ្ណក្រីក្រ ដើម្បីទទួលបានការគាំពារសន្តិសុខស្បៀង៕
ដោយ កូឡាប